O Le Mana o le Aoaoina Atu o Aoaoga Faavae

Saunia e Douglas D. Holmes

Fesoasoani Muamua i le Au Peresitene Aoao o Alii Talavou

E mafai faapefea ona tatou faateleina lo tatou tomai o le aoao atu o aoaoga faavae i le mana ma le pule?

Ao avea ai ma se peresitene fou o le misiona, sa ou taunuu i la matou misiona na atofaina ma le fiafia tele i fonotaga a faifeautalai e faatumuina i le Agaga e pei ona ou manatuaina ao avea ai ma se faifeautalai talavou. Ae ina ua maea la matou taamilosaga muamua o konafesi faalesone, sa ou le fiafia. Sa lei tele se Agaga e pei ona sa ou faamoemoeina, ma na foliga mai na le fiafia nisi o faifeautalai i le galuega.

A o ma mafaufau loloto ma tatalo ma lou toalua pe faapefea ona valaaulia se agaga e sili atu i o matou olaga ma olaga o faifeautalai, sa taitaiina i maua e taulai atu a matou aoaoga i aoaoga faavae a Keriso ma lona mana e suia i matou. A o matou tulimatai atu i le auala lenei i masina na sosoo ai, na o mai ni nai faifeautalai ia te au e faasoa mai ni faanoanoaga e uiga i amioga ua tuanai ma faaalia se naunautaiga ina ia maelega atili i le tausia o tulafono o le misiona ma ola ai i le talalelei.

O le a le Mafuaaga o Lenei Suiga?

Na aoao soo mai Peresitene Boyd K. Packer (1924–2015), le Peresitene o le Korama a Aposetolo e Toasefululua: “O aoaoga moni, ma malamalama i ai, e suia ai le amio. O le suesue i aoaoga faavae o le talalelei e vave ona faaleleia ai le amio nai lo le suesue i ala e faalelei ai le amio.”¹ Na ou iloaina lenei mea muamua, ae o le maea ai o lenei aafiaga faatasi ma au faifeautalai, sa ou mauaina ai se lagona sili atu o le faafetai mo le mana ma le mama aiai o le afioga a le Atua e suia ai loto (tagai i le Alema 31:5). A o agai i luma la matou misiona ma matou faaauau pea ona taulai atu i le aoaoina atu o aoaoga faavae, na suia o latou loto ma na faapena foi i matou. Aua sa matou malamalama i aoaoga faavae, na matou malamalama i le “aisea” e usiusitai ai, ae le na o le “o le a” ma le “pe faapefea.”

Aisea e Mamana Tele ai le Aoao Atu o Aoaoga Faavae?

Na aoao mai Peresitene Henry B. Eyring, le Fesoasoani Muamua i le Au Peresitene Sili, “o le afioga a le Atua o le aoaoga faavae na aoao mai e Iesu Keriso ma Ana perofeta.”² O aoaoga faavae moni e totonugalemu ia Keriso. O Lana aoaoga faavae, pe a aoaoina atu ma taliaina e ala i le Agaga, o le a faateleina pea le faatuatua ia Iesu Keriso (tagai Alema 32:28–43; Moronae 7:25, 31–32).³ O le faatuatua o le “mana lea e uunaia ai faatinoga uma” po o amio.⁴ A o faaalia mai le Tama ma le Alo ia i tatou e ala i upu e faatumulia i le Agaga, e tuputupu ae lo tatou faatuatua, o o tatou manao e salamo ma usitai e faateleina, ma ua suia i tatou.

O le mana e suia ai loto e le o i le faiaoga ae o i “le mana o le afioga a le Atua” (Alema 31:5). O mataitusi i se laupepa po o le leo e sau mai se fofoga o se tasi e leai se mana masani e suia ai loto, ae pe a musuia upu moni e le Agaga Paia o le Atua, e mafai ona latou aumaia ai se suiga tele o le loto (tagai 1 Korinito 2:4; 1 Tesalonia 1:5; Mosaea 5:2; Alema 5:7; MF&F 68:4). Pe a tatou aoao atu Lana afioga e ala i le Agaga, e molioo atu e le Agaga Paia le malamalama ma le upumoni i le loto o le tagata aoao (tagai i le (tagai Ioane 6:63; 2 Nifae 33:1; MF&F 84:45). Pe a tatala e tagata aoao o latou loto e talia le afioga, o le Agaga e faamalamalamaina o latou mafaufau ma suia o latou loto—o latou faamoemoega ma amioga.

O le Tusi a Mamona o se molimau mamana e faapea “o aoaoga faavae moni, a malamalama i ai, e suia ai uiga ma amioga.” O nisi nei o nai faataitaiga.

Na aoao atu e le Tupu o Peniamina ia upu na ia mauaina mai se agelu i lona nuu, ma o le Agaga na aumaia se liuga tele i o latou loto ua “lē toe i ai so [latou] manao e fai mea leaga, ae ia faia mea lelei e lē aunoa” (Mosaea 5:2).
A o aoao atu e Alema le Matua tagata, “sa faapupulaina o latou agaga i le malamalama o le afioga tumau-faavavau”, ma na faaolaina i latou (Alema 5:7; tagai foi i le fuaiupu 9).
Atalii o Mosaea, “ona o le mana o lana afioga” (Alema 26:13), na fesoasoani e aumaia ai se suiga atoa o le loto i le faitau afe o sa Lamana (tagai i le Alema 17:14–17; 53:10).

E Mafai Faapefea Ona Tatou Faaleleia Atili?”

O loo i ai mea e mafai e i tatou uma ona fai e faateleina ai lo tatou tomai e aoao atu aoaoga faavae i le mana ma le pule (tagai i le Alema 17:3; Helamana 5:18). Tatou te le manaomia le mauaina o se faailoga tikeri maualuga i le aoao atu po o suesuega faalelotu, ae e tatau ona tatou totogia se tau. E mafai ona fesoasoani manatu nei a o e saili e valaaulia le mana o aoaoga faavae i lau aoao atu.

Ia teu ma ola i le afioga. Ina ia aoao atu aoaoga faavae i le mana ma le pule, e tatau ona tatou iloa le aoaoga faavae. Na tau atu e le Faaola ia Iosefa ma Ailama Samita, ae latou te lei saili e talai atu Lana afioga, e tatau ona latou saili muamua ia mauainai. Ona latou maua lea o Lona Agaga ma Lana afioga, “le mana o le Atua i le faatalitonuina o tagata” (MF&F 11:21). o lenei ituaiga o malamalama “e manaomia ai le sili atu nai lo se faitauga masani,” e pei ona aoaoina e Peresitene Howard W. Hunter (1907–95). E manaomia ai le suesue i aso taitasi, ma le atoatoa.⁵

O le suesue lava ia e le lava. Afai e tatau ona tatou iloa le aoaoga faavae, e tatau foi ona tatou ola ai (tagai i le Ioane 7:17; Alema 12:9). O le suesue ma le maelega ma le faaaogaina o tusitusiga paia ma upu a perofeta soifua o le auala lea tatou te maua ai le mana o Lana afioga “ua i totonu o i tatou” (Alema 26:13; tagai foi i le Alema 17:2–3; 32:42).
Aoao atu aoaoga faavae. E tatau ona tatou faaeteete ia aoao atu na o aoaoga faavae moni. O le Agaga Paia o le “Agaga lea e tupu mai ai le upumoni” (Ioane 15:26). E mafai ona lagonaina e tagata aoao Lana molimau e faamaonia pe a tatou tautino atu “talai atu ni isi lava mea nai lo o perofeta ma aposetolo” (MF&F 52:36) ma aloese mai taumatematega ma faauigaga faaletagata lava ia. O se tasi o auala e sili ona lelei e aloese ai mai le latalata atu i aoaoga faavae sese o le faafaigofie lea o a tatou aoaoga (tagai i le Mosaea 25:22; 3 Nifae 11:39–40). E le gata i lea, e tatau ona tatou faafesootaia manatu faaalia ma aafiaga o tagata o le vasega e faasoa mai i aoaoga faavae o loo tatou aoaoina.
Aoao atu e ala i le Agaga. E tatau ona tatou manatua o le aoao atu e le faatatau lava ia i tatou. E tatau ona tasi la tatou vaai i le Atua. E le tatau ona tatou faafiafia atu po o le faatulagaina i tatou lava o se malamalama. Na tau atu e Paulo i Korinito o loo ia faatasi ma i latou “ma le vaivai, ma le matau, ma le gatete tele” (1 Korinito 2:3; tagai foi fuaiupu 4). E le foliga mai e pei na faaaoga e Paulo se lesona tusitusia na lelei le taulotoina.

Afai tatou te fia avea ma meafaigaluega i aao o le Atua ina ia suia loto, e tatau ona tatou o ese mai le ala ae tuu atu i le Agaga Paia e aoao atu upumoni. Ao e sauniuni e aoao atu, ia manatua le mea o le a sili ona taua i lau vasega o le mafutaga a le Agaga Paia. Ia faia mea uma e te mafaia e valaaulia ai le Agaga i totonu o lau vasega. Ao e aoao atu, aua le fefe e taofi mo se taimi ina ia mafai ona e faalogo atu ma lagonaina le taitaiga a le Agaga.

A o tatou taumamafa ma ola i afioga uma a le Atua ma aoao atu na o aoaoga faavae moni e ala i le mana o le Agaga Paia, o le a tatou iloa ai le Alii e suia o tatou loto ma loto o i latou tatou te aoaoina. Ou te faafetai i le Atua i aso taitasi mo le suiga na ia aumaia Lana afioga i lou loto ma mo le faiaoga na aoaoina au i aoaoga faavae moni ma le mana ma le pule.