Aualofa

Saunia e Linda K. Burton

Peresitene Aoao o le Aualofa

E faapefea ona outou mafaia o ni uso o Le Aualofa ona fesoasoani i “uso fou” ia faamanuiaina i la tatou vaega taua o le galuega o le faaolataga? E mafai ona e fesoasoani ia latou malamalama o i latou o se vaega taua o le galuega paia i le malo o le Atua. O le faasoaina atu o le tusi po o le sootaga i le initoneti i Afafine i Lo‘u Malo e mafai ona fesoasoani e faamatala ai la tatou galuega paia i le Aualofa.

E mafai ona outou uulima ma tatala o outou loto i tamaitai talavou a o tatou sauniuni faatasi mo le faamanuiaga o le ola e faavavau. E mafai ona outou faalauteleina o outou li‘o o uo e faaaofia ai tamaitai talavou. E ala i le faia o lena mea, o le a outou faataunuuina le manao o Lusi Maki Samita i ona uso muamua lava o le Aualofa: “E tatau ona tatou faapelepele le tasi i le isi, vaavaai e le tasi le isi, faamafanafana e le tasi le isi ma ia maua aoaoga po o faatonuga, ina ia mafai ai ona tatou nonofo uma faatasi i le lagi.”³

O le a le mea e mafai e Taitai o le Aualofa ma Tuafafine ona Faia?

Ia iloa o tamaitai talavou e aumai faatasi ma i latou ni taleni, meaalofa, ma se naunautai e faasoa atu. Ia mautinoa o tamaitai talavou e ulufale atu i le Aualofa, e i ai se uo e nonofo faatasi. Tuu atu ia i latou ni avanoa e faaopoopo atu ai lo latou naunautai susulu i le Aualofa. Ia iloa e le gata ina i ai sou uunaiga mamana i nei uso laiti, ae e mafai ona avea i latou ma ni faataitaiga agalelei ia te oe. Afai e te aoaoina lesona o le Aualofa, ia mautinoa ia aofia ai tulaga uma o vaega o tausaga o loo e aoaoina—ae le na o tina. O tamaitai talavou e mafai foi ona tuuina i ai avanoa e aoao atu ai le Aualofa. E mafai ona e taumafai e faipaga uso laiti ma uso matutua i faiaoga asiasi ma avanoa o auaunaga. E mafai ona avea oe ma se faamanuiaga ma fesoasoani e aveesea papupuni o le matua.