Laau o Peri Uliuli
Rhiannon Gainor, Kalefonia, ISA
Ata na tusia e Stan Fellows
E tutupu laau o peri uliuli e pei o vao i le talafatai i sisifo o Kanata. E totogo mai laau ma tutupu ae i soo se mea ma e faatumulia ai mea uma e mafai ona oo atu i ai—laufanua, auala savali, auala, ma o matafaga e laina ai laau o peri uliuli. I le tautotogo o tuaoi e galulue faatasi e piki peri uliuli e faaaoga i o latou aiga.
A o ou auai i le pikiina o peri uliuli i se tasi tausaga, sa ou naunau e le gata o le a ou pikiina ia lava e faia siamu mo a‘u ma lo’u aiga, ae ou te faia foi ni siamu faaopoopo e tuuina atu i uso ou te asia. O le nofoaga e sili ona lelei e piki ai peri uliuli i lo matou pitonuu o lalo i le aoga maualalo, lea e ufitia ai auala ma laufanua i laina o peri uliuli lavelave e oo atu i le valu futu (2.4 m) le maualuluga. Ua uma ona ou pikiina iina i le vaiaso na muamua atu, ma sa ou iloa e toatele isi na i ai foi, o lea sa foliga mai o le a le tele naua ni fua o totoe.
A o ou sauni e toe piki peri, sa ou manatu o le a ou taumafai e piki i se isi nofoaga. Mai lo‘u faamalama i le umukuka sa ou iloa atu ai se fanua avanoa i autafa o le auala. E tau le o lava nisi iina, ma o laau na sosolo atoa i le ova ma le eka o le fanua. E mautinoa lava o le a tele fua i le mea sa lei pikiina e nisi. Na ou tuu au pakete i tua o le taavale ma agai atu i luga.
E lei umi ae ou vevela, maosiosia, ma le le mautonu a o ou tu i le ogatotonu o le eka o lavelave matuituia. O laau sa le fua, tumu i pona matuituia ae aunoa ma se fugalaau po o se fua. Sa ou mauaina na o le tolu lava peri i lena laueleele atoa, ma ou te lei malamalama pe aisea. O au fagu siamu, e ui i lea, sa manaomia pea ina ia faatumulia, o lea sa ou agai atu ai i le aoga e vaai pe o totoe ni fua iina.
Ina ua ou taunuu atu i fanua o le aoga, sa ou maua le sili atu o peri nai lo le mea sa ou manaomia ma le sili atu o lae lava e pula, e ui lava ina toatele tagata ua uma ona piki iina. Na faafuasei lava ona ou iloaina le mea na tupu: o laau o peri uliuli e fua tele mai pe a piki e tagata o latou fua. Talu ai sa faaaoga uma e lo matou pitonuu lenei vaega mo le tele o tausaga, na tali mai laau i le fua mai i lea tausaga ma lea tausaga. O laau sa le‘i faaaogaina, sa latou tumau i le matutu ma leai ni fua. E ala i le faasoaina atu o lena vaega o peri uliuli i le tele o tausaga, na foafoaina e i tatou le tele o fua—sa i ai fua e sili atu nai lo fua tatou te manaomia uma lava.
Sa faamanatu mai e lenei aafiaga le auala e faagalue ai le sefuluai ma taulaga anapogi. Ua folafola mai le Alii ia i tatou pe a tatou totogiina le sefuluai, o le a Ia tatala “mai ia te [i tatou] pupuni o le lagi, ma sasaa mai ia te i [tatou] se manuia o le a leai se avanoa e lava e teu ai.” (3 Nifae 24:10). I le faasoaina atu mea ua tatou maua e ala i le polokalama musuia a le Ekalesia, tatou te fatu faaletino ma le faaleagaga tele mo lo tatou aiga, o tatou nuu, ma i tatou lava.