O Le Matalasi o le Agaga
O le faatalatalanoaga lenei sa faia e LaRene Porter Gaunt, o le tagata faigaluega i mekasini a le Ekalesia. Faasologa o taimi ma faamatalaga i autafa na saunia e Kate Holbrook, o le Matagaluega o Talafaasolopito o le Ekalesia.
O le talanoa atu ma le alofa ma le mana i le faamanatuina o le 175 tausaga o le Aualofa, ua faasoa mai ai e le Au Peresitene Aoao o latou lagona, manatu, ma molimau ia i tatou o ni uso o le Aualofa.
Matou te alolofa i uso i le Ekalesia atoa,” o le saunoaga lea a Linda K. Burton, le Peresitene Aoao o le Aualofa, sa saunoa ai mo ia lava ma ona fesoasoani—Carole M. Stephens, Fesoasoani Muamua, ma Linda S. Reeves, Fesoasoani Lua. “O le a se mea e sili atu e mafai ona matou mananao i ai nai lo le fesoasoani o le tasi i le isi i le ala o feagaiga e agai atu i le ola e faavavau? Ua faaalia mai e le Atua Lona faamoemoe i le Mose 1:39: ‘Aua faauta, o lau galuega ma lou mamalu lenei—ia aumaia le tino ola pea ma le ola faavavau o le tagata [ma le tamaitai].’ I le Aualofa matou te fesoasoani e sauniuni tamaitai mo faamanuiaga o le ola e faavavau. Matou te faia lenei mea e ala i le faateleina o le faatuatua i le Tama Faalelagi ma Iesu Keriso ma Lana Togiola, faamalolosia tagata taitoatasi, aiga, ma le auaiga e ala i sauniga ma feagaiga, ma galulue i le lotogatasi e fesoasoani ia i latou e manaomia le fesoasoani.1
“A tatou manatuaina ma ola ai i le faamoemoega o le Aualofa, o le a avea i tatou o ni tamaitai o le au paia o aso e gata ai ‘manino ma tulaga ese—i ni auala fiafia,’2 e fua mai i se uunaiga taua mo le lelei i le lalolagi atoa. O le mea lena matou te mananao ai mo o tatou uso i le Aualofa.”
O lenei la, i se faatalanoaga ma le aufaigaluega o le mekasini a le Ekalesia, o sui o le au Peresitene Aoao o le Aualofa e tali mai ini fesili o le popolega mo le asō ma faasoa mai la latou silasila mamao mo le lumanai.
1. O le a se mea e uiga i le Aualofa e tuufaatasia ai tamaitai mai aganuu eseese ma tulaga eseese?
Sister Burton: O le iloaina ma le ola ai i lo matou faamoemoega e fusia ai i matou i le tele o aganuu. Sa ou feiloai i se tamaitai i Iurukuei i le tausaga ua mavae lea na tau maia ia te au le ala na valaauina ai o ia e avea ma peresitene o le Aualofa i le taimi na sili ona pogisa o lona olaga. Sa faaosoosoina o ia e fai atu, “Ou te le mafai ona fai lena mea i le taimi nei lava.” Ae ona sa ia osia ni feagaiga paia, sa ia fai mai, “O le a ou faia mea ua poloaiina ai au e fai. E i ai lou faatuatua i le Tama Faalelagi ma Iesu Keriso. Ou te iloa e ala i Lana Togiola e mafai ona ou faia ai.” Ona ia fai mai lea ia te au, “O lou valaauga na aumaia le malamalama i lou olaga a o ou auauna atu i ou uso. Sa ou faalagolago i le Alii, ma sa Ia faamanuia mai ia te au.”
Sa ou iloaina le faamoemoega o le Aualofa i lana tala. O lona faatuatua i le Tama Faalelagi ma Iesu Keriso ma Lana Togiola na fesoasoani ia te ia. Sa ia osia ni feagaiga paia ma na manao e tausia. A o ia galue i le lotogatasi ma le epikopo, sa ia faataunuuina lona valaauga. O lenei ua i ai sana molimau e faamanuiaina i tatou e le Alii pe a tatou faalagolago ia te Ia. Ou te faaopoopo atu lau molimau i lana molimau o le a fesoasoani lo tatou Faaola o Iesu Keriso ia i tatou i luitau uma o le olaga nei ma mea uma e foliga mai e le talafeauga i lenei olaga.
Sister Stephens: O lo tatou faatuatua i le mana o le taulaga togiola a le Faaola o le mea sili lea e faalotogatasi ai i tatou. O lo tatou alolofa mo lo tatou Tama Faalelagi ma le malamalama e uiga i Lana fuafuaga sili o le fiafia e fusia faatasi ai i tatou a o tatou saili atu i le ola e faavavau. O o tatou uso e nofofua, faaipoipo ma ni fanau, po o le faaipoipo e aunoa ma ni fanau. O loo i ai e ua maliliu a latou tane ma i latou o e ua tatala faaipoipoga. O lo matou faamoemoega ina ia mafai ona matou galulue uma i le lotogatasi ma ia tasi ao matou oo ina malamalama i lo matou faasinomaga, la matou galuega ma lo matou faamoemoega.
Sister Reeves: O le lotogatasi e aumai ai ia i matou le fiafia ona ua leai se finauga ma ua mafuta le alofa o le Atua i o tatou loto (tagai i le 4 Nifae 1:15). Ua sopoia e le lotogatasi laina uma. Oka, le tele o lo matou mananao i o matou uso ina ia lagonaina lena alofa mo le Faaola. Oka, le tele o lo matou mananao ia lotogatasi i le fesoasoani e faataunuu Lona faamoemoega.
2. O le a se mea e mafai ona fai e tamaitai pe afai latou te le lagonaina o i latou o se vaega o le Aualofa?
Sister Stephens: O le naunautaiga o o matou loto o se au peresitene ina ia malamalama uso i lo latou faasinomaga e faavavau. Sa avea lava i tatou i taimi uma o se vaega o le galuega a le Atua. I le avea ai ma tamaitai ua faaeeina i o tatou luga ni meaalofa faapitoa ina ia manuia ai tagata uma. Sa aoaoina ma faataitaia i tatou i le muai olaga po o le a la tatou galuega o le a i ai. Sa tatou i ai i lena Fono tele i le Lagi lea na tatou filifilia ai le fuafuaga a le Tama Faalelagi, lea na aofia ai le Togiola a Iesu Keriso. Sa matou alalaga ma le olioli i le malamalama o le mauaina o se tino faaletino.
I le lalolagi, e amata mai i le Tina o Eva, ua faaauau pea ona avea tamaitai ma se vaega o le galuega a le Atua. Sa faatulagaina e le Perofeta o Iosefa Samita tamaitai i le mamanu o le perisitua—o se mamanu sa i ai pea lava—ina ua ia faatulagaina le Aualofa i le 1842 i Navu, Ilinoi.
Na fautua mai Peresitene Russell M. Nelson, le Peresitene o le Korama a Aposetolo e Toasefululua, ia i tatou, “Aoao mo outou lava po o ai moni lava outou. Ole atu i lou Tama Faalelagi i le suafa o Iesu Keriso po o a Ona lagona e uiga ia te oe ma lau misiona iinei i le lalolagi. Afai e te ole atu ma le manatu moni i ai, e oo mai le taimi o le a musumusu mai e le Agaga ia te oe le upumoni e suia ai le olaga. Tusi i lalo na uunaiga, iloilo soo, ma mulimuli sao i ai.”
“Ou te folafola atu ia te oe afai o le a amata ona e mauaina tau lava o se vaaiga i le ala e silasila ai le Tama Faalelagi ia te oe ma mea o loo Ia faamoemoe mai ia te oe e faia mo Ia, o le a le toe tutusa lou olaga!”3 O i le malumalu ma faalogo! Faalogo po o ituaiga tagata ua avea ai outou ma mea o le a outou faia.
3. E faapefea ona mafai e tamaitai o loo matuai pisi lava o latou olaga ona olioli pea i faamanuiaga o le Aualofa?
Sister Stephens: O le faamuamua o mea e faamuamua. Sa ou faaaluina le taimi talu ai nei i Aferika i Sisifo, ma sa ou vaaia ai tamaitai o aveina vai mai le vaieli i luga o o latou ulu i aso taitasi ona o lea e galulue e fesoasoani e tausia o latou aiga. E i ai taimi sa lofituina ai au i le mativa. Ona ou faaaluina lea o le taimi faatasi ma tagata o le Ekalesia i fonotaga faaleaoaoga i o latou ofutino papae iila ma ofu sui felanulanuai.
Sa ou aoaoina e mauoa nei tagata i mea e le mafai e tupe ona faatauina. Sa ou aoaoina ai e faapea latou te faamuamua mea e aupito sili ona taua. O le talalelei e sili ona taua i mea uma ia te i latou. Sa latou tau mai ia te au, “Ou te le manaomia se isi lava mea. O loo ou maua mea uma ou te manaomia—o loo ia te au le talalelei ma lou aiga.” Pe a tatou faamuamua mea e aupito sili ona taua, o le a mautinoa lava ona faaitiitia le taua o isi mea i o tatou olaga.
4. O le a se mea o i ai i le Aualofa e ofoina atu i tamaitai talavou?
Sister Burton: O tamaitai Talavou e maua le avanoa e fesoasoani ai e faataunuu valoaga pe a latou o mai i le Aualofa. I le 1979, na valoia mai ai e Peresitene Spencer W. Kimball (1895–1985) faapea o tamaitai lelei o le lalolagi “o le a tosina mai i le Ekalesia i ni vaega toatele … i le tulaga o tamaitai o le Ekalesia e vaaia e manino ma tulaga ese—i ni auala fiafia—mai tamaitai o le lalolagi.”4 Matou te manaomia meaalofa tulaga ese, malamalama, ma taleni na e aumai e tamaitai talavou e fesoasoani e faataunuu ai lenei valoaga.
I le valoaga a Peresitene Kimball, sa saunoa Peresitene Russell M. Nelson i le 2015 i tamaitai o vaitausaga uma—e aofia ai tamaitai talavou, “O outou o tamaitai na muai vaaia e [Peresitene Kimball]! …
“… Matou te manaomia tamaitai o loo i ai se malamalama mausali o le aoaoga faavae a Keriso. … Matou te manaomia ni tamaitai o e iloa pe faapefea ona maua le mana o le Atua ua faaavanoa mai i e e tausi feagaiga. … Matou te manaomia tamaitai o e lotototoa ma i ai le vaaiga mamao a lo tatou Tina o Eva.
“… Ou te augani atu ia te outou ia faataunuuina le valoaga a Peresitene Kimball. … A o outou faia lena mea, o le a faalauteleina e le Agaga Paia la outou faatosinaga i se auala tulaga ese lava!”5
Sister Reeves: O i tatou uma lava “o afafine o lo tatou Tama Faalelagi, e alofa ia i tatou, ma e tatou te alolofa ia te Ia.”6 I le Aualofa, e te iloa ai ua sili atu lo tatou tutusa nai lo le eseese o i tatou. Mo se faataitaiga, o loo tatou i ai i se lalolagi o ala o faasalalauga faaleagafesootai, faalauiloaga, ma faataitaiga i le lalolagi. Ua faauigaina e le lalolagi le taua o tamaitai. O le faatusatusaina o i tatou i mea ua tatou vaai ma faalogo i ai i le lalolagi e mafai ona tatou lagona ai e pei o le mea lea e tatau ona tatou i ai. O lenei e sili atu nai lo se isi lava taimi, tatou te manaomia uma ina ia manatua o lo tatou taua e maua mai i le avea o se afafine o le Atua—e le mai le mea o loo faaalia mai e le lalolagi e tatau ona tatou i ai. O lo tatou malosi e sau mai lo tatou sootaga ma lo tatou Tama oi le Lagi, lo tatou Faaola, ma le tasi ma le isi o ni uso i le talalelei. Faaaoga lena malosi.
Sister Stephens: Tamaitai Talavou, e manaomia outou e le Atua ma matou te manaomia outou. O outou o le tupulaga faiae na fananau mai ma le malosi e tutu malosi atu ai i luitau i nei aso e gata ai. Faatasi mai ia i matou a o avea i tatou ma tamaitai o e malamalama ia Iesu Keriso ma Lana Togiola, o tamaitai o e o le a osia ma tausia feagaiga paia, ma tamaitai o le a galulue i le lotogatasi ma le tasi ma le isi ma faatasi ma taitai perisitua. O se faamanuiaga le avea ma se tamaitai o soo se vaitausaga i Le Ekalesia a Iesu Keriso o le Au Paia o Aso e Gata Ai i le taimi nei. Sei o tatou faasoa atu a tatou molimau e uiga i o tatou tagata ua i ai nei ma o le a avea ai. Sei o tatou faasoa atu a tatou savali o le olioli, ma le fiafia ma le tasi ma le isi!
5. Aisea e taua ai mo e umia le perisitua ma tamaitai o le Aualofa ona galulue faatasi i le lotogatasi?
Sister Burton: O alii ma tamaitai o loo i ai ni matafaioi faifaatasi. O i tatou taitoatasi e o mai faatasi ma ni meaalofa tulaga ese ma ni taleni e saofaga ai i le galuega o le malo ma e faamalosia ai e le tasi le isi. O tamaitai o le afa lea o le faleteuoloa a le Alii, e taua tele i le galuega. Tatou te aumaia se vaaiga ma se manao e saofagā ai i le fausiaina o le malo lea na amata ia Eva, ma faaauau pea ia Sara, Repeka, Eseta, Maria, Elisapeta, Ema, Eliza, ma isi tuafafine lototoa i lenei tisipenisione mulimuli ma aso anamua.
Ao tatou mafaufau e uiga i le mana ma uunaiga, o le mana e masani lava ona fesootai ma le mana o le perisitua. Ae o faatosinaga a se tamaitai amiotonu e tauaveina foi se mana maoae. O na lava uiga mama o loo taua i le Mataupu Faavae ma Feagaiga 121:41 na e valaaulia le mana o le perisitua o uiga mama lava na e valaaulia ai le mana o le faatosinaga a se tamaitai—“faatauanau,” “tali-tiga,” “o le agamaualalo ma le agamalu,” ma le “alofa faamaoni.” O nei mea e i ai lava i lo tatou natura paia, ma o loo taoto ai iina lo tatou avanoa e faatosina ai mo le lelei i se auala mamana.
A o tatou galulue i le lotogatasi faatasi ma o tatou tuagane a perisitua, tatou te avea atili ai ma atili ai faapei o tagata sa nonofo i Siona (tagai i le Mose 7:18).
Sister Reeves: Pe a tatou faitau i le “O Le Aiga: O Se Folafolaga i le Lalolagi,” e iloa ai e faaaoga soo e lo tatou Tama Faalelagi malosiaga o alii ma tamaitai e tusa ai ma matafaioi ma tiutetauave o le a toe aumaia ai le toatele naua o Lana fanau ia te Ia.7 O le faamoemoega o le Aualofa e fesoasoani tatou te faia ai lena mea.
6. E faapei mo le tou au peresitene le galulue faatasi ai ma perofeta?
Sister Burton: E pei lava o Iesu Keriso o se puipuiga mo tamaitai i Ona aso, ua faapea lava i Ona Aposetolo i o tatou aso. O o tatou perofeta e sailiili ma le maeaea i a latou filifiliga, e saili i taimi uma lava manatu ma le malamalama o tuafafine i le Ekalesia. Ou te moomoo i tuafafine uma i le Ekalesia ia mafai ona vaai ma faalogo ma lagonaina le mea matou te oo i ai i a matou fegalegaleaiga ma perofeta, tagatavaai ma talifaaaliga i se tulaga masani. O i latou o ni soo moni lava, e tautua ma le le manatu faapito ma tuuina atu ma le fiafia o latou ola i le Alii ao latou saili e faia Lona finagalo ma faalagolago i Lana lava taimi. E masani ona latou molimau mai, o lenei Ekalesia e a Iesu Keriso ia ma o Ia e taitaia ma taialaina.
Sister Reeves: Pe a matou fegalegaleai ma o matou taitai, lea e masani ona matou faia, latou fesili mai mo o matou manatu i se saoasaoa e matuai faateleina lava. E faalogo le Usoga i nei aufono ma faatauaina mea matou te fai atu ai, ma latou te galulue faatasi ma i matou i a matou sini e tutusa.
Sister Stephens: O le Au Peresitene Sili ma le Korama a Aposetolo e Toasefululua o ni molimau faapitoa a Iesu Keriso. Latou te silafia o Ia. Ua avea i latou faapei o Ia. Afai e te manao e malamalama i le sootaga o loo i ai i taitai tamaitai ma nei molimau a Iesu Keriso, vaai i Ana faataitaiga i tusitusiga paia. O Iesu Keriso na lagolagoina tamaitai, faaaofia tamaitai, ma faamamaluina tamaitai. I aufono ma le Usoga, ou te masani ona tilotilo atu ia te i latou ma mafaufau, “O se vaega itiiti lenei o le lagona atonu e faalogoina i le i ai faatasi ma le Faaola.”
7. O le a le sootaga i le va o le mana faaleagaga ma a tatou feagaiga?
Sister Stephens: E oo mai le mana faaleagaga ia i tatou e ala mai i sauniga tatou te mauaina ma feagaiga tatou te osia. O loo i ai foi le mana faaleagaga e oo mai i le tausia o a tatou feagaiga.
E oo mai le mana faaleagaga pe a tatou fetagofi atu i le faamanatuga i le aso Sa. O lenei e tupu pe a mafai ona tatou faafouina feagaiga uma na tatou osia ma le Alii. Tatou te tauaveina Lona suafa i o tatou luga, “manatua pea o ia,” tausi i Ana poloaiga, ma taumafai e “maua pea lona Agaga e faatasi ma i [tatou]” (MF&F 20:77, 79).
Sister Burton: I lenei mana faaleagaga, na fai mai ai Nifae, na “vaai a’u o Nifae, i le mana o le tamai Mamoe a le Atua, ua alu ifo i luga o le au paia o le ekalesia a le tamai Mamoe” (1 Nifae 14:14). Pe le o le faaupuga le au paia e aofia ai alii ma tamaitai?
O loo faaauau pea Nifae i le fuaiupu lava lea e tasi ma fai mai na afio ifo le mana o le tamai Mamoe a le Atua “i luga o tagata o le feagaiga a le Alii, o e sa faataapeapeina i luga uma o le lalolagi; ma sa faaauupegaina i latou i le amiotonu ma le mana o le Atua i le mamalu tele.” O i tatou o “tagata o le feagaiga”—alii atoa ma tamaitai—e mafai ona “faaauupegaina i le amiotonu ma le mana o le Atua i le mamalu tele.” O le taunuuga paia lenei mo fanau uma a le Atua o e tausia feagaiga.
Sister Stephens: O le malamalama i le tele o lo tatou taunuuga paia o loo maua i tali i fesili e lua: (1) Pe e te iloaina po o ai oe? (2) Pe e te iloaina mea ua e maua? Afai tatou te malamalama i mea ua tatou maua, o le a tatou malamalama ua tatou mauaina mea uma tatou te manaomia. E ala i sauniga ma feagaiga tatou te osia i le malumalu, ua tatou maua faamanuiaga, le mana, ma le pule o mea uma e faatatau i le perisitua. E lei faauuina i tatou. Tatou te le iloa pe aisea. O le faauuina i le perisitua mai le tama i le atalii o le faatulagaga a le Atua talu mai aso o Atamu ma Eva.
Sister Reeves: E i ai sau molimau faapea o tamaitai e tausia feagaiga e iloaina ua tuuina mai e lo tatou Tama ia i tatou mea uma tatou te manaomia e toe foi atu ai i Lona afioaga e ala i le osia ma tausia o feagaiga.
8. O le a se mea e aupito sili ona taua e te manao i uso o le Aualofa ina ia manatua?
Sister Burton: I le Mataupu Faavae ma Feagaiga 45:3 ua fai mai: “Faalogo ia te ia o lē o le fautua i le Tamā, o lē o loo fautuaina la outou tagi i ona luma.”
“O le mea lea, le Tamā e, ia faasaoina i latou nei o o’u uso [ma tuafafine] o e ua talitonu i lo’u igoa, ina ia mafai ona latou o mai ia te a’u ma maua le ola tumau-faavavau” (fuaiupu 5). Ou te fiafia i le agalelei o Keriso ia te i tatou. O loo Ia fautua mo i tatou ona e alofa o Ia ia i tatou! E finagalo o Ia ia tatou o mai ia te Ia. Ia tatou fiafia ma faateleina lo tatou faatuatua ia Iesu Keriso ma lo tatou Tama Faalelagi.
I le avea ai ma ni afafine o le feagaiga o le Atua ua faataapeapeina i luga o le lalolagi atoa i le taimi nei, ua faaauupegaina i tatou i le mamalu tele ma le amiotonu ma le mana o le Atua. A o tatou manatua lo tatou faamoemoega, olioli ma tausia a tatou feagaiga, o le a vaaia i tatou ua “manino ma tulaga ese—i ni auala fiafia—mai tamaitai o le lalolagi,” ma e mafai ona tatou fesoasoani e saunia le lalolagi mo le toe foi mai o lo tatou Faaola o Iesu Keriso.