O Le Mauaina o le Malamalamaaga o le Talalelei e ala i le Tulaga Faatina
E alaala le tusitala i Iuta, ISA.
O le tulaga faatina e mafai ona tuuina mai ia i tatou ni avanoa tulaga ese e aoao ai e uiga i mataupu faavae a le Alii e ala i le Agaga.
Soo se tina e silafia o le puleaina o le taimi e tele le suiga ina ua maua fanau i le aiga. I le toe aoaoina o le auala e pulea ai lou taimi faatasi ma tamaiti laiti e toafa, sa ou oo i taimi o le lotovaivai—ae maise lava pe a oo mai i le suesueina o le talalelei. E faigata ona faatulaga le taimi o suesuega i tusitusiga paia ma ia mautinoa lona aoga. Ae o ni nai aafiaga na aoaoina ai au e pei ona ou usiusitai ma le agaga tatalo, o le a aoaoina e le Alii au i isi auala.
O Lo Tatou Matua Faalelagi
O se tasi aso a o fai lau auli, na amata ai ona tagi Claire e tasi tausaga i lona moega. Ua oo i lona taimi moe, ma sa ou iloa pe a vave ona ou tuuina ia te ia se palasitika e susu ai, o le a vave ona toe moe. Sa taalo Lusi e tolu tausaga le matua i le potu lea sa fai ai lau auli. Sa ou taumanatunatu mo se taimi ona filifili lea e faaola pea le auli, i le iloaina o le a ou aluese mai le potu mo na o ni nai minute. “Lusi, ua e vaai atu i lena auli i luga o la‘u laulau umi?” Sa ou fesili atu ai. “E vevela TELE. E tatau ona ou tuuina atu ia Claire lana palasitika e susu ai. Faamolemole aua nei pai atu i le auli a o ou alu ese atu, aua o le a faatiga ia te oe.”
Sa ou mautinoa ua malamalama Lusi, o lea sa ou me‘i vave atu ai mai le potu. Sa ou toe foi i se taimi mulimuli ane, ma sa ou faalogoina se masusu mai tua o se nofoa.
“Lusi?” Sa ou fesili atu ai. “O fea oe?”
E lei tali mai o ia.
“O a mai oe? Aisea ua e lafi ai?”
Sa ou savali atu i tua atu o le nofoa ma nofo i luga o le fola. Sa pupuni ona foliga i ona lima. Ina ua mavae ni nai musu e ta‘u mai ia te au le mea na tupu, sa ia fai mai loa mulimuli ane, “Tina, sa ou tago i lau auli.”
I le taimi muamua sa ou le mautonu ona na te lei faalogo i lo‘u lapataiga. Ona ou lagona lea o le loto nutimomoia ona ua lafi o ia mai ia te au ina ua uma ona faia se mea sese laitiiti, i le fefe nei ia le toe maua lo‘u alofa ma le mautinoa. Sa ou iloaina sa leai sona malosi e aveese ai le tiga, ma na o au e mafai ona ou fesoasoani i lona tamatamailima na mu e feololo ai le tiga. Sa ou faamafanafanaina Lusi, ma ao ou ave faanatinati atu o ia i le pesini o le faletaele e tau faatea le tiga, sa musumusu mai le Agaga i lo‘u loto: “E faapena le lagona o le Tama Faalelagi pe a le faalogo Ana fanau i Ana lapataiga ma le faatagaina o Ia i le faamāmāina o latou tiga pe a sili ona latou manaomiaina.” I lena taimi sa ou lagonaina se olioli i lenei malamalama ma le mautinoa i le naunautai o le Alii e aoaoina au.
Alofa Mama Aiai
I ni nai tausaga mulimuli ane sa valaauina ai a‘u e avea ma se fesoasoani i le au peresitene o le Aualofa a la’u uarota. Sa ou lagona le le agavaa e faataunuu lenei valaauga. Sa amata ona ou suesue le mataupu faavae o le alofa mama. Sa ou tatalo e atiina ae atili le alofa mama faaKeriso mo uso na ou auauna atu i ai. Ae sa ou le mautinoa lava pe faapei lenei meaalofa faaleagaga i lona vaaiga po o le lagona foi.
Sa mamafatu lo‘u popole i lo’u mafaufau a o faia le taumafataga o le aoauli i se tasi aso. O la‘u tama teine lona tolu, o Annie, sa nofonofo i le ogatotonu o lo matou faasitepu, ma gaua’i atu i lana vaaiga faalemafaufau o le lua tausaga le matua. Sa ou matamata a o punou ifo o ia i luma e pue atu lana meataalo, na le paleni o ia, ma pau ai i lalo o faasitepu e fa pe lima. Sa ou tamoe atu ia te ia ma taumafai e faatoafilemu o ia ao tagi. Sa ou faafilemuina o ia ma faalogo ai i se tamai tagi lotulotu mai le laulau i le umukuka. Sa ou tilotilo atu ma vaaia le lima tausaga o Claire o tagi.
“Sau ii.” Na ou fai atu ai. “O le a se mea ua tupu?”
Sa tamoe mai o ia ma matou feopoai faatasi ma Annie i se opo faaleaiga. Sa i ai i upu sa ia fai mai se tali tuusa‘o i la’u fesili ma le agaga tatalo e uiga i le alofa mama.
“Sa ou vaaia Annie ua amata ona pau, ona ou vaai atu ia te ia ma iloa ai lona faanoanoa,” o lana tala lea. “Sa sili ai lou pau i lalo o le faasitepu mo Annie nai lo le vaai ia te ia ua pau i lalo.”
Sa vave ona oo mai le manatu i lo‘u mafaufau e ala i le Agaga, “O le alofa mama lena.”
Tuputupu ae i le Faatuatua
Talu ai lava, na aoao ai e lo‘u toalua le ma fanau i le tala ia Mose. Sa ou fai atu, “Ou te manatu o le faatuatua o le tina o Mose e maoae lava! Sa ia auina atu o ia i lalo o le vaitafe ma tatalo i le Tama Faalelagi e tausia saogalemu o ia. E mafai ona e vaai faalemafaufau i le tele o le faatuatua na mafai ai e ia ona faalagolago i le Tama Faalelagi mo lana pepe?”
Na fesili mai Lusi, “Tina, pe o i ai ia oe lena faatuatua tele?”
O se fesili loloto tele. Sa ou mafaufau i ai mo sina taimi ona faasoa atu lea o ni nai aafiaga sa oo i ai pe a ou faalagolago ma le manuia i le Alii ma le faatuatua. Sa faagaeetia le talanoaga na sosoo ai mo le aiga atoa. O lana fesili e oo mai i lo‘u mafaufau i taimi uma. O se faamalosiauga le iloa e mafai ona ou maua le faatuatua e pei o le tina o Mose.
A o ou savali i le faatuatua, ole atu i le tatalo, ma suesue ma le usiusitai, e faaaoga e le Alii o‘u aafiaga o se tina e aoao ai au i Lana aoaoga faavae e ala i le Agaga. Na te aoaoina au i le tele o taimi, e tusa lava po o le utiuti o le taimi o le tulaga faamatua.