Ia E Fesoasoani Mai i Lou Le Faatuatua

Stephanie Hughes, Texas, ISA

O le tasi faaiuga o le vaiaso sa ou ala ae i luga ma sa le mafai ona ou faalogo i lo‘u taliga tauagavale. Sa ou valaau atu i se fomai taliga, isu, ma le fa’a’i mo se taimi faatulagaina.

Na auina vave au e le fomai i se fomai faapitoa o taliga mo se suega o le faalogo. Sa amata ona ou popole ina ua le mafai ona ou faalogo i soo se tasi o leo o le suega i lo‘u taliga tauagavale. I le faaiuga o le suega, na fai le faaiuga a le fomai taliga o au ua leaga ou uaua e faalogo ai, o lona uiga ua faaleagaina se uaua o le ulu e faaaoga i le faalogo.

Sa ou tei. Sa na o le 26 tausaga le matua ae o lea ua talanoaina le manaomia o se fesoasoani i le faalogo. O se tasi o o‘u faanaunauga sili o le musika. Pe o le a ou mafai pea ona taina au mea faimusika ma pese?

Na tusi mai e le fomai se fualaau malosi e vaai pe o le a fesoasoani, ae sa mautinoa lava e ia sa tumau le leaga o la‘u faalogo.

E lei umi ae le mafai ona taofiofia ou lagona, ma sa faatumuina ou mata i loimata. Sa ou fefe i se mea o le a aumaia e le lumanai, ma sa ou faanoanoa o le a le mafai ona ou toe faalogo e pei ona masani ai.

O le po lena na fautua mai ai lo‘u toalua, o Brian, o le a ia tuuina mai ia te au se faamanuiaga faaleperisitua. Sa ou faamoemoe o le faamanuiaga o le a tuu mai ai ia te au le mafanafana ma le malosi e taulima ai le leaga o la‘u faalogo, ae nai lo lena na folafola mai e Brian i lana faamanuiaga o lau faalogo o le a toefuataiina i le atoatoa. Sa le mafai ona ou talitonu i ai.

“Masalo o lo‘u toalua ua faaseseina,” sa ou mafaufau ai. Sa vaai le fomai i le tele o tulaga e pei o au ma fai mai o lau faalogo o le a le toe foi mai.

Mulimuli ane, sa ou fesili ia Brian pe sa manatu o le faamanuiaga folafolaina o lona manatu po o le finagalo o le Alii. Sa fai mai Brian sa ia lagonaina se uunaiga malosi e faia ai le folafolaga. Sa ou le talitonu pea.

A o ou mafaufau loloto i lo‘u tulaga, na ou manatuaina se mau i le tusi a Mareko lea na tau atu ai e Iesu i se tama atuatuvale “e mafaia mea uma lava i le faatuatua.” Na tali mai le tama, “Le Alii e, ua ou faatuatua; ia e fesoasoani i lou le faatuatua” (Mareko 9:23–24). O la‘u tatalo lenei i lo’u Tama Faalelagi i lena po. Sa ou manao ou te talitonu o le a faamaloloina au, ae sa ou le mautinoa. Sa leai sou faatuatua o le a fesoasoani mai le Alii ia te au i lo‘u faafitauli.

Ina ua uma la‘u tatalo sa ou mafaufau i se lesona sa ou aoaoina ai tamaitai talavou e uiga i le mana o faamanuiaga o le perisitua. Sa ou ta‘u atu i le vasega e fesili atu mo ni faamanuiaga ma e mafai e le Alii ona faamalolo i e mamai e ala i faamanuiaga. E faapefea ona mafai ona ou faamoemoe ia i latou e talitonu ia te au pe afai sa leai sou faatuatua? Sa ou filifili e tuu atu loʼu faalagolago i le Alii—sa lei pepelo muamua o Ia ia te au.

I le lua vaiaso mulimuli ane, sa toe atoatoa la‘u faalogo. Sa faateia le fomai taliga ma le fomai.

O le a faavavau ona ou faafetai i le Tama Faalelagi o le na toefuatai mai la‘u faalogo, ae e sili atu ona ou faafetai mo le lesona sa ou aoaoina. E tusa lava pe e le o taimi uma i le ala ua folafola mai i se faamanuiaga, ou te iloa o le a faamanuiaina e le Alii i tatou pe afai tatou te faatino lo tatou faatuatua ma faalagolago ia te Ia.