Saunia se Taumafataga Faaleagaga
E alala le tusitala i le Ripapelika Tominika.
Ina ua valaaulia au o se fesoasoani muamua i le au epikopo, sa faaitiitia le auai i sauniga faamanatuga i le matou uarota. I le avea ai ma se au epikopo, sa matou filifili e anapopogi ma le naunautai ma tatalo i le Tama Faalelagi e tuuina mai ia i matou le poto e iloa ai le ala e faamalolosia ai tagata.
Na musuia e le Alii i matou ina ia faamamafa atu le sauniga faamanatuga o se taumafataga faaleagaga, o lea na matou maua ai se ala e valaaulia ai tagata o le ekalesia, a latou uo, ma o latou tuaoi e o mai i le sauniga faamanatuga ma maua ai se taumafataga faaleagaga. Sa matou faia ni valaaulia e faapea, “O mai ma faalogo, vaai, ma lagonaina le mafutaga a le Alii i se taumafataga faaleagaga” ma tuuina atu i tagata lotu taitoatasi, e aofia ai alii ma tamaitai talavou.
Sa matou saunia foi se aufaipese a le uarota laitiiti e toavalu. Na matou filifilia ni viiga ma failauga faaleagaga ma valaaulia tagata o le ekalesia e fesoasoani i le migao o le sauniga.
Sa saunia mea uma mo le taumafataga faaleagaga! O le auai i lena aso Sa na aofia ai le 42 o tagata sailiili ma tagata na le toaaga mai. I le taumafataga faaleagaga lona lua, sa i ai tagata sailiili e 64 ma tagata na le toaaga mai. O le tolu masina mulimuli ane ua le mafai ona matou toe ofi i totonu o le falesa, ma i le ono masina mulimuli ane na matuai toatele lava le matou uarota o lea na matou sauniuni ai e vavae i ni uarota se lua.
Sa matou aoaoina faapea o le taulimaina o le sauniga faamanatuga e sili atu i le na o se sauniga i le aso Sa na tuuina mai ai ia i matou se avanoa ofoofogia e valaaulia ai e pele ia i matou e o mai ia Keriso e ala i se taumafataga faaleagaga paia.
O la matou sauniuniga e faaleleia atili le tulaga lelei o le agaga ma le migao o le sauniga faamanatuga na fesoasoani e faaleleia ai le auai o tagata o e sa le mafaufauina le lagonaina o le olioli e ala i le o mai e vaai, lagona, ma maua ai i Le Ekalesia a Iesu Keriso o le Au Paia o Aso e Gata Ai.