Pe Faapefea Ona Fetaiai Ma Tofotofoga o le Faatuatua

Saunia e Elder Neil L. Andersen

O Le Korama a Aposetolo e Toasefululua

Mai se lauga o le konafesi aoao o Oketopa 2012.

O tofotofoga faigata ua mamanuina e faamalolosia atili ai oe, ae ua i ai le gafatia e faaitiitia ai pe faatamaia ai foi lou faalagolago i le Alo o le Atua ma faavaivaia ai lou naunautaiga e tausia au folafolaga ia te Ia. O nei tofotofoga e tele lava ina le mavaaia, lea e faigata ai ona iloaina. E amata i o tatou vaivaiga, o tatou faaletonu, o mea e maaleale ia i tatou, po o mea na e sili atu ona taua ia i tatou. O se tofotofoga moni e mafai ona puleaina e se tasi e mafai ona avea ma tofotofoga faigata mo le isi.

E faapefea ona e tumau ma le “mausali ma le le mafaagaeetia” (Alema 1:25 i se taimi o le tofotofoga o le faatuatua? E te faatofu oe lava ia i mea moni o loo fesoasoani e fausia le fatu o lou faatuatua: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te auai i le lotu ma ’ai ma inu i le faamanatuga, e te tausia poloaiga, ma e te auauna atu i isi.

Pe a fetaiai ma se tofotofoga o le faatuatua—po o le a lava lau mea o fai, e te le laa ese lava mai le Ekalesia! O le faataumamaoina o oe lava ia mai le malo o le Atua i taimi o se tofotofoga o le faatuatua ua tai pei lava o le tuua o le saogalemu o se malutaga malupuipuia o afā ae ua vaaia se asiosio.

Na saunoa mai le Aposetolo o Paulo, “O lenei, e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua” (Efeso 2:19). O totonu o le malutaga o le Ekalesia lea tatou te puipuia ai lo tatou faatuatua. O le feiloai faatasi ma isi e talitonu, tatou te tatalo ma saili tali ia tatou tatalo; tatou te tapuai e ala i musika, faasoa atu le molimau o le Faaola, auauna atu i le tasi ma le isi, ma lagona le Agaga o le Alii. Tatou te aai i le faamanatuga, maua faamanuiaga o le perisitua, ma auai i le malumalu. Na fetalai mai le Alii, “O ona sauniga … , ua faaalia ai le mana o le faale-atua” (MF&F 84:20). Pe a e fetaiai ma se tofotofoga o le faatuatua, ia tumau i totonu o le saogalemu ma le puipuiga a le aiga o le Atua. O loo i ai pea se nofoaga mo oe iinei. E leai se tofotofoga e tele atu e le mafai ona tatou faatoilaloina faatasi (tagai i le Mosaea 18:8–10).