O Le Vavega I le Minute Mulimuli
E alala le tusitala i Aragua, Venesuela.
Sa ou talavou, leai se poto masani, ma na puupuu le taimi. Pe mafai e se tatalo faigofie ona faia moni lava se vavega?
Ina ua 16 ou tausaga, sa ou auai i le aoga maualuga i se aoga faalematata ina ia mafai ona maua se tikeri faapaaga i masini eletonika. O se mea e manaomia mo lou faailoga, sa tatau ona ou faaumaina se galuega faataitai o le 30-aso i se pisinisi i le lotoifale e faaali atu lou tomai faatekinolosi.
O lau galuega faataitai sa faia i se kamupani o oloa taupepa. Na amata ona tuputupu ae lou naunau e auauna atu i se misiona talai, ma o lenei galuega o le a fesoasoani mai ia te au e maua ai se tupe e alu ai. Ae sa toatolu i matou e faigaluega faataitai, ma e filifili e le kamupani le na o le toatasi o i matou mo se galuega tumau.
Sa i ai i le kamupani se masini na leaga. A o lelei le masini, e mafai ona ia faamaeaina le tele o galuega a ni masini e tutusa se tolu. O lenei vaega o meafaigaluega ua fai lava si leva e le o toe lelei, ma sa okaina e le kamupani vaega e sui ai mai atunuu i fafo ia toe faaleleia ai—ae e lei lelei lava. Sa ou taliaina le lui e taumafai e faaleleia.
Ata na tusia e David Curtis
Mai lea aso i lea aso, sa ou faaaluina le tele o itula e suesue ai le masini. Ae sa faigata, ma o le a le faigofie le iloaina i le na o le 30 aso pe aisea na leaga ai, ae maise lava mo se tasi e leai se poto masani e pei o au. Ae peitai, sa ou lagonaina ou te mafai ona faia. I taeao taitasi a o lei amataina le galuega, sa ou faitau ai i tusiga mai le mekasini o le Liahona ma tatalo atu i lou Tama oi le Lagi. Sa ou atiina ae foi se faigauo ma lou pule, o se enisinia faieletise potomasani, lea na maua ai le faatagaga mo au e ave ia kopi o le ata o le masini i le fale i le faaiuga o le vaiaso. Sa ou suesueina ma le totoa.
A o faasolo ina faaiu le galuega faataitai, na faaumaina e au uo e toalua a la galuega faatino ma sa ou lagonaina le faatupulaia o le popole. Ae e ui i tala le lelei (ma e oo lava i le taufaifai) na siomia ai au, ou te lei masalosalo lava. Na vave taunuu mai le aso Faraile na faailogaina ai le faaiuga o la matou galuega faataitai. E ui ina sa ou foia nisi o faafitauli, sa le lelei lava le masini. Sa ou lagonaina le mautinoa sa ou latalata atu i le toe faaleleia, o lea na ou tau atu ai i lou pule pe mafai ona ou maua se faatagaga e galue ai i le aso Toonai, o le a faaleleia le masini i le aso Gafua.
Na matuai ofo lava lou pule i au upu o lea na ia talosagaina ai e ia lava se faatagaga mai le peresitene o le kamupani. O lea na tau mai ai e lou pule ia te au o le aso e sosoo ai, o le toatolu o i matou uma lava—le peresitene o le kamupani, o lou pule, ma au—o le a galulue, seia oo i le aoauli. “Le toatolu uma?” Sa ou fesili atu ai. Sa ia faamatala mai o le peresitene o le kamupani, o se enisinia faaeletonika, sa fiafia i lau talosaga ona sa i ai le tele o taumafaiga le manuia e lipea le masini o lea na ia fiu ai e toe faaleleia.
O le aso na sosoo ai, sa ou matuai fefe lava e galulue faatasi ma enisinia e toalua matutua. Sa ou talavou ma sa leai se tomai. Ae peitai, sa la ofo mai e galulue o ni ou fesoasoani; Sa ou lagona le le lagolelei ma, i le taimi lava e tasi, le matuai faamanuiaina.
O ni nai minute a o lei oo i le aoauli ina ua iloaina e le peresitene ma lou pule e faapea o a matou taumafaiga sa maimau. Sa ou tuumuli ese ma alu i totonu o le faletaele. Sa ou tootuli i lalo, ma tatalo atu i lou Tama ma le finafinau tele. Sa ou lagonaina se malosiaga e le mafaamatalaina, ma ofoofogia. Sa ou ole atu ia te Ia e fesoasoani ia te au ia maua le galuega ona ou te manaomia e fesoasoani ia te au e totogi ai lau misiona.
Na ou sau mai le faletaele ua sipaka ou tino; ae i le taimi lena, ua tapunia e ou fesoasoani le vaega o le eletise ma ao uma meafaigaluega. Sa ou tatalaina le vaega faaleoleo o le masini ma tilotilo atu ma le faaeteete i kata e 15 i totonu. Sa ou matauina ai o se tasi o pine faatauvaa i totonu o le silia ma le 4,000 pine i le polokalama e le o fesootai atu i le kata. Sa ou sosooina, tuu i totonu, ma ki le masini. Sa ola! O se vavega lava.
Sa avea o se taimi e le mafaagaloina ma le faamomoiloto. Sa fusi atu au e lou pule, ma sa luluina lou lima e le peresitene o le kamupani ma faamalo mai ia te au ma le fiafia.
Sa mafai ona ou galue mo lena kamupani mo le toeitiiti atoa le lua tausaga, teuina ai le tupe na ou manaomia, ma tuua ai mo lau misiona ua leva ona faatalitali i ai. Ina ua ou faamalamalama atu le mafuaaga mo lou malaga ese atu, na faatofa mai le peresitene o le kamupani ia te au ma fai mai, “Ua e iloa a le mea e toe foi mai e faigaluega ai pe a uma lau misiona. Ou te moomoo ia e manuia tele lava.”
O lenei aafiaga na faaali mai ai ia te au e leai se mea e le mafaia e le Atua. Afai tatou te le masalosalo, o vavega o le a faaalia, ae ina ua mavae le tofotofoina o lo tatou faatuatua—e oo lava i le taimi mulimuli. Ioe, e tutupu vavega.