Faaauupegaina i le Amiotonu

Saunia e Peresitene Henry B. Eyring

Fesoasoani Muamua i le Au Peresitene Sili

Ua folafola mai e le perofeta a le Atua i le lalolagi, o Peresitene Thomas S. Monson, “O le asō, ua tatou nofo olo e faasagatau atu i le tele o ituaiga agasala, uiga leaga, ma le amio leaga ua tutu faatasi mai i o tatou luma.”¹

Pe o le a faateia oe i le iloaina faapea na fofogaina mai e Peresitene Monson na upu i le 50 tausaga talu ai? Afai sa tatou tolauapi faasaga i se malosiaga sili ona maoae o le amioleaga i lena taimi, e faapefea ona sili atu le taumatauina o i tatou e le tiapolo i le taimi nei? Mo se mafuaaga lelei, ua folafola mai e le Alii i lo tatou tisipenisione, “Faauta, ua aufaatasi le fili” (MF&F 38:12).

O le taua lea “ua tauto i tatou”² na amata ae tatou te lei fananau mai i le lalolagi. Sa amata ae lei taitai lava foafoaina le lalolagi. Sa amata i le tele o afe o tausaga ua mavae i le muai olaga, lea na fouvale ai Satani ma “saili e faaumatia le faitalia a le tagata” (Mose 4:3).

Na faiaina Satani i lena taua ma “ua lafo ifo i le lalolagi” (Faaaliga 12:9), lea ua ia faaauau ai pea lana taua i le taimi nei. Iinei i le lalolagi “ma ua sii taua ai o ia i le au paia a le Atua, ma sio faataamilo i latou” (MF&F 76:29) i pepelo, taufaasese, ma faaosoosoga.

Ua ia sii taua faasaga i perofeta ma aposetolo. Ua ia sii taua faasaga i le tulafono o le legavia ma le paia o le faaipoipoga. Ua ia sii taua faasaga i le aiga ma le malumalu. Ua ia sii taua faasaga i mea ua lelei, mamalu, ma le paia.

E faapefea ona tatou tau ma sea fili faapena? E faapefea ona tatou tau faasaga i le leaga lea ua foliga mai ua siomia ai lo tatou lalolagi? O le a la tatou ofutau? O ai a tatou uo?

O le Mana o le Tamai Mamoe

Na aoao mai le Perofeta o Iosefa Samita faapea o Satani e faatoa i ai le mana i luga o i tatou i le maualuga tatou te faatagaina ai o ia.³

I se vaaiga i o tatou aso, “na vaai [ai Nifae] i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o tagata o le feagaiga a le Alii, o e sa faataapeapeina i luga o le lalolagi atoa; ma sa faaauupegaina i latou i le amiotonu ma le mana o le Atua i le mamalu tele” (1 Nifae 14:14; faaopoopo le faamamafa).

E faapefea ona tatou faaauupegaina i tatou lava i le amiotonu ma le mana? Tatou te tausia le aso Sapati ia paia ma faamamaluina le perisitua. Tatou te osia ma tausia feagaiga paia, galulue i lo tatou talafaasolopito o aiga, ma auai i le malumalu. Tatou te taumafai pea lava pea ina ia salamo ma aioi atu i le Alii e “faaaoga ai le toto togiola o Keriso ina ia mafai ona matou maua se faamagaloga o a matou agasala” (Mosaea 4:2). Tatou te tatalo ma auauna atu ma molimau atu ma faatino le faatuatua ia Iesu Keriso.

Tatou te foi faaauupegaina i tatou lava i le amiotonu ma le mana pe a tatou “teu i [o tatou] mafaufau pea lava pea upu o le ola” (MF&F 84:85). Tatou te teuina na upu e ala i le faatofuina o i tatou lava i tusitusiga paia ma upu a auauna filifilia a le Alii, o le a faasoa atu Lana finagalo, mafaufau, ma le siufofoga (tagai i le MF&F 68:4) i le taimi o le konafesi aoao o le masina e sosoo ai.

I la tatou taua faasaga i le tiapolo, e tatau ona tatou manatua pea ina ia tatou maua le fesoasoani mai i itu uma e lua o le veli. O a tatou au e aofia ai le Atua le Tama e Faavavau, le Alii o Iesu Keriso, ma le Agaga Paia.

O loo aofia ai foi i a tatou au ia au tau le vaaia a le lagi. “Aua le fefe,” Na tau atu e Elisaia i se alii talavou matau a o latou feagai ma se autau a le tiapolo, “aua e toatele ua ia te i tatou i e ua ia te i latou” (tagai i le 2 Tupu 6:15–16).

E le tatau ona tatou fefefe. E alofa le Atua i Lana Au Paia. O le a Ia le tuua lava i tatou.

Ou te iloa o le Atua, i le tali i tatalo, ua faataunuuina au talosaga ia laveai au mai le leaga. Ou te molimau atu e faatasi ai ma le fesoasoani a le Atua le Tama, le Faaola o le lalolagi, ma le Agaga Paia, e mafai ona tatou faamautinoa faapea o le a tuuina mai ia i tatou se mana e sili atu i le mea tatou te manaomia e tetee atu ai i soo se malosiaga leaga tatou te feagai.

Tau ina ia faaauupegaina pea i tatou i le amiotonu ina ia mafai ona tatou maua le mautinoa i le manumalo silisili.