Aisea Tatou te Faia ai Papatisoga mo e ua Maliliu

E tele atu mea o loo tutupu i le taimi o le papatisoga mo e ua maliliu nai lo le mea tatou te vaaia.

Afai na e faia ni papatisoga mo e ua maliliu muamua, masalo ua outou lagonaina nisi o faamanuiaga o le tapuai i le malumalu: e te lagona ua faaitiitia le popole, sili atu ona mafaufau lelei, ma ua sili atu le faatumulia i le filemu ma le faatuatua. E ofoofogia faamanuiaga e mafai ona e maua mai le alu i le malumalu, ae o le tapuai i le malumalu e sili atu nai lo faamanuiaga e te maua. O nisi taimi e faigata ai ona manatua le isi tagata o loo aofia i lau tapuaiga i le malumalu, ae o ia e sili atu nai lo o se igoa i luga o se fasi pepa lanumoana pe piniki. Pe a papatisoina pe faamauina oe e fai ma sui (mo se) tasi, o loo e fesoasoani i se tagata moni.

O lea la se mea e te iloa e uiga i nei tagata ua maliliu? Ma aisea e taua tele ai mo oe ina ia papatisoina ma faamauina mo i latou? O tusitusiga paia e tuuina mai ai le tele o faamatalaga e uiga i le olaga pe a mavae le olaga faitino.

Oti Faaletino

Ona o le Pau o Atamu, o tagata uma e fananau mai i le lalolagi e oo i ai le oti (tagai i le Mose 6:48). I le oti, e tuueseese ai le agaga o le tagata mai le tino, ma o lo latou agaga e alu i le lalolagi o agaga e faatalitali ai le toetu.

O Le Lalolagi o Agaga: Parataiso ma le Falepuipui o Agaga

Ua vaevaeina le lalolagi o agaga i le parataiso ma le falepuipui o agaga. O tagata o e na papatiso ma tumau faamaoni i lo latou olaga faaletino e o i le parataiso. O se nofoaga lenei o le malologa, filemu, ma le olioli. O Iesu Keriso na asiasi ma aoao agaga i le parataiso i le va o Lona maliu ma le Toetu (tagai i le MF&F 138:18–27).

O tagata lelei o e ua maliliu e aunoa ma le malamalama o le talalelei e o i le falepuipui o agaga. O iinei foi e o i ai i latou o e na le usitai ma amioleaga i o latou olaga faaletino. O agaga amiotonu e aoaoina atu le talalelei i nei tagata, ona i ai lea o le avanoa latou te talia ai le talalelei ma salamo (tagai i le MF&F 138:28–37). A leai se tino, e ui i lea, latou te le mafai ona papatiso pe auai i isi sauniga e manaomia e maua ai le ola e faavavau. (Tagai Alema 40:14.)

Sauniga Sui

O le mea e lelei ai, o le Tama Faalelagi e alofa mutimutivale, alofa, ma amiotonu, ina Ia maua ai se auala mo Ana fanau uma ina ia faaolaina. O le taimi lea e mafai ona e fesoasoani ai. Pe a e faia sauniga sui mo tagata, latou te maua le avanoa e talia ai nei sauniga. E mafai ona e faia mo i latou mea e le mafai ona latou faia mo i latou lava i lo latou ala i le ola e faavavau. O nei agaga ua salamo e mafai ona “togiolaina, e ala i le usiusitai i sauniga o le maota o le Atua” (MF&F 138:58; tagai foi i le fuaiupu 59). Ma e mafai ona e maua le olioli tele lea e oo mai i le fesoasoani atu i se tasi i le falepuipui o agaga e maua nei sauniga e manaomia.

Toetu

E ala i le Toetu o Iesu Keriso, o tagata uma e fananau mai i le lalolagi o le a faatoilaloina le oti faaletino ma o le a toetutu (tagai i le 1 Korinito 15:22). Na aoao mai Iesu, “Ou te ola au, o le mea lea e ola ai outou” (Ioane 14:19). I le taimi o le Toetu, o agaga o tagata uma o le a toe faatasia ma o latou tino. O lona uiga o tagata uma—i latou o e sa ola i le amioleaga, o i latou o e sa ola amiotonu, ma i latou o e na salamo ma maua sauniga na fai ma sui ina ua mavae le oti.

Faamasinoga

O le taimi lava e toetutu mai ai tagata uma, o le a feiloai tagata taitoatasi ma le Atua ma faamasinoina “e tusa ma a latou galuega” (3 Nifae 27:15), e aofia ai lo latou taliaina o sauniga (tagai 3 Nifae 27:16–20). Na o i latou o e na mauaina ia sauniga o le talalelei (pe i le tagata pe e ala i galuega o le malumalu) ma tausia feagaiga e o faatasi ma na sauniga o le a maua le ola e faavavau.

Ona o oe o se tagata soifua, ma o se tagata agavaa e umia se pepa faataga o le malumalu, e te maua le avanoa maoae ma le tiutetauave e fesoasoani i ou uso-a-fanau a le Atua i luga o lo latou ala i le ola e faavavau. O oe o se vaega tutotonu o le fuafuaga a le Atua.