7 Mea Tatou Te Fefefe ai e Uiga i le Salamo

Ma Pe Aisea e Le Tatau Ai [Ona Tatou Fefefe]

Saunia e David A. Edwards

Mekasini a le Ekalesia

E masani ona tatou fefefe e salamo. Ae e mafai ona tatou maua le lototele i le upumoni.

Ua tatou iloa uma e manaomia e tagata uma le salamo (tagai i le Roma 3:23). Ua tatou iloa e tatau ona tatou salamo ina ia mafai ona maua le olioli moni e ala i le mana o le taulaga togiola a Iesu Keriso (tagai i le Alema 36:24). Ua tatou iloa foi o le tolopoina o le salamo o se manatu leaga (tagai i le Alema 34:32–34). Ae o le toatele o i tatou e faia lava lena mea. Aisea? Ua sili atu lo tatou iloa, a ea?

E tasi se tali faigofie o le fefe. Pe ua tatou faia se agasala matuia e tatau ona tatou tautau atu i lo tatou epikopo po o ua ia i tatou nisi mausa, uiga, po o amioga laiti na e taofia ai i tatou mai le tuuto atoatoa atu i le talalelei a le Alii ma ona tulaga faatonuina, o le fefe e mafai ona taofia ai i tatou mai le faia o le mea e tatau ona tatou faia e suia ai o tatou olaga.

O ni fefe nei e fitu e mafai ona mafua ai ona tatou tolopoina le salamo, faapea foi ma nisi o manatu ma aoaoga e mafai ona fesoasoani ia i tatou e maua ai le lototetele ma faia mea ua tatou iloa o le a aumaia ai ia i tatou le filemu ma le fiafia.

1. Fefe i le Maasiasi

Afai ou te tau atu i lou epikopo le mea ua ou faia, o le a ia matua le fiafia—ma o le a ou matuai maasiasi lava. Ae faapefea pe afai e tatau ona ou tau atu i ou matua? Ae faapefea pe afai e iloa e isi?

E i ai mea e sili atu ona leaga nai lo le maasiasi, e pei o le avega faaleagaga o le agasala e lei faaleleia ma le leai o se mafutaga a le Agaga Paia. Soo se lagona o le maasiasi e te mauaina i le tautauina atu i lou epikopo o le a tumau mo na o sina minute laitiiti ona tafiesea atoatoa ai lea e se galu o le faamama avega ma le olioli. Soo se tasi na tautau atu se sese i lo latou epikopo e mafai ona faamaonia lenei mea.

“Ou te folafola atu ia te oe o le a le tausalaina oe [e le epikopo]. I le avea ai ma se auauna a le Alii, o le a ia agalelei ma malamalama ao ia faalogo atu ia te oe. Ona ia fesoasoani atu ai lea ia te oe i le faagasologa o le salamo. O ia o le avefeau o le alofa tunoa o le Alii e fesoasoani ia te oe ina ia mama e ala i le Togiola a Iesu Keriso.”

Elder C. Scott Grow o le Fitugafulu, “Aisea ae O a foi Mea e Tatau ona Ta’uta’u Atu i Lo’u Epikopo?” Liahona, Oke. 2013, 59.

2. Fefe i Taunuuga

Pe a ou tau atu i lou epikopo e uiga i au agasala, atonu e i ai ni taunuuga—o le le tagofia o le faamanatuga, o le le faamanuiaina po o le tufaina o le faamanatuga, o le lē alu i se misiona pe afai ou te manao ai. O le a lavelave tele ai lou olaga.

Ia manatua o taunuuga lelei o le salamo e sili mamao atu i mea e foliga mai o ni taunuuga le lelei. Taulai atu i mea lelei ua folafola mai e le Alii ia i latou e tautau atu ma salamo.

“O le mea moni faapea e mafai ona tatou salamo o le tala fiafia lea o le talalelei! E mafai ona tafi esea lagona nofosala. E mafai ona faatumulia i tatou i le olioli, maua se faamagaloga o a tatou agasala, ma maua le filemu o le mafaufau. E mafai ona tatou saoloto ai mai lagona o le faanoanoa ma le pologa o le agasala.”

Elder Dale G. Renlund o le Korama a Aposetolo e Toasefululua, “Salamo: o se Filifiliga Fiafia,” Liahona, Nov. 2016, 124.

“Afai ua e agasala, o le vave ona e salamo, o le vave foi lena ona e amata maua lou auala e toe foi mai ai ma maua le filemu ma le olioli lena e o mai faatasi ma le faamagaloga.”

Mo Le Malosi o le Autalavou (tamaitusi, 2011), 28.

3. Fefe i le Taumafaiga

O le faia o ituaiga o suiga e tatau ona ou faia e foliga mai ua matua faigata lava. E mafai foi ona faaaluina se taimi umi tele.

Soo se mea e aoga e manaomia ai le taumafaiga. O le faamagaloga, filemu, ma le tuputupu ae faaleagaga o nisi ia o mea e aupito sili ona aoga e mafai ona mafaufauina.

“O le salamo o lona uiga o le taumafai ia sui. O se aamu i puapuaga o le Faaola i le Faatoaga o Ketesemane ma i luga o le satauro mo i tatou le faamoemoe faapea e tatau ona Ia liuaina i tatou i ni tagata amiotonu e aunoa ma sa tatou taumafaiga moni mo i tatou lava. Nai lo lena, ia tatou saili atu i Lona alofa tunoa e faaatoatoa ai ma tauia ai a tatou taumafaiga e sili ona filiga (tagai i le 2 Nifae 25:23). Atonu e pei lava ona tatou tatalo mo le alofa tunoa, e tatau ona tatou tatalo mo le taimi ma le avanoa e galue ai ma taumafai ma faatoilaloina le agasala.”

Elder D. Todd Christofferson, “O Le Meaalofa Faalelagi o le Salamo,” Liahona, Nov. 2011, 40.

4. Fefe i le Faaleagaina o le Vaaiga Faaletagata

O au o se tasi o “tamaiti lelei.” Afai ou te tautino atu ua ou faia ni mea sese, ua uma—e le toe avea au ma se “tamaitiiti lelei”. O le a se mea o le a avea ai au? O ai o le a avea ai au? E sili ai lou taumafai e faagaloina ma agai i luma e pei o loo tutusa lava mea uma.

E tatau ona tatou faailoa atu ma le lotomaualalo a tatou agasala i luma o le Atua, ina ia mafai ona Ia “faia lea o mea vaivai ia avea ma mea malolosi” mo i tatou (Eteru 12:27). Ma o le foliga o oe lava e tatau ona e taumafai ia maua ou foliga ia o loo i le Tama Faalelagi ma Iesu Keriso: o le Atua e, e ui ina e atoatoa, ua faamoemoe o le taulaga le iu ma le paia e ala i a Latou fesoasoani.

“E silasila mai le Atua ia i tatou e pei ona tatou i ai moni lava—ma Na te silasila mai ia i tatou e agavaa mo le laveai. …

“… Faatasi ai ma laa taitasi o le faatuatua i luga o le ala o le avea ma soo, tatou te tuputupu ae ai i tagata o le mamalu e faavavau ma le olioli le i’u na mamanuina i tatou e avea ai.

Peresitene Dieter F. Uchtdorf, Fesoasoani Lua i le Au Peresitene Sili, “O Le A Ia Tuu Oe i Luga o Ona Tauau ma Ave Oe i le Aiga,” Liahona, Me 2016, 104.

5. Fefe i le Aveesea O Ou uiga Faaletagata

Afai ou te usitai i tulaga faatonuina o le Ekalesia, o le a ou lafoaia nisi o mea ia o avea ai a’u ma o’u tagata, e pei o au ata tifaga e fiafia i ai, faafiafiaga i le Televise, musika, ma ala e faaalia au lava ia. O le a ou pei lava o isi Mamona. E sili ai ia te au le avea e pei lava o au.

E ala atu i le salamo, e mafai ona e maua ai le Agaga Paia i lou olaga. Ma e ala atu i le Agaga, e mafai ona e iloaina ai se faasinomaga e loloto atu, e sili le moni, ma se tagata e sili atu ona lelei. O le a faavae lea i le tagata e mafai ona avea ai oe i fofoga o le Atua nai lo soo se isi lava mea e fausia i luga o le faavae oneone i mea e fiafia i ai, vaega e filifili ai, o mausa, ma uiga tulagaese.

“E sili atu ia Satani lou faamatalaina o oe lava e ala i au agasala nai lo o lou malosiaga paia. … Aua ne’i faalogo ia te ia.

Peresitene Dieter F. Uchtdorf, “O Faalagiga e Fa,” Liahona, Me 2013, 58.

“E sili atu le eseese o i latou o e e paia tele.

A’o o le agasala, i le tasi itu, nao le tutusa pau e maua ai; e faaitiitia ai i tatou i le faatauvaaina ai o i tatou i amioga faaletuinanau e le mataofia ma uunaiga maualalo.”

Elder Neal A. Maxwell (1926–2004) o le Korama a Aposetolo e Toasefululua, “Salamo,” Liahona, Ian. 1992, 35.

6. Fefe i le Toilalo

Sa ou taumafai e suia i le tele o taimi ae e tumau pea le faia o lea lava mea sese. Atonu ua uma ou avanoa. Atonu o le a le mafai lava ona ou suia. Afai ou te toe taumafai tasi lava ma toilalo, pe o le a le faamaonia ai?

E le faigofie le salamo. E le tatau ona faigofie. Ae o lou auala lea i le olioli, o lea ia tumau ai. E leai se tapulaa i le salamo moni (tagai i le Mosaea 26:30). Na tuuina mai e le Alo o le Atua o Ia lava o se taulaga e le iu ma e faavavau e togiola mo a tatou agasala ina ia mafai ona faamagaloina i tatou pe afai tatou te maua le faatuatua ma salamo (tagai i le Alema 34:9–16). Na e mauaina lena mea? E le iu ma e faavavau. E te le o i tua atu ma tuaoi o Lana Togiola, aua e leai ni ona tuaoi. Taumafai pea.

“O nisi taimi i la tatou salamo, i a tatou taumafaiga i aso taitasi ia avea atili e faapei o Keriso, tatou te iloaina ai i tatou lava ua tauivi pea lava pea ma faafitauli lava e tasi. E pei o loo tatou feaei i se mauga e tumu i laau, i nisi taimi tatou te le vaaia lo tatou alualu i luma seiiloga ua tatou latalata atu i le tumutumu ma toe vaai ifo ai mai tumutumu mauga maualuluga. Aua le lotovaivai. Afai o loo e taumafai ma galue ia salamo, ua e i ai i le faagasologa o le salamo.”

Elder Neil L. Andersen o le Korama a Aposetolo e Toasefululua, “Salamo … Ina ia Ou Faamaloloina Outou,” Liahona, Nov. 2009, 41.

“Faatasi ai ma le meaalofa o le Togiola a Iesu Keriso ma le malosiaga o le lagi e fesoasoani ia i tatou, e mafai ona tatou faaleleia atili, ma o le mea sili e uiga i le talalelei o le tauia o i tatou mo le taumafai,, e tusa lava pe le faamanuiaina i tatou i taimi uma.”

Elder Jeffrey R. Holland o le Korama a Aposetolo e Toasefululua, “O a Taeao e Faia ai e le Alii o Vavega i o Outou Luma,” Liahona, Me 2016, 125–126.

7. Fefe i le Faamanuiaina

Ae faapefea pe afai ou te matuai mafai lava e au ona suia lou olaga? Atonu o le a sili atu ai le tele o mea e faamoemoeina mai ia te au. Atonu e sili atu ona lelei le avea ma tagata sese ma faaleogolua ina ia aua le faamoemoe mai ou te tauaveina nisi tiutetauave.

O le fefe i faamoemoega maualuluga po o tiutetauave e sili atu e mafai ona oo mai ona o le paie po o le le saogalemu. Ae o le fuafuaga a le Tama Faalelagi o se faaleleia atili ma le alualu i luma. Na e taliaina lena fuafuaga ae lei oo mai i lenei olaga; talia fiafia nei loa e ala i le filiga ma le faatuatua. Taumafai e vaai i le ituaiga o tagata e finagalo le Tama Faalelagi ia avea ai oe ma le ituaiga olaga e finagalo o Ia e te mauaina. Afai e mafai ona e vaai moni lava i le tagata o loo i ai lou gafatia e avea ai, o le a matuai faigata lava ona e talitonu i ai. Faatasi ai ma le fesoasoani a le Tama Faalelagi ma le Faaola, ua i ou lima lava.

“O la tatou tiutetauave o le siitia lea mai le faaleogolua i se tagata tauivi, mai le toilalo i le faamanuiaina. O la tatou galuega o le avea ma tagata silisili.

Thomas S. Monson, “The Will Within,” Ensign, Iulai 1987, 68.