O Leo o Le Au Paia o Aso e Gata Ai
Fesoasoani i le Toe Foi Mai o Mirta
Sa valaauina au e avea ma se fesoasoani i le Aualofa i le uarota fou a lou aiga. I taimi o a matou fonotaga a le au peresitene, matou te iloiloina se lisi o igoa o uso o le Aualofa i la matou uarota ma mafaufau pe faapefea ona fesoasoani ia i latou ma o latou aiga.
Sa ou tosina atu i se uso i le uarota e igoa ia Mirta. O ia o se tagata o le Ekalesia mo le tele o tausaga, ae mo nisi o mafuaaga, na le toe auai mai ai Mirta mo ni nai tausaga.
Sa ou matauina o lona toalua o le peresitene o le korama a toeaina, ae o le la fanau, o ni tagata o le ekalesia, e lei toe auai mai foi i le lotu. O aso Sa taitasi ou te vaai ai i lona toalua e auai mai na o ia.
Sa ou lagonaina e tatau ona matou fesoasoani i lenei aiga e toe foi mai i le lotu ma olioli faatasi ai i faamanuiaga e finagalo le Alii e tuu atu ia te i latou. I isi a matou fonotaga o le au peresitene, sa ou faasoa atu ai ou faamoemoega o le fesoasoani ia Mirta e toe foi mai i le lotu. Sa matou fuafuaina ni gaoioiga ia e mafai ona matou faaaofia ai o ia i se auala faapitoa, ma sa matou faailoaina ni tofiga e mafai ona matou tuuina atu ia te ia.
Ina ua matou asia o ia, sa ia taliaina tofiga taitasi ma na faataunuuina ma le atoatoa mulimuli ane. Na matou matauina e faatali mai o ia ma le naunautai e piki e se tasi o i matou mo gaoioiga a le Aualofa.
Ina ua matou faatulagaina o se au au peresitene ia soa o faiaoga asiasi, sa ou fesili atu i isi e mafaufau i le avanoa e ono avea ai maua ma Mirta ma soa. O masina taitasi, e aunoa ma se misi, ma te o ai ma Mirta e faiaoga asiasi. O taimi uma lava ma te o ai e asiasi i uso o se avanoa e talanoa ai ma iloa atili ai e le tasi le isi.
O taimi taitasi ou te valaaulia ai o ia e auai i le lotu, ae na ona fai mai lava o ia, “Pe a ou lagona ua ou saunia, o le a ou alu.” Ou te lei malamalama, ae sa ou faaaloalo i lana filifiliga. Na iu lava ina faapea mai ana tali, “Atonu o le a ou alu i le aso Sa.”
Ou te faatali lava mo ia ma le naunautai i aso Sa uma. Sa le sau lava o ia, ae sa faaauau pea ona manatua o ia i au tatalo. O se siitiaga faafuasei na mafua ai ona toe foi lou aiga i le mea sa matou nonofo ai muamua, ma ou te lei maua ai se avanoa e faatofa ai ia Mirta. Ina ua matou tuua le uarota, e lei foi mai lava o ia i le lotu.
I ni nai masina mulimuli ane sa tau mai ia te au ua toe foi Mirta i le lotu ma ua avea ma se fesoasoani i le Aualofa.
Na aoao mai Peresitene Gordon B . Hinckley (1910–2008), “E te le iloaina lava po o le a le tele o le lelei o le a e faataunuuina. O le a faamanuiaina le olaga o se tasi ona o au taumafaiga” (“Mo Tina ma Tamaitai o le Ekalesia,” Liahona, nov. 2003, 115).
O le tele o taimi o taunuuga e le o mea ia na faamoemoeina e se tasi ma e le o mai ina ua faamoemoeina. Ia tatou lē taofia le galulue; o le galuega lenei a le Alii, ma o i tatou o Ana meafaigaluega ua filifili e suia ai olaga o tagata e toatele.