Savali a Faiaoga Asiasi
O Le Mana Gafatia o Iesu Keriso ma Lana Togiola
Ia suesue ma le agaga tatalo lenei savali ma saili ia iloa mea e faasoa atu. E faapefea e le malamalama i le faamoemoega o le Aualofa ona saunia afafine o le Atua mo faamanuiaga o le ola e faavavau?
“Ou te mafaia mea uma lava i le faamalosi mai o Keriso ia te a’u” (Filipi 4:13). “E ui ina tatou maua uma vaivaiga, o le a mafai ona tatou faatoilaloina i latou,” o le saunoaga lea a Peresitene Dieter F. Uchtdorf, Fesoasoani Lua i le Au Peresitene Sili. “O le mea moni e ala atu i le alofatunoa o le Atua, pe afai tatou te faamaualalo i tatou lava ma maua le faatuatua, e mafai ai ona avea mea vaivai ma mea malolosi.”1
Fai mai ai lo tatou Faaola i le Mataupu Faavae ma Feagaiga, “Ou te alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lou Agaga i o outou loto, ma sio faataamilo outou e auagelu, e sapasapai outou i luga. (MF&F 84:88).
“O Nifae o se faataitaiga o se tasi na iloaina, malamalama, ma faalagolago i le mana gafatia o le Faaola,” o le tala lea a Elder David A. Bednar o le Korama a Aposetolo e Toasefululua. “O le uso o Nifae na saisai ia te ia i maea ma fuafuaina lona fasiotiga. Faamolemole e maitau le tatalo a Nifae: ‘Le Alii e, e tusa ma lou faatuatua ia te oe, sei e laveaia au mai lima o ou uso; ioe, foai mai ia te au le malosi ia mafai ai ona ou motusia o nei maea ua noatia ai au’ (1 Nifae 7:17; ua faaopoopo le faamamafa).
“… Sa le ‘i tatalo Nifae ina ia suia lona tulaga. Ae peitai, sa ia tatalo mo le malosi e suia ai ona tulaga. Ma ou te talitonu o le ituaiga tonu lenei o tatalo sa ia tatalo ai ona sa ia iloaina, malamalama, ma na aafia i le mana gafatia o le Togiola.
Ou te manatu o filifili sa noatia ai Nifae, sa le’i faamaneta ona toulu ese mai ona lima ma tapulima. Ae, ou te manatu sa faamanuiaina o ia i le finafinau ma le malosi patino na sili atu i lona gafatia e masani ai, ma ‘i le malosi o le Alii’ (Mosaea 9:17) sa ia galue i ai ma milo ma toso ia noataga, ma iu ina mafai moni ona ia motusia ia maea.”2
Mau ma Faamatalaga Faaopoopo
Faatuatua Aiga Toomaga