Seia Tatou Toe Feiloai
O Se Lesona mai ia Dandy
Mai le Lipoti o le Konafesi, Oke. 1968, 87; ua toefaafou ia faailoga ma mataitusi tetele.
E pei o nisi tagata talavou, o lau solofanua o Dandy sa le fiafia i le taofiofia.
Ata © iStock/Thinkstock
Sa ou umiaina ma fiafia tele i le aoaoina [o se tamai aulelei tele o Dandy le igoa]. Na sa i ai sona uiga lelei, o ona mata lapotopoto, ma mama, na paleni lelei, ma i mea uma lava, o se [manu] filifilia. Pe a faanofoa o se solofanua sa usitai, mataala, ma faalogo lelei e pei ona tatau ai i se solofanua. O ia ma lau taifau o Scotty sa soa moni lava. Ou te fiafia i le ala e alu atu ai i se mea sa ia fefe i ai. Sa ia talitonu faapea afai o le a ia faia e pei ona ou faatonuina ai o ia, o le a le manua o ia.
Ae sa le fiafia Dandy i le taofiofia. Sa ita tele o ia pe a nonoa ma na te atiatia le maea e nonoa ai seia oo ina saoloto. Sa le sola ese o ia; na ona ia manao lava ia saoloto. I le mafaufau faapea o isi foi solofanua e tutusa o latou lagona, na te faaauau ona tatala o latou maea. E inoino o ia i le taofiofia i le fanua, ma afai e mafai ona ia maua se nofoaga i le pa o loo i ai na oni uaea lamolemole, na te tatalaina le uaea ma le faaeteete i ona vae seia oo ina mafai ona ia laa atu i le saolotoga. E sili atu nai lo le tasi le taimi na agalelei ai lava ou tuaoi ma toe faafoi atu o ia i le fanua. Sa ia aoaoina e oo lava i le tuleia faamatala o le faitotoa. E ui lava [sa masani ona ia faaleagaina ma sa] faaosoina ai le ita ma o nisi taimi e taugata, sa ou faamemelo i lona poto ma le atamai.
Ae o lona fia iloa ma le manao e suesue le pitonuu na taitai atu ai o ia ma au foi i ni faafitauli. O se tasi taimi i le auala televave sa taia ai o ia i se taavale, ma na iu ai i se masini ua malepe, se manua i le solofanua, ma e itiiti lava, e ui e lei matuia, se manua i le avetaavale.
I le toe manuia mai lena mea, ma i le uunaia pea e se lagona o le fia tafao, sa ia asiasia le pa i le tuaoi atoa. Sa ia maua ai e oo lava i le faitotoa ua i ai uaea. O lea, mo se taimi na matou mafaufau ai ua saogalemu Dandy i le fanua.
I se tasi aso, e ui i lea, na tuua ai e se tagata le faitotoa e lei uaeaina. I le iloaina o lenei mea, na tatalaina ai e Dandy le faitotoa, ave [le isi solofanua] faatasi ma ia, ma la asiasi faatasi atu i le fanua o le tuaoi. Na la o atu i se fale tuai na faaaoga mo le teuina o meaai. O le fiailoa e Dandy na uunaia ai o ia e tulei ia matala le faitotoa. E pei lava ona sa ia masalomia, sa i ai se taga o saito. Oka se manaia! Ioe, ma oka se mala! O saito o ni maunu oona mo manu faalafua e pei o isumu! I ni nai minute sa ootia ai Dandy ma lana uo i se tiga osofaafuasei, ma e lei leva lava ae mamate uma.
E pei lava o Dandy le toatele o a tatou talavou! E le leaga i latou; latou te le faamoemoe foi e faia se mea sese; ae latou te vavevave, e malolosi, e tumu i le fiailoa, ma latou te naunau e faia se mea. E [le lavava] tele i latou pe a tautaofiofia, ae afai e faatumauina lo latou pisi, taialaina ma le faaeteete ma le sao, latou te faamaonia ai le tali atu ma le mafaia; afai e tuu e feoai solo e le taialaina, o le tele o taimi latou te solia ai mataupu faavae o le mea sa’o, lea e masani ona tau atu i mailei a le tiapolo, faalavelave, ma e oo lava i le oti.