Tatalo o le Aso Fanau mo Lou Tama
Ata na tusia e Melissa Manwill
Sa lei ola ae lou tama i se tapuaiga, ma sa oo ina le toaaga le aiga o lou tina a o talavou lou tina. Ae i se tasi aso na lagonaina e lou tina pei sa ia misia se mea, o lea na ia filifili ai e toe foi i le ekalesia sa ia ola ae ai, O Le Ekalesia a Iesu Keriso o le Au Paia o Aso e Gata Ai. Na matou o atu ma ou tuafafine faatasi ma ia. Ae sa le fiafia lou tamā i lo matou auai i le lotu, ma sa tofotofoina ai le mafutaga a ou matua mo se taimi muamua lava.
Sa ou papatiso ina ua valu ou tausaga, ma sa ou aoaoina e mafai ona faatasia aiga e faavavau. O tausaga uma lava i lou aso fanau, sa ou feula ai moligao ma moomoo faalilolilo mo lou tama ia papatiso. Sa ou tatalo ina ia faamaluluina le loto o lou tama. Ina ua mavae le tele o tausaga, sa iu lava ina mafai ona matou fai taumafataga faatasi ma faifeautalai. Ae sa le talanoaina lava le talalelei.
Ona oo lea i se tasi taumafanafana na sau ai lou tamā faatasi ma au i le tolauapiga a Alii Talavou. E ui ina sa le o se tagata o le Ekalesia, sa tofia lou tama e nafa ma se faeasaite! Sa ou fefe, ae sa fesoasoani tagata uma e ala i le auai i le faeasaite. Ona tuuina mai lea e lau uo lana molimau i le tatalo. Sa ia faasoa mai se taimi na fesoasoani ai lou tama i le uso laitiiti o lau uo ma o se tali lea i lana tatalo. Mo le taimi muamua lava, sa ou vaaia le tagi o lou tama. Na ia lagonaina le Agaga.
Ina ua mavae lena malaga, na manao lou tama ina ia aoao atili e uiga i le talalelei ma se naunautaiga fou, ma i se tasi taeao sa ia faasilasila mai ai ua ia manao e papatiso. Sa matou le talitonu!
O le papatisoga o lou tama o se tasi lea o aso sili o lou olaga. Sa faatumulia le falesa i tagata uma na o mai e lagolagoina lou tama, ma sa ou faataitaia le tatalo o le papatisoga pe faaselau ona sa ou matuai fiafia lava. Sa mafai ona ou papatisoina lou tama, ma e le mafai ona ou faamatalaina lagona lofituina sa ou lagonaina a o ou fusiina lou tama i le vai papatisoga.
O le tausaga na sosoo ai na ou faamauina ai ma lou aiga i le malumalu. Ina ua maea le faamauga, ma matou tutu i se lio—o se aiga e faavavau—ma fusi atu i isi faatasi ai ma loimata o le olioli o loo tafe ifo i o matou foliga.
Mai i lenei aafiaga sa ou aoaoina ai e mafai ona faia o soo se mea. Aua le fiu. O le a ou taumafai i le mea sili ou te mafaia ina ia agavaa e faamauina i le malumalu faatasi ma lou aiga i le lumanai.