O Le Talalelei ma le Olaga Lelei

Saunia e Elder Quentin L. Cook

O Le Korama a Aposetolo e Toasefululua

Mai se saunoaga i le faigalotu, “The Good Life,” na tuuina atu i le Iunivesite o Polika Iaga–Idaho i le aso 18 o Tesema, 2015. Mo le tusiga atoa i le gagana Peretania, alu i le web.byui.edu/devotionalsandspeeches.

I tulaga e sili ona leaga, pe afai ua faaletonu mea uma lava, o le aiga ma le talalelei a Iesu Keriso e manaomia.

E tele lauga e faamamafa ai le mulimuli pea i miti ma faanaunauga. Ou te faailoaina atu na sini, ae ou te manao e te mafaufau i se faamoemoega sili atu i lou olaga.

Agaga Faafetai mo Faamanuiaga

Ina ia amata, ou te faamoemoe o le a e faafetai mo ou faamanuiaga—ae maise lava o lou talatuu. O le loto faafetai ma le lotomaualalo e fesootai vavalalata lava. Ua tatou ola i se lalolagi o le manatu o le tagata ia te ia lava. O faasalalauga faaleagafesootai, e faapitoa lava, e mafai ona faigofie ona faaaoga mo viiga faaletagata. E lei sili atu lava le taua o le lotofaafetai ma le lotomaualalo. O i latou o e mauaina nei uiga e faailoa atu le loto faafetai mo o latou faamanuiaga a o latou mulimuli i le faataitaiga a le Faaola.

Na matauina e lau uo polofesa i Harvard o Roger B. Porter, o se tagata faamaoni o le Ekalesia, i se tasi o taualumaga amata i Harvard ia Me 2015 faapea o le agaga faafetai “e manaomia ai lo tatou faailoa atu o la tatou aitalafu i isi”, ma “e masani lava ona aofia ai se tali lotomaualalo mo meaalofa e lei galueaiina pe le aloaia foi.” Na ia faaiu mai: “Afai e te filifili e talia le agaga faafetai o se elemene tutotonu o lou olaga, o le a aoga tele ia te oe. O le a fesoasoani ia te oe e aloese ai mai le faaosoosoga e gauai atu i le faamaualuga ma pau atu i se lagona o le aia tatau. O le a fesoasoani e te iloa ai le lelei ma faailoa atu le lelei. O le a fesoasoani e te malamalama ai i puapuaga ma faigata o le a e feagai ai mai lea taimi i lea taimi. O le a fesoasoani e te taulai atu ai ia i latou e le tutusa mea tou te maua ma e mafai ona e faamanuiaina o latou olaga.”¹

Ou te fautua atu faapea tatou te manaomia faapitoa lava le loto faafetai mo lo tatou talatuu. Pe a faamanuiaina i tatou i ni matua lelei, e tatau ona tatou loto faafetai. O le aitalafu lenei o loo nofoaitalafu ai i tatou taitoatasi mo lo tatou talatuu. O se faataoto tuai faa-Saina e faapea, “A e inu i le vai, ia aua nei galo le vaieli na maua mai ai.”

E manino lava mai tusitusiga paia e faapea ia tatou ava i o tatou matua. Ua faapea mai le Faataoto, “Lou atalii e, tausi i poloaiga a lou tama, aua foi e te tuulafoaiina le upu e aoao atu a lou tina” (Faataoto 6:20). Ua aoaoina i tatou e le Efeso “ia e ava i lou tama ma lou tina” (tagai i le Efeso 6:2–3; tagai foi i le Esoto 20:12). Na tuuina mai e le Siamani maoae i mea tau mafaufauga o Goethe i lenei ala, “O mea mai le talatuu o o outou tamā e nonō, galue ia toe mauaina, ia umia moni lava!”² E manino lava le manaomia ona tatou faafetai i o tatou matua ma faia ni faatinoga lelei ia maua ai mea latou te faamoemoe e faaee mai i o tatou luga.

Mataupu Faavae e Faavavau ma Filosofia Faalelalolagi

E le gata i le uunaia lea o oe e maua le agaga faafetai, ou te fia faasoa atu ni fautuaga aoga e ono fesoasoani ia te oe ia fiafia ma faamanuiaina i le ausiaina o se olaga anoa, lea e masani lava ona faasino atu faapea “o le olaga lelei.”

I se tala talu ai nei, na faaalia ai e Lord Jonathan Sacks, o le sa avea muamua ma Matai Sili o le United Hebrew Congregations a le Malo Aufaatasi a Peretania, na faaleoina mai ai le popolega sa i ai ia te au e uiga i le faaitiitia o le matafaioi o le faatuatua, tulaga faatauaina lelei, ma le uiga i le olaga i aso nei. Sa ia taua:

“Afai e i ai se mea se tasi e lē faia e le faalapotopotoga tele o le lalolagi faaonapo nei, o le tuuina atu lea o le uiga. …

“O le saienisi, tekinolosi, o le maketi saoloto ma le … tulaga faatemokalasi ua mafai ai e i tatou ona ausia mea ua ausia e tulaga ese i le malamalama, saolotoga, umi o le ola ma le tamaoaiga. O loo i totonu o mea e aupito sili e ausia e le malo o tagata ma e ao ona puipuia ma faapelepele i ai.

“Ae latou te le taliina fesili e tolu o le a fesili ai tagata mafaufau taitoatasi i nisi taimi o lona soifua: O ai au? Aisea ua ou i ai iinei? Pe faapefea la ona ou ola? O le taunuuga e faapea o le seneturi lona 21 ua tuua i tatou i se aofaiga e sili atu o filifiliga ma le aofai e sili ona itiiti o le uiga.”³

O lenei upusii ua faaalia ai se uiga maoae o le taua o lau savali. Ou te popole tele lava faapea o le olaga lelei o le ola e tusa ai ma le soifuaga ma aoaoga a Iesu Keriso ua i ai nei lona lua i se vaaiga faalelalolagi o le olaga lelei.

Mo i tatou o ni tagata o le Ekalesia, o le talalelei a Iesu Keriso ma Lona Toetu ma le Togiola o le faavae mo mea uma e taua, ua latou aumaia foi se uiga i lenei olaga. Ua i le Faaola ni talitonuga musuia ma na faatuina ni tulaga faatonuina o amioga po o le a le tulaga mama, amiotonu, ma manaomia ma e taunuu i le olaga lelei. Peitai, o mataupu faavae ma le tulaga mama autu na aoao mai e le Faaola ua matuai osofaia lava i le lalolagi i ona po nei. Ua osofaia foi le faa-Kerisiano lava ia.

E le o se mea fou lenei. O le fua mo le olaga lelei ua leva ona finauina i le tele o seneturi. A o i ai le Aposetolo o Paulo i Atenai, sa ia fetaiai ma le “au fiapopoto o le itu aiga o Epikuro, ma le itu aiga o Setoiko” (Galuega 17:18). Sa talitonu le itu aiga o Setoiko o le lelei e aupito maualuga o le ola mama, ma na talitonu le itu aiga o Epikuro o le lelei aupito maualuga o le fiafiaga. E toatele le itu aiga o Setoiko na faamaualuluga ma faaaoga lo latou filosofia o “se faalauiloaga mo … naunautaiga ma le amioleaga.” O le toatele o le itu aiga o Epikuro na avea ma e saili le fiafiaga na ola i le latou mautauave, “Sei o tatou aai ma inu, aua o a taeao tatou te feoti ai.”⁴ O le toatele i le lalolagi faaleaoaoga ua leva ona faasino atu i le fautuaga a Aristotle o le mafaufau atamai o se ata faataatia lea mo le olaga lelei. E malie foi ona o le tele o nei lava filosofia faalelalolagi ia na feteenai ma le faa-Kerisiano anamua o loo i ai pea i ni foliga e eseese teisi lava i le taimi nei.

E le gata i lea, e feteenai tonu lava le tele o manatu fou ma le talalelei a Iesu Keriso. Na vave lava ona tupu lenei mea. I le faaaogaina o le gagana o le Tusi a Mamona, “i le va oni tausaga sa lei tele” (Helamana 7:6), ua taua nei e le vaega tele o le lalolagi le “leaga o le lelei, ma le lelei o le leaga” (2 Nifae 15:20). O le mea moni, ua atagia mai nei fuaitau faatusitusiga paia e lua le mea o loo tupu i o tatou aso. O le mea ua manatu i ai o le tulaga mama ua vave ona suia. Ua i ai se suiga e faigata ona talitonuina mai le amio mama o se faavae o le olaga lelei. O nisi ua faaitiitia le taua o le faa-Kerisiano e ala i le taliaina o le tala fatu faapea i le faa-Kerisiano, o le fiafia e le faatatau i lenei olaga ae ua na o le lagi.⁵ Ou te faamautinoa atu ia te oe o le mulimuli i le Faaola e aumaia le fiafia i lenei olaga ma i le lagi.

Amio Mama o Saafiafiga ma Amio Mama e Tusia i le Talaaga

O nisi luitau e le na o mea e uiga i le lelei ma le leaga. O nisi e manaomia ai i tatou e faia ni filifiliga e faavae i luga o le mea e sili ona lelei, ae le na o le mea e lelei.⁶

O David Brooks, i se tusiga ua faaautuina “O le Lisi o le Pakete o Amio Mama,” na atiina ae le manatu faapea o loo i ai “ni seti se lua o uiga mama, o le amio mama o le tala tusia ma le amio mama e faitauina i le maliu. O le amio mama e tusia o tomai e te avatua i le pule mo se galuega. O le amio mama o saafiafiga o uiga ia e talanoaina i lou falelauasiga.”⁷ Sa faaiuina sao e Brooks faapea e sili atu ona taua o le amio mama o saafiafiga. O lenei mea na taua tele lava ia te au aua na ou oo i se aafiaga ina ua ou i le ogatotonu o lou 20 lea sa mamafa tu ia te au. O lea mea na tulai mai i ni falelauasiga se lua o ni tamalii lelei, ae sa na o ni nai aso na va ai. E moni lava le tala, ae ua ou suia ia igoa ma ua ou faaitiitia ni nai mea moni.

Sa 25 tausaga lou matua, sa faauu mai le Aoga Faaloia i Stanford, ma na faatoa amata ona galue i se kamupani loia. Sa ou faaaluina o’u aso faigaluega faalelalolagi faatasi ai ma tagata e maualuluga a latou aoaoga, ma e maoae le tele o a latou oa faalelalolagi. O i latou o ni tagata agalelei ma tamalii ma tauagafau.

O tagata o le Ekalesia sa matou fegalegaleai sa matuai eseese lava. O le toatele lava o i latou e laiti ni meatotino faalelalolagi. O i latou o ni tagata lelei, ma o le toatele sa i ai se uiga i o latou olaga. O le taimi lea, na maliliu ai ni tamalii matutua ua litaea se toalua, sa ou masani ai i le tele o tausaga ua mavae. Sa na o ni nai vaiaso na va ai o la’ua falelauasiga, ma sa ou malaga e auai i falelauasiga uma e lua. Ua ou filifili e taua se tasi o alii o Mauoa ma le isi alii o Faamaoni. O na falelauasiga e lua o loo tamauina i lou mafaufau aua sa la faamanino ai le taua o le filifiliga a tagata uma ia i laua, ae maise lava le autalavou. Na la faaalia foi le lavelave o le eseesega i le va o le amio mama o le talaaga o tomai ma le amio mama o saafiafiga.

Na faamisiona uma Mauoa ma Faamaoni a o talavou. I tala uma na faia ia i laua, o i la’ua uma o ni faifeautalai naunautai. Ina ua uma ona la auai i le kolisi, sa amata ona o eseese o la olaga. Sa faaipoipo Mauoa i se teine aulelei lea na iu ina le toe toaga i le Ekalesia. Sa faaipoipo Faamaoni i se teine e faapena foi le aulelei ma sa matua toaga lava i le Lotu. E sili atu i lo se isi lava mea moni, o lenei filifiliga na faavae ai faaiuga na totoe o o la’ua olaga. I lou aafiaga, pe a tumau ia ulugalii i le faamaoni ma le faatuatua i le Faaola ma le taua e faavavau o le aiga, o amio mama o saafiafiga e toeitiiti lava o taimi uma lava e faasaoina ai.

Sei ou faasoa atu atili e uiga ia Mauoa. Sa ia te ia ni tomai matagofie e taulima ai tagata ma sa alofa tele o ia i tagata. Sa amata ona ia faigaluega i se faalapotopotoga tele o le I.S. ma na iu ina avea ma peresitene o lena kamupani. Na tele lana tupe maua ma sa nofo o ia i se fale tele, matagofie e faatu i luga o se fanua tele. O le mafuaaga lena ua ou filifili ai e valaau o ia o Mauoa. Atonu lava e fetaui pe a faapea o ana filifiliga faalegaluega sa le gata ina lelei pe sili atu ae sa lelei silisili.

O ana filifiliga faaleaiga ma faale-Lotu e lei matua lelei tele. O ia o se tagata lelei ma na te lei faia ni filifiliga faaletagata na foliga mai e leaga, ae o ana filifiliga faaleaiga ma faatosinaga i lana fanau na taulai atu toetoe lava o taimi uma i aoga ma galuega, o le mea moni lava o le amio mama e tusia na e taua tele i galuega. Sa maualuluga foi taumafaiga a ona atalii i ni galuega e silisili ona lelei. E lei tumau i latou, e ui i lea, i le toaaga i le Lotu, ma sa faaipoipo atu i ni tamaitai talavou e le lolotu. Ou te le o iloa uma ni faamatalaga tonu i ona atalii, ae o faaipoipoga uma lava na iu ina tatala.

Na oo foi ina le toaaga Mauoa ma lana ava. Sa latou matele lava i le aafia i gaoioiga e lauiloa ma gaoioiga lautele. Na te faitauina lava ia o se AAG ma sa mitamita foi i lana misiona, ae e lei alu i le Lotu. Mai i lea taimi i lea taimi, na te tuuina atu ai sona sao i galuega faatino o fale a le Ekalesia ma fesoasoani i tagata o le AAG ia latou galuega. E le gata i lea, o ia o se uunaiga o le faamaoni ma le amiosa’o ma le agalelei i tulaga uma sa ia umia.

Sa faia lona falelauasiga i se falesa mo tagata lautele i le fanuatanu. Sa toatele faauluuluga o kamupani ma tagata aloaia sa auai i le falelauasiga, e aofia ai le kovana o le setete sa nofo ai. O tagata uma lava sa i ai e i luga atu o le ta’i 50 tausaga le matutua, sei vagana ai lana fanau, o fanau a lana fanau, ma a’u. I le tulaga atoa lava, sa o se, falelauasiga faavauvau. Sa lei aoaoina mataupu faavae autu o le fuafuaga o le fiafia, ma itiiti lava se mea na taua ai Iesu Keriso. Sa faavae le olaga o Mauoa e toetoe lava a atoatoa i amio mama e tusia mo se galuega.

Sa matuai itiiti mamao lava le faamanuiaina o faaiuga faalegaluega a Faamaoni. O lana uluai taumafaiga i se pisinisi laitiiti tumaoti na le manuia ina ua mu le pisinisi ma na leiloloa uma ai mea uma. Ona ia toe faatuina lea o se pisinisi laitiiti ae sa toetoe lava ina le mafai ona totogi ana pili sa moomia ona totogi. Sa i ai sona fale e laitiiti lava ae na fetaui lava. Sa fiafia o ia i lana galuega ma ana fegalegaleaiga ma tagata. Sa lelei lana galuega ma o le mea moni lava sa faamalieina, ae e lei tulaga ese pe oo foi i le tulaga e ono ta’ua o le silisili. Sa le o se amio mama e tusia mo se galuega.

I se isi itu, o ana filifiliga faaleaiga ma faale-Lotu, sa matuai lelei silisili. Sa matuai malolosi i laua ma lona toalua i le Lotu. Sa ia auauna atu pe a valaauina, e masani lava o se faiaoga, auai soo atu i le malumalu, ma sa avea o se tagata faamaoni e umia le perisitua. Sa i ai i ni mafutaga matagofie, ae maise lava i lona aiga toatele ma ana fanau a fanau toatele. Sa lelei le aotauina o i latou uma, ae o lana faamamafa autu lava ia te i latou o le ola i se olaga e faapei o Keriso. Ina ua litaea o ia, sa faamisiona faatasi i la’ua ma lona toalua. E ui ina sa feagai ma tofotofoga, e aofia ai le maliu o se atalii i le Taua Lona II o le Lalolagi, sa ia ausiaina le faamalieina ma le olioli i lona soifuaga atoa ona o le faamoemoega ma le uiga na tuuina atu e lona aiga ma le talalelei a Iesu Keriso.

O lona falelauasiga i le falelotu a le uarota sa faatumulia ma i ai le olioli. Na auai tagata o vaitausaga uma, e aofia ai le tele o se fuainumera o fanau a fanau ma tagata talavou sa ia auauna atu i ai. Sa aoaoina le fuafuaga o le fiafia, ma o le Faaola na totonugalemu i le sauniga. O se falelauasiga masani o le Au Paia o Aso e Gata Ai. O lauga na faatatau i ona uiga, agalelei, popolega mo isi, ma le faatuatua i ai ma le alofa o le Alii o Iesu Keriso.

O Filifiliga ma le Olaga Lelei

E pei lava ona ou ta’ua, na oo mai nei falelauasiga e lua i se taimi taua mo au. Sa ou faamisiona ma sa ou fiafia i le Ekalesia. Faatoa amata ona ou faigaluega ma ua amata ona ou fiafia ia i latou sa manuia i mea faalelalolagi ma faalegaluega. Sa ou iloaina o filifiliga ou te faia o le a faamatala ai lo’u fiafia i lenei olaga ma fuafuaina ai le talatuu o le a ou tuua. Sa ou iloaina ai foi le taua faavavau o filifiliga sa i o’u luma. Sa manino mai ia te au faapea o filifiliga e i ai se taua e faavavau. O le mea sa aupito sili ona taua ia te au e uiga i olaga sa faatoa ou faamatalaina atu, o lo’u iloaina lea o filifiliga e aupito sili ona taua e mafai ona faia e tagata uma, e tusa lava po o a latou taleni, tomai, avanoa, po o tulaga faaletamaoaiga e i ai. Sa ou iloaina lena mea mo au, la’u fanau i le lumanai, ma tagata uma lava o le a ou maua le avanoa e uunai, o le faamuamua o le Faaola, lou aiga, ma le Ekalesia na taua. O le faia o lena mea o le a taunuu i le olaga lelei.

I tulaga e sili ona leaga, pe a ua faaletonu mea uma lava, o le aiga ma le talalelei a Iesu Keriso e manaomia. Mafaufau i le Tama o Liae i le Tusi a Mamona, lea o loo faamatalaina ai pe na faapefea ona “alu ese atu o ia i le vao. Ma sa oo ina alu ese atu o ia i le vao. Ma sa tuu e ia lona fale, ma le fanua o lona tofi, ma ana auro, ma ana ario, ma ana mea taua, ma sa lē avea e ia se mea, vagana ai lona aiga” (1 Nifae 2:4).

Ua i ai i le tupulaga lenei le luitau o le puipuia o le faatuatua ma le aiga. O se tasi tagata suesue sa toe tepa i tua e oo atu i Initia ma Eleni anamua ma faia se faaiuga faapea o nuu uma lava e le lolotu i le talafaasolopito na aafia i le faaitiitia o le aofai o tagata.⁸ O le au faasalalau o talafou talu ai nei na faamamafaina mai le faaitiitia o pepe e fananau mai i le tele o le lalolagi i aso nei. Na faasalalau mai e le Wall Street Journal i se tusiga i le itulau pito i luma, “O Le Tulaga Matautia o le Faitau Aofai Fou o le Lalolagi: Toalaiti Tele Tagata.” Na taua e le tusiga e faapea i le 2016, “mo le taimi muamua talu mai le 1950, … o le tuufaatasia o le faitau aofai o le vaitausaga o tagata galulue o le a faaitiitia.”⁹

O le leai o se faatuatua ma le faitau aofai o tagata e faaitiitia o loo manino lava le fesootai. O le fuafuaga e faavavau a le Tama mo Lana fanau e faalagolago i le faatuatua faapea ma le aiga. Ou te faafetai ona o le Au Paia o Aso e Gata Ai, i sailiiliga mai isi sailiiliga, o loo faatumauina le faatuatua i le Alii o Iesu Keriso ma o loo faaauau pea ona faaipoipo ma maua fanau.

O nisi atonu e le maua le avanoa e faaipoipo ai pe maua ni fanau. Ae o tagata taitoatasi o e mulimuli ma le amiotonu i le Faaola ma Ana poloaiga—ma e tuuina atu le auaunaga lē manatu faapito i fanau a lo tatou Tama—“o le a mauaina faamanuiaga folafolaina uma i le faavavau.”¹⁰

A o tatou feagai ma faigata ma tofotofoga o le olaga, e tele mea e tutupu e leai ai pe le mafai foi ona tatou pulea. Ae i tulaga o mataupu faavae, le amio, tausiga faalelotu, ma le ola amiotonu, o i tatou e pulea. O lo tatou faatuatuaga ma le tapuaiga i le Atua le Tama ma lona Alo o Iesu Keriso, o se filifiliga lea ua tatou faia.

Na sii mai e Elder Neal A. Maxwell (1926–2004) o le Korama a Aposetolo e Toasefululua, ia William Law, o se faifeau Peretania o le seneturi lona 18, na taua lenei mea i se tulaga e sili ona manino: “Afai e te le filifilia muamua le malo o le Atua, i le iuga o le a leai lava se eseesega o mea na e filifilia.”¹¹

Faamolemole ia malamalama ou te le o tu e faamatala atu le tala moni e uiga ia Sitivi ma Peniamina ina ia le manatu tele ai i sini e faatatau i a’oga po o galuega. O se faafeagai lava, e tatau ona tatou faia mea uma tatou te mafaia e faalautele ai mea tatou te ausia i nei vaega e lua. O le mea o loo ou fai atu ai e faapea pe afai e siitia i se tulaga e sili atu ai sini na e faatatau i a’oga ma galuega nai lo le aiga ma le Ekalesia ma se molimau o le Faaola, o le taunuuga e lei faamoemoeina o le faamamafaina o amio mama mo galuega e mafai ona maoae lava le matautia.

Ou te mautinoa e mafai ona e maua le olioli ma le fiafia e te manaomia ma e finagalo le Atua mo oe pe afai e te:

Faafetai mo ou faamanuiaga—ae maise lava o lou talatuu.
Tuuto atu i le mataupu faavae e faavavau o le a aumaia ai se uiga i lou olaga.
Fuafuaina faapea o lau amio mama mo le maliu e sili atu i lo lau amio mama mo le galuega.
Saunia e lipoti atu i le Faaola e faapea na e ola i se olaga lelei.

O le fonotaga e aupito sili ona taua o le a faia e i tatou taitoatasi i le isi itu o le veli o le fonotaga lea ma le Faaola, “o le leoleo o le faitotoa” (2 Nifae 9:41). E tusa lava po o ai o tatou tuaa ma pe tatou te mauoa pe matitiva, o le a tatou lipoti atu lo tatou usiusitai i poloaiga na tuuina mai ia i tatou. E tatau ona tatou ola ina ia mafai ona tatou “ulu atu i ona faitotoa ma le viiga, ma ona lotoa ma le pese: ia outou vivii atu ia te ia, ma faamanuia atu i lona suafa” (Salamo 100:4).

O le a tatou mananao e lipoti atu ma le olioli na tatou ola moni lava i se olaga lelei.