Na Aoga Lava le Faatalitali
E alala le tusitala i Texas, ISA.
Aisea e le mafai ai ona ou papatiso nei?
“E papatiso pei o Iesu…o le mea lea ou te faia” (Liahona, Oketopa 1999).
“I le aso nei o le a tatou aoao ai se pese fou,” na fofogaina mai e Sister Reid. “E taua ‘Papatisoga.’ Tagata uma ia moeiini ou mata ma faalogologo i le musika.”
Sa ou moeiini ou mata ma lagonaina le mafanafana i lou nofoa. Sa amata ona ta e le ta laau se fati na leo lemu ma le faatausala, pei o se vai o tafe. Ona amata lea ona pese Sister Reid: “O Ioane na ia papatiso, Iesu i Iutaia, sa papatiso i le faatofu, i le Vai o Ioritana.”
Sa ou lagonaina se loimata ua tafe atu i lalo o lou alafau. Sa ou taumafai e soloese a o lei mafai ona vaai mai Tina, ae ua tuai. O Tina o le peresitene o le Peraimeri, ma sa masani ona ia vaaia mea uma lava. Sa ou vaaia Tina o vaai mai ia te au ma ataata ma le faanoanoa. Sa ia iloaina le mea sa ou tagi ai.
Ina ua tuua le lotu, sa hamuina e lou uso laitiiti, o Julie, le pese i le taimi atoa ao tietie atu i le fale. Sa ou nofo filemu.
“Pe e te fia valivali faatasi ma au?” Sa fesili mai ai Julie ina ua matou taunuu i le fale.
Na lulu atu lou ulu. “Atonu o se isi taimi. E i ai sau mea e fai muamua.”
Sa ou maua Tama i le potu malolo. Sa nofo o ia i lona nofoa e fiafia i ai ma se tusi o loo tatala i luga o lona vae. E fiafia o ia e faitau a o matou o ma Julie, ma Tina, i le lotu.
Sa ou manava loloa. “Tama?” Na ou fai atu ai. “E mafai ona ou papatiso?”
Sa tapuni e Tama le tusi ma fai mai ia te au e nofo i ona tafatafa.
“Oi, Sadie. Na ta talanoa e uiga i lenei mea. O la’u tali o le leai lava,“ o lana tala lea.
“Ae ou te manao e papatiso!” Na ou fai atu ai. “Na atoa lou valu tausaga i ni nai masina talu ai, ma sa ou mafaufau lava i ai i le tele o taimi. Ou te iloa e moni le Ekalesia, ma o le umi ou te faatalitali ai, o le tele foi lea o lou iloa ou te manao e papatiso.”
“Na lulu le ulu o Tama. “Ou te manatu lava e te laitiiti tele e faia se faaiuga tele faapea. Ua e iloaina ou te alofa ia te oe.”
“Ua ou iloa,” sa ou fai atu ai. Sa ou iloaina sa manao Tama mo se mea e sili ona lelei mo au. Na te lei manatu sa ou saunia e faia lenei filifiliga.
Sa ou tamoe atu i lou potu ma punou lou ulu. Sa ou tatalo e sili atu le malosi atu nai lo se isi lava taimi muamua. “Tama Faalelagi, ou te matuai manao lava e papatiso. Faamolemole fesoasoani ia Tama ia malamalama.”
I le taimi muamua sa leai se mea na tupu, ae sa ou tumau pea i ou tulivae. Na faasolo mai le fati o le “Papatisoga” i lou mafaufau. Ina ua mavae sina taimi, ou te lei toe lagonaina le faanoanoa tele. Nai lo lena, sa ou lagona le toafilemu i totonu. Sa amata ona ou mafaufau e uiga i mea uma e mafai ona ou faia, e ui lava ina le mafai ona papatisoina lava au.
Ou te mafai ona tatalo pea ma faaauau le alu pea i le Peraimeri. Ou te mafai ona avea ma se faataitaiga mo Julie, ma atonu ou te mafai ona fesili atu ia Tina e anapogi mo au i le vaiaso a sau.
Sa tumau pea le lagona toafilemu ia te au a o ou agai atu i lalo i le taumafataga o le afiafi. Ou te le iloa po o afea, ae o le a i ai se aso o le a ou papatiso ai. Ma o le a aoga le faatalitali.
I le ono masina mulimuli ane, i le toe lua aso oo i lona aso fanau lona iva, na tuuina atu ai e le tama o Sadie ia te ia lana faatagaga e papatiso.