Lagonaina o le Agaga o le Inisitituti
E alala le tusitala i Kolomupia.
O nisi taimi o le siosiomaga le lelei o le iunivesite na mamafatu ia te au. Ao ou lagonaina le siosiomaga i le inisitituti, sa ou iloaina sa le tuuatoatasi au.
Ina ua ou amata i le kolisi, sa ou fiafia e avea o se vaega o le siosiomaga o le aoga ma vaaia le naunautai o au uo. Faafetai i lo‘u Tama oi le Lagi, o le tupe Faaagaga mo Aoga, ma le lagolago a lo’u aiga, sa amata ona faataunuuina ai la‘u miti.
I le taimi o vaiaso muamua o vasega, sa ou iloa ai le galue malosi na faatalitali mai ia te au i le isi lima tausaga o le a sosoo ai: o meaaoga, suega pupuu, suega tetele, ma galuega faatino. Sa amata ona ou fiafia i la‘u filifiliga o le galuega ma la’u kolisi, ae sa ou iloa foi seia oo i le taimi lena na ou ola i totonu o se puta feula. Sa ou vaai manino lava sa ou ese mai isi tamaiti o le kolisi. Latou te faalogologo i musika ma faaupuga mataga, ma sa matele a latou talanoaga i le avea ai ma e lē mama, faaaogaina o fualaau faasaina, ma le inuina o le ava malosi i le faaiuga o vaiaso.
Na valaaulia au e a‘u uo i le vasega i le tele o taimi e auai faatasi ma i latou i a latou gaoioiga i le faaiuga o vaiaso. Ina ua uma ona ou faamalamalama atu ou tulaga faatonuina ma la‘u lotu, e toatele na faaaloalogia o’u lagona ma le toe finau mai ou te auai faatasi ma i latou, ae sa sili atu ona toatele na tauemuina o‘u talitonuga. Sa ou taumafai e le ano i nei manatu, ae sa ou mafaufau, “Pe mafai ona ou ola faatasi ma lenei mea i taimi uma?” Sa ou tatalo e le aunoa ina ia maua le malosi ma aua le lagonaina le tuuatoatasi. Ae ou te le‘i lagonaina na tali mai nei tatalo. Ona ou iloa lea o mea o loo siomia ai au i le iunivesite o le a le suia lava. E ui ina sa ou i ai i le iunivesite, sa faaauau pea ona ou auai atu i Tamaitai Talavou, lea sa ou aoao ai e uiga i le inisitituti i se tasi aso Sa i le sauniga faamanatuga. Sa ou filifili e alu i le inisitituti i le aso Lulu e sosoo ai e fai atu sau fesili sa i ai e uiga i le tupe Faaagaga mo Aoga.
Ina ua mavae se aso umi o le pisi i le iunivesite, sa ou agai atu loa i le inisitituti. Sa ou oso i luga o le taavale mo tagata lautele, nofo i lalo, ma amata ona faitau le mataupu na sosoo ai mo meaaoga i le fale. Sa ou manava loloa, sa manaomia se malologa, ma tepa ae i luga, ae vaaia loa se mea le talafeagai o loo tupu i ou autafa. I lo‘u nofoaga e nofo ai, na ou aluese ma savali atu i le inisitituti, ma mafaufau loloto i le meaaoga sa manaomia ona faafoi i le aso e sosoo ai.
E ui ina sa ou ola ai i tulaga faatonuina o le talalelei, o le siosiomaga o le iunivesite sa mamafatu ia te au a o ou ulu atu i le fale o le inisitituti. Sa ou savali atu ma vaai i tamaiti aoga talavou matutua o le kolisi o laei talafeagai ma faalogo ia te i latou o tautatala ma le faaaloalo le tasi i le isi. O a kosi o le a latou avea i lenei semesa? O Le Mataupu Faavae ma Feagaiga? O Le Tusi a Mamona? Sauniuniga mo Faifeautalai?
Sa ou faalatalata atu i le failautusi, mauaina le tali i le fesili na ou alu atu e fai atu, ma liliu o le a aluese. I talaane o le faitotoa agai i fafo sa ou faliu, ma lagonaina le siosiomaga o le inisitituti. Sa ou alu i fafo o le faitotoa, ma loimata sa faatumulia ai o‘u mata a o ou lagonaina le olioli maoae. Sa ou toe foi i lou fale i le taavale mo tagata lautele, ma le tagi ma ataata. Na oo mai ia te au se manatu e le mafaagaloina: Sa lei tuua na o au.
I lena taimi, sa ou maua ai le tali i au tatalo. Sa ou lagonaina le Agaga, mafaufau e uiga i lo‘u aafiaga, ma sa ou faafetai atu i lo’u Tama Faalelagi mo le olioli o le talitonu i le talalelei.
Ina ua ou taunuu i le fale, sa ou fusiina lou tina ma tau atu i ai e uiga i lo‘u aafiaga matagofie o le lagonaina o le alofa o le Atua. Sa Ia le tuua lava au, ma sa faatasi pea ma au, e pei ona Ia faatasi ma i tatou taitoatasi pe a tatou matuai manaomia lava o Ia. Sa ou auai i le inisitituti i lo‘u taimi atoa i le kolisi ma feiloai i le toatele o tagata o e o loo tumau pea ona avea ma au uo lelei. Ae o Iesu Keriso o lo tatou faapogai sili ona lelei o le alofa ma le lagolago, ma Na te le tuua lava i tatou na o i tatou.