Seia Tatou Toe Feiloai
Toetu—o le Amataga o le Tino Ola Pea
Mai le “Toetu,” Liahona, Iulai 2000, 16–19.
O le oti e le o le faaiuga o lo tatou faasinomaga.
Keriso Toetu, saunia e Robert T. Barrett.
Ou te le iloa pe o tatou faafetaia atoatoa le matua taua tele o lo tatou talitonuga i se toetu moni lava, o le lalolagi atoa. … Na folafola mai e le Perofeta o Iosefa Samita:
“O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.” (Aoaoga a Perofeta o le Ekalesia: Iosefa Samita (2007), 49].
O mea uma i lena misiona mamalu, aisea na faaaoga ai e le Perofeta o Iosefa Samita le molimau e uiga i le maliu o le Faaola, tanumia, ma le Toetu o le mataupu faavae taua o la tatou tapuaiga … ? O le tali o loo maua i le mea moni o le Toetu o le Faaola e totonugalemu lea i se mea ua taua e perofeta “i le fuafuaga tele ma faavavau o le laveaiga mai le oti” (2 Nifae 11:5).
I la tatou faigamalaga e faavavau, o le toetu o le faailo malosi lea i le ala e faailoga ai le faaiuga o le olaga nei ma le amataga o le tino ola pea. … Ua tatou iloa foi, mai le faaaliga o onapo nei, a aunoa ma le toe faatasia o o tatou agaga ma o tatou tino i le toetu e le mafai ona tatou maua le “atoatoaga o le olioli” (MF&F 93:33–34). …
“O le ‘faamoemoe ua ola’ ua tatou maua i le toetu, [tagai 1 Peteru 1:3] o lo tatou talitonuga maumaututu lea o le oti e le o le mutaaga lea o lo tatou faasinomaga, ae ua na o se laasaga e tatau ai i le suiga o le faagasologa mai le olaga nei i le tino ola pea. O lenei faamoemoe ua suia ai le vaaiga atoa lava i le olaga i la le tino. …
O le mautinoa o le toetu tatou te maua ai le malosi ma le faamoemoe e onosaia ai luitau o le olaga o loo feagai ma i tatou taitoatasi, ma i latou tatou te alolofa i ai, o mea e pei o tulaga le atoatoa faaletino, faalemafaufau, po o lagona ia tatou te o mai ma i tatou ina ua fananau mai pe oo mai foi i le gasologa o le olaga. Ona o le toetu, ua tatou iloa ai o nei faaletonu faaletino ua na o se taimi le tumau!
O le mautinoa o le toetu e aumaia ai foi ia i tatou se lagona malosi e tausia ai poloaiga a le Atua i o tatou olaga faaletino. O le Toetu e sili atu nai lo le na o le toe faatasia o se agaga i se tino na taofia faapagota i le tuugamau. … Na aoao mai le perofeta o Amoleka, “E leai, e le mafai ona e fai mai o nei upu; ona o lena lava agaga e tasi sa mau i o outou tino i le taimi tou te o ese atu ai i fafo o lenei olaga, o lena lava agaga o le a i ai le mana e mau ai i lou tino i lena lalolagi faavavau” (Alema 34:34). …
O le mautinoa o le toetu o le a aofia ai ma se avanoa e faatasi ai ma tagata o o tatou aiga—tane, ava, matua, uso ma tuafafine, fanau, ma a latou fanau—o se faamalosiau malosi mo i tatou e faataunuu ai o tatou tiutetauave faaleaiga i le olaga nei. E fesoasoani ia i tatou e ola faatasi ai i le alofa i lenei olaga i le tulimatai atu o le toetuufaatasiga fiafia ma fegalegaleaiga i le isi olaga.