Savali a le Au Peresitene Sili
“Faaaoao ia te A’u”
Saunia e Peresitene Thomas S. Monson
Faamatalaga mai le Tuu Mai Tamaiti Laiti e o Mai ia te Au, saunia e Carl Heinrich Bloch
I Le Ekalesia a Iesu Keriso o le Au Paia o Aso e Gata Ai, o i tatou uma lava o faiaoga ma o i tatou uma lava o tagata aoao. E oo mai lenei valaaulia malu mai lo tatou Alii i tagata uma lava: “Faaaoao ia te au … ona maua lea e outou le malologa mo o outou agaga.”1
Ou te valaaulia uma le Au Paia o Aso e Gata Ai e mafaufau loloto i a latou taumafaiga e aoao atu ma aoao mai ma vaai atu i le Faaola o lo tatou Taiala i le faia o lena mea. Ua tatou iloa o lenei “aoao ua maliu mai mai le Atua”2 sa sili atu nai lo na o se faiaoga. O Ia na aoaoina i tatou e alofa i le Alii lo tatou Atua ma o tatou loto atoa, o tatou agaga atoa, lo tatou malosi atoa, ma o tatou mafaufau atoa, ma alofa i o tatou tuaoi e pei o i tatou lava, o le Faiaoga Sili ma le Faataitaiga o le olaga atoatoa.
O Ia lea na tautino mai: “Sau, mulimuli mai ia te au.”3 “Ua ou faatuina se faataitaiga mo outou.”4
Vagana ua Outou Liua
Na aoao mai e Iesu se upumoni faigofie ae loloto o loo tusia i le Mataio. Ina ua malaga o Ia ma Ona soo na alu ifo mai le Mauga o Liua, latou te malolo i Kalilaia ma ona alu lea i Kapanaumi. Sa oo mai le au soo ia Iesu, ma fesili atu:
“O ai ea e sili i le malo o le lagi?
“Ona valaau ai lea o Iesu i le tama itiiti, ua faatu ia te ia i o latou luma,
“Ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi.”5
I le Ekalesia, o le sini o le aoao atu o le talalelei e le o le sasaa atu o faamatalaga i mafaufau o le fanau a le Atua, pe i le fale, i le potuaoga, po o le galuega faamisiona. E le o le faaali atu e silafia le tele o mea e le matua, faiaoga, po o le faifeautalai. Pe le na ona faateleina o le malamalama e uiga i le Faaola ma Lana Ekalesia.
O le sini autu o le aoao atu o le fesoasoani lea i atalii ma afafine o le Tama Faalelagi e toe foi atu i Lona afioaga ma olioli i le ola e faavavau faatasi ma Ia. Ina ia faia lenei mea, o le aoaoina atu o le talalelei e tatau ona uunaia ai i latou i le ala o le avea ai ma soo i aso taitasi ma feagaiga paia. O le faamoemoega ia musuia tagata e mafaufau, lagona, ona fai lea o se mea e uiga i le ola ai i mataupu faavae o le talalelei. O le faamoemoega o le atiina ae o le faatuatua i le Alii o Iesu Keriso ma ia liliu i Lana talalelei.
O le aoao atu lea e faamanuiaina ai ma liliu ai ma faasaoina ai o le aoao atu lea e mulimuli i le faataitaiga a le Faaola. O faiaoga e mulimuli i le faataitaiga a le Faaola e alolofa ma auauna ia i latou o loo latou aoaoina. Latou te musuia a latou tagata faalogologo i lesona e faavavau o le upu moni paia. Latou te ola i olaga e aoga le mulimuli ai.
Alofa ma Auauna atu
O le galuega atoa a le Faaola na faaalia ai le alofa i le tuaoi. E moni lava, o Lona alofa ma le auaunaga sa masani ona avea ma Ana lesona. E faapena foi, o faiaoga e sili ona ou manatua o faiaoga na iloa, alolofa, ma popole e uiga i a latou tamaiti aoga. Na latou sailia mamoe na leiloloa. Sa latou aoaoina lesona o le olaga o le a ou manatua pea.
O se tasi o na ituaiga faiaoga o Lucy Gertsch. Sa ia iloaina ana tamaiti aoga taitasi. Sa ia valaau pea lava pea ia i latou o e le o mai i se aso Sa pe na le‘i o mai. Sa matou iloa sa ia popole mo i matou. E leai se tasi o i matou na faagaloina o ia po o lesona sa ia aoaoina.
I le tele o tausaga mulimuli ane, ina ua toeitiiti maliu Lusi, sa ou asiasi atu ai ia te ia. Sa ma toe faamanatu na aso ua leva ao avea o ia ma o matou faiaoga. Sa ma talanoa e uiga i tagata taitoatasi o la matou vasega ma talanoaina mea a i latou taitoatasi o loo fai nei. O lona alofa ma le popole na aofia ai se olaga atoa.
Ou te fiafia i le faatonuga a le Alii i le Mataupu Faavae ma Feagaiga:
“Ou te tuu atu ia te outou se poloaiga ia outou aoao i le tasi mataupu faavae o le malo.
“Ia outou aoao atu ma le filiga ma o le a i ai lou alofa tunoa ia te outou.”6
Sa aoao atu ma le filiga Lucy Gertsch ona sa alofa o ia ma le le vaivai.
Ofo atu le Faamoemoe ma le Upumoni
Na saunoa mai le Aposetolo o Peteru e faapea: “Ia saunia pea lava outou e tali atu ma le agamalu ma le mata’u ia i latou uma o e fesili mai ia te outou i le uiga o le faamoemoe o loo ia te outou.”7
Atonu o le faamoemoe sili o se faiaoga e mafai ona ofoina atu o loo maua i upumoni o le talalelei a Iesu Keriso.
“Ma o le a le mea tou te faamoemoe i ai? O le fesili lea a Mamona. “Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga.8
Faiaoga, ia sii i luga o outou leo ma molimau atu i le natura moni o le Aiga Atua. Tautino atu lau molimau e faatatau i le Tusi a Mamona. Faailoa atu upumoni mamalu ma matagofie o loo i ai i le fuafuaga o le faaolataga. Faaaoga mea ua faamaonia e le Ekalesia, ae maise lava tusitusiga paia, e aoao atu ai upumoni o le talalelei toefuataiina a Iesu Keriso i lo latou mama a’ia’i ma le faigofie. Manatua le faatonuga a le Faaola ia “suesue outou i tusi; aua ua outou manatu tou te maua ai le ola e faavavau: o tusi foi ia o loo molimau ia te a’u.”9
Fesoasoani i fanau a le Atua ina ia malamalama i le mea e taua ma faamaoni i lenei olaga. Fesoasoani ia i latou e atiina ae le malosi e filifili ai ala o le a tausia ma le saogalemu i latou i luga o le ala i le ola e faavavau.
Aoao atu upu moni, ma o le Agaga Paia o le a auai i au taumafaiga.
“Faaaoao ia te A’u”
Ona o Iesu Keriso sa atoatoa le usiusitai ma le gauai i Lona Tama, na “tupu le poto ma le tino o Iesu, ua alofagia o Ia e le Atua atoa ma tagata.”10 Pe tatou te naunautai e faia faapea? E pei lava o Iesu “sa maua e Ia le alofa tunoa mo le alofa tunoa,”11 e tatau ona tatou onosai ma faifai pea le saili o le malamalama ma le poto mai le Atua i a tatou taumafaiga e aoaoina le talalelei.
O le faalogo o se elemene taua lea o le aoaoina. Pe a saunia e aoaoina, tatou te saili ma le loto tatalo musumusuga ma le faamaoniga mai le Agaga Paia. Tatou te mafaufau loloto, tatou te tatalo, tatou te faaaogaina lesona o le talalelei, ma tatou te sailia le finagalo o le Tama mo i tatou.12
O Iesu “e tele mea na aoao atu ai … i faataoto,”13 lea e manaomia ai taliga e faalogo, mata e vaai, ma loto ia malamalama. A o tatou ola agavaa, e mafai ona sili atu ona tatou faalogo i musumusuga a le Agaga Paia, lea e mafai ona “aoao [tatou] i mea uma, e faamanatu mai foi o ia ia i [tatou] i mea uma.”14
Pe a tatou tali atu i le valaaulia agamalu a le Alii, “Faaaoao ia te au,” e avea i tatou ma e ua tofusia i Lona mana paia. Sei o tatou, o le mea lea, ia agai i luma i le agaga o le usiusitai, mulimuli i lo tatou Faataitaiga e ala i le aoao atu e pei ona finagalo o Ia ia tatou aoao atu ma aoaoina e pei ona finagalo o Ia ia tatou aoaoina.