Pe Ua Tusia ea i o Tatou Loto le Faatuatua i le Togiola a Iesu Keriso?

Saunia e Linda K. Burton

Peresitene Aoao o le Aualofa

O le osia, tausia, ma olioli i a tatou feagaiga o le a avea ma faamaoniga ua tusia moni le Togiola a Iesu Keriso i o tatou loto.

Ou uso pele, ua tele masina o avatu lo’u mafaufau ma lo’u loto ia te outou a o ou manatunatu loloto i lenei tiutetauave faigata. E ui ou te lagonaina lo’u le agavaa i le tiutetauave ua tuu mai ia te au, ae ou te iloa o le valaauga na sau mai i le Alii e ala mai i Lana perofeta filifilia, ma mo le taimi nei, ma ua lava foi lea. Ua aoao mai e tusitusiga paia “pe mai le leo [o le Alii] po o le leo o [Ana] auauna, ua tutusa lava ia.”¹

O se tasi o meaalofa e o faatasi ma lenei valaauga o le faamautinoaga lea e alofa le Tama Faalelagi i Ona afafine uma. Ua ou lagonaina Lona alofa mo i tatou taitoatasi!

Faapei o outou, ou te fiafia lava i tusitusiga paia! I le tusi a Ieremia, tatou te maua ai se mau e pele i lo’u loto. Sa soifua Ieremia i se taimi ma se nuu faigata, ae sa faatagaina e le Alii e “muai vaai i se taimi o le faamoemoe i le taimi o le toe faapotopotoina o Isaraelu”²—i o tatou taimi. Sa valoia e Ieremia:

“Pe a mavae ia aso, o loo fetalai mai ai Ieova, ou te tuuina la’u tulafono i totonu ia te i latou, ma ou tusi ai i o latou loto; e fai foi a’u mo latou Atua, o i latou foi e fai mo’u nuu. …

“… E iloa a’u e i latou uma lava, o tagatanuu atoa ma alii, o loo fetalai mai ai Ieova; aua ou te faamagalo i a latou amio leaga, ma ou le toe manatua a latou agasala.”³

O i tatou o tagata na vaai i ai Ieremia. Pe ua tatou valaaulia ea le Alii e tusia le tulafono, po o le mataupu i o tatou loto? Pe tatou te talitonu o le faamagaloga o loo maua i le Togiola lea na faasino i ai Ieremia, e faatatau ia i tatou?

I nai tausaga talu ai, sa faasoa mai ai e Elder Jeffrey R. Holland ona lagona e uiga i le faatuatua ua mauaa o paionia o e sa tauasa atu i le Vanu o Sate Leki, e oo lava i le taimi ua mavae le maliliu o a latou fanau. Na ia saunoa, “Latou te lei faia lena mea mo se polokalama, latou te lei faia mo se gaoioiga faaagafesootai, sa latou faia ona sa i ai le faatuatua i le talalelei a Iesu Keriso i o latou agaga, sa i ai i le su o o latou ivi.”

Sa ia faamatalaina, ma le loto nutimomoia:

“E na o le pau lena o le ala na mafai ona tanuina ai e na tina [a latou pepe] i totonu o ni atigipusa falaoa ma fai mai, ‛O loo i se mea i o le nuu o le folafolaga. O le a tatou oo atu i le vanu.’

Na mafai ona latou faia lena tala ona o feagaiga ma aoaoga faavae ma le faatuatua ma faaaliga ma le agaga.”

Na ia faaiu i upu faatupu manatu nei: “Afai e mafai ona tatou taofiofia na uiga faaalia i totonu o o tatou aiga ma le Ekalesia, atonu e tele isi mea o le a faataunuuina. Atonu e tele ni mea e le manaomia o le a toulu ese mai le taavaletoso po o o tatou olaga. Na ta’u mai ia te au faapea o na taavaletoso e le tele ni mea e ofi ai. E pei lava ona filifilia e o tatou tuaa mea sa latou aveina, atonu o le seneturi 21 o le a faamalosia tatou e filifili. ‘O a mea e mafai ona tatou aveina i lenei taavaletoso?’ O le mea e taua o le aano o o tatou loto; o le mea lea e oo atu i le su o o tatou ivi.”⁴ Pe, i se isi faaupuga, o mea ia e tusia i o tatou loto!

I le avea ai o se au peresitene fou o le Aualofa, ua matou sailia ma le naunau le Alii ina ia iloa ai mea taua e finagalo o Ia matou te tuuina i le taavaletosolima a le Aualofa, e faaauau ai ona tulei i luma Lana galuega. Ua matou lagonaina e finagalo le Tama Faalelagi ia muamua ona matou fesoasoani i Ona afafine faapelepele ia malamalama i le aoaoga faavae o le Togiola a Iesu Keriso. A o tatou faia, matou te iloa o le a faateleina lo tatou faatuatua, ma faapena foi lo tatou manao ia ola amiotonu. Lona lua, a o matou mafaufau i le taua o le manaomia ona faamalolosia aiga ma auaiga, ua matou lagonaina e finagalo le Alii ina ia matou faamalosiau atu i Ona afafine faapelepele ia pipiimau ma le lotofiafia i a latou feagaiga. A tausisia feagaiga, ua faamalolosia foi aiga. Ma le mea mulimuli, ua matou lagonaina e finagalo o Ia tatou te galulue i le lotogatasi ma isi ausilali ma o tatou taitai perisitua, ma taumafai e sailia ma fesoasoani i e o manaomia ina ia agaigai i luma i le ala. O la matou tatalo faatauanau, ia taitasi i tatou ma tatala o tatou loto ma tuu atu i le Alii e tusia ai aoaoga faavae o le Togiola, feagaiga, ma le lotogatasi.

E mafai faapefea ona faamoemoe tatou te faamalolosia aiga pe fesoasoani i isi sei vagana ai ua tatou tusia i o tatou lava loto se faatuatua mausali loloto ia Iesu Keriso ma Lana Togiola e le i’u? O le po nei ou te fia faasoa atu ai ni mataupu faavae o le Togiola afai e tusia i o tatou loto, o le a faateleina ai lo tatou faatuatua ia Iesu Keriso. Ou te faamoemoe o le malamalama i nei mataupu faavae o le a faamanuiaina ai i tatou taitoatasi, pe o tatou o ni tagata e fou mai i le Ekalesia pe o ni ē foi ua leva ona auai.

Mataupu Faavae 1: “O mea uma lava e le talafeauga e uiga i le olaga, e mafai ona faasa’o i le Togiola a Iesu Keriso.”⁵

Tatou te molimau faatasi atu i le Togiola a lo tatou Faaola, o Iesu Keriso. O a matou molimau, faapei foi o outou, ua tusia i o matou loto a o matou feagai ai ma luitau ma faigata eseese ogaoga. A aunoa ma se malamalama i le fuafuaga atoatoa a le Tama Faalelagi o le fiafia, ma le Togiola a le Faaola e avea ma elemene tutotonu o lena fuafuaga, ma e mafai ona foliga ua le talafeauga nei luitau. Tatou te taufai oo uma i tofotofoga o le olaga. Peitai, o loto faamaoni ua tusia ai, “O mea uma lava e le talafeagai e uiga i le olaga, e mafai ona faasa’o i le Togiola a Iesu Keriso.

Aisea e faatagaina ai e le Alii mafatiaga ma puapuaga e oo mai ia i tatou i lenei olaga? I se faaupuga faigofie, o se vaega o le fuafuaga mo lo tatou tuputupu ae ma lo tatou alualu i luma! Sa tatou “alalaga fiafia”⁶ ina ua tatou iloaina o le a tatou maua le avanoa e o mai ai i le lalolagi ia iloa le olaga faitino. Na aoao mai e Elder Dallin H. Oaks, “O lo tatou liua o loo manaomia, e tele lava ina ausia lelei e ala i le mafatia ma le puapuagatia nai lo le taugamalie ma le toafimalie lelei.”⁷

Na faapupula mai lenei upumoni i se faataitaiga a se uso paionia faatuatua. Sa faaipoipo Mary Lois Walker ina ua 17 ona tausaga ia T. Morris i St. Louis i, Misuri. Sa latou laasia laufanua valevalenoa ma le Au Paia i le 1853, ma ulu atu ai i le Vanu o Sate Leki ae faatoa atoa le tausaga talu ona la faaipoipo. I la latou malaga, sa mafatia i la’ua i puapuaga sa masani ai foi isi Au Paia. Peitai, e lei uma ai iina o la’ua mafatiaga ma puapuaga ina ua latou taunuu i le Vanu o Sate Leki. O le tausaga na sosoo ai, ina ua 19 ona tausaga, sa tusia ai e Mary: “Sa fanau le ma tama tama. … I se tasi afiafi, ina ua lua pe tolu ona masina … sa musumusu mai se mea ia te au, ‘O le a oti lau tama.’”

I le taimi o le taumalulu, na faiifo le malosi o le pepe. “Sa ma faia mea uma ma te mafaia, … ae na faasolo ina matua tigaina le pepe. … O le aso lua o Fepuari na maliu ai o ia … ma sa ou inuina le ipu oona o le faamavae atu i lo’u lava toto ma aano.” Ae e lei uma ai ona tofotofoga. Sa ma’i le toalua o Mary, ma e tolu vaiaso talu ona maliu le pepe, ae maliu foi o ia.

Na tusia e Mary: “O lea, a o sefuluiva lava o’u tausaga, ma faavauvau i se vaitau puupuu e 20 aso, i lo’u toalua ma si a’u tama e toatasi, i se nuu ese e fiaselau maila le mamao mai lo’u aiga, ma se mauga o faigata ua tu mai i o’u luma … ma sa ou moomoo maimau e, pe ana ou oti faatasi ai ma nai a’u pele.”

Sa faaauau le tala a Mary: “I se afiafi o se tasi Aso Sa, sa ma savalivali ai ma la’u uo. … na ou manatua ai le toesea o lo’u toalua ma lo’u matua tuulafoaiina lava ma a’o ou tagi masusu, sa mafai ona ou vaai, e faapei o se faaaliga faalemafaufau, i le mauga tifato o le olaga e tatau ona ou a’ea ma sa ou lagonaina le moni o lena mea faatasi ai ma se malosiaga tele. Sa lofituina au i le le fiafia, aua ua iloa e le fili le taimi e osofaia ai i matou, peitai [o lo tatou Faaola o Iesu Keriso] e sili atu le malosi e laveai. O le … fesoasoani na tuuina mai e le Tama, na mafai ai ona ou tau ma le autau uma, lea na foliga mai sa faasagatau mai ia te au i lena taimi.”⁸

Sa aoaoina e Mary i vaitausaga mu’amu’a o le 19, e aumai e le Togiola le faamautinoaga, o mea uma e le o talafeauga i lenei olaga, e mafai lava ona faasa’o—e oo lava i faanoanoaga e aupito loloto.

Mataupu Faavae 2: E i ai le mana i le Togiola e mafai ai ona tatou faatoilaloina le tagata o le lalolagi ma avea ai ma soo moni o Iesu Keriso.⁹

E i ai le ala e iloa ai ua tatou aoaoina se aoaoga faavae po o se mataupu faavae o le talalelei. O le taimi pe a mafai ona tatou aoao atu le aoaoga faavae po o le mataupu faavae i se ala e mafai ai e se tamaitiiti ona malamalama. O se punaoa taua e aoao ai le fanau ia malamalama i le Togiola, o se talafaatusa o loo maua i se lesona a le Peraimeri. Atonu e mafai ona fesoasoani lena ia i tatou a o tatou aoaoina a tatou lava fanau, fanau a fanau, po o uo o isi tapuaiga e mananao ia malamalama i lenei aoaoga faavae taua.

“Sa i ai se [fafine] sa savali i le auala ma pau ai i se lua loloto ma sa le mafai [e ia] ona sao mai i fafo. Po o le a lava le mea sa [ia] faia, sa le mafai a ona sau [ia] lava i fafo. Sa taufono mai le [fafine] mo se fesoasoani ma sa fiafia ina ua lagona atu e se tagata na pasi ane ai [o ia] ma sa ia tuutuu ifo ai i lalo se apefai i le lua. O lea na mafai ai e [ia] ona a’e mai i luga o le lua ma toe maua ai [lona] saolotoga.

“E faapei i tatou o le [fafine] i le lua. O le faia o le agasala, e pei o le pau i totonu o le lua, ma e le mafai ona tatou sao mai i fafo ia i tatou lava. E faapei lava ona lagona e le tagata na savali ane le taufono a le [fafine] mo se fesoasoani, na auina mai e le Tama Faalelagi Lona Alo Pele e Toatasi e saunia le auala tatou te sao ai. O le Togiola a Iesu Keriso e mafai ona faatusa i le tuutuu ifo i lalo o le apefai i le lua; ua tatou maua ai le auala e fe’a’ei mai ai i fafo.”¹⁰ Peitai, e tele atu mea ua faia e le Faaola nai lo le tuutuu ifo i lalo o le apefai. Na “afio mai o ia i lalo i totonu o le lua ma fai ai ina ia mafai ona tatou faaaogaina le apefai e sao mai ai.”¹¹ “E faapei lava ona tatau i le [fafine] i le lua ona a’e mai i luga i le apefai, e tatau foi ona tatou salamo i a tatou agasala ma usitai i mataupu faavae ma sauniga o le talalelei ina ia fe’a’ei mai ai i fafo o le lua ma aoga ai le Togiola i o tatou olaga. O lea, a uma mea uma e mafai ona tatou fai, ona mafai lea e le Togiola ona faaagavaaina i tatou e toe foi atu i le afioaga o le Tama Faalelagi.”¹²

Talu ai nei sa ou maua ai le avanoa e feiloai ai i se paionia o ona po nei, o se afafine faapelepele o le Atua ma o se tagata faatoa liliu mai i le Ekalesia i Chile. O ia o se tina nofo toatasi ma sana fanau tama laiti e toalua. O le mana o le Togiola, na mafai ai e ia ona faagalo le taimi ua tuanai ae ua taumafai ma le faamaoni nei e avea o se soo moni o Iesu Keriso. A ou mafaufau ia te ia, ou te manatua ai se mataupu faavae sa aoao mai e Elder David A. Bednar: “E ese le iloa o Iesu Keriso na afio mai i le lalolagi e maliu mo i tatou—o se itu taua faalefaavae i le aoaoga faavae a Keriso. Peitai, e tatau foi ona tatou iloa talisapaia le finagalo o le Alii, e ala i Lana Togiola ma le mana o le Agaga Paia, ia ola i totonu ia i tatou—e le gata ia taitaiina ai i tatou ae ia faamanaina ai foi i tatou.”¹³

A o ma talanoaina ma lenei uso mai Chile se auala e tumau ai i le ala e tau atu i le ola e faavavau, sa ia faamautinoa mai ma le sagisagi fiafia ia te au, ua naunau o ia e faaauau ai i le ala. Sa alu ese o ia mai le ala i le tele o lona olaga, ma sa ia tautino mai e leai se mea “o i ai iina” i tua o le ala na toe manao e faafoi mai i lona olaga. Ua ola nei i totonu ia te ia le mana o le Togiola e mafai ai. Ua tusia ai i lona loto.

O lena mana e le gata ina mafai ai e i tatou ona fe’a’ei ese mai i lena lua, ae tatou te maua ai foi le mana e faaauau ai i le ala sa’o ma le vaaapiapi e toe foi atu ai i le afioaga o lo tatou Tama Faalelagi.

Mataupu Faavae 3: O le Togiola o le faamaoniga silisili lea ua tatou maua, i le alofa o le Tama mo Lana fanau.

Manaia pe a tatou manatunatu loloto i le saunoaga musuia lea a Elder Oaks: “Manatu i se tulaga mamafatu atonu na i ai i lo tatou Tama Faalelagi i le auina mai o Lona Alo e onosa’ia mafatiaga e le mafaamatalaina mo a tatou agasala. O le faamaoniga aupito silisili lea o Lona alofa mo i tatou taitoatasi!”¹⁴

O le faatinoga maualuga lava o le alofa e tatau ai ona tatou o ifo i o tatou tulivae i le tatalo ma le lotomaulalo e faafetai atu i lo tatou Tama Faalelagi i le tele o lona alofa mo i tatou na Ia auina mai ai Lona Alo Pele e Toatasi ma atoatoa, e puapuagatia mo a tatou agasala, o tatou lototiga, ma mea uma e foliga e le talafeagai i o tatou lava olaga taitoatasi.

Manatua le fafine lea na saunoa talu ai nei Peresitene Dieter F. Uchtdorf? Na ia saunoa: “Na fai mai ma loimata se tasi tamaitai o le na aafia i ni tausaga i tofotofoga ma faanoanoaga faapea, “Ua ou iloa nei ua pei lava a’u o se 20-tala-pepa tuai—ua maanuminumi, masaesae, palapala, matafi, ma mafugafuga. Ae o a’u lava o se 20-tala-pepa. O loo i ai lo’u aoga. Atonu e ui lava ua le lelei o’u foliga, ma e ui ua ou palapala ma ua tuai, ae o loo atoa pea lo’u aoga, o se 20-tala’”¹⁵

Ua iloa e lenei fafine o ia o se afafine faapelepele o lona Tama Faalelagi, ma ua lava lona taua ia te Ia, ua auina mai ai Lona Alo e togiola mo ia lava. E ao i uso taitasi i le Ekalesia ona iloa le mea ua iloa e lenei fafine—o ia o se afafine faapelepele o le Atua. E faapefea i le iloa o lo tatou taua ia te Ia ona suia ai le ala tatou te tausia ai a tatou feagaiga? E faapefea i le iloa o lo tatou taua ia te Ia ona aafia ai lo tatou naunau e auauna atu i isi? E faapefea i le iloa o lo tatou taua ia te Ia ona faateleina lo tatou manao e fesoasoani atu ia i latou e manaomia ona malamalama i le Togiola e pei ona tatou i ai—ia matua loloto ifo i lalo? A oo ina tusia i le ta’ele o o tatou loto taitoatasi le aoaoga faavae o le Togiola, ona amata lea ona avea i tatou ma ituaiga o tagata e finagalo ai le Alii, pe a toe afio mai o Ia. O le a Ia silafia i tatou o ni Ona soo faamaoni.

Talosia ia matua’ia e le Togiola a Iesu Keriso se “suiga tele” i o tatou loto.¹⁶ A fagua i tatou i lenei aoaoga faavae, na folafola mai e se agelu a le Atua e avea ma “tala fiafia e olioli tele ai,”¹⁷ ou te folafola atu, o le a tatou lagonaina e faapei ona lagona ai e le nuu o le Tupu o Peniamina. Ina ua uma ona latou tatalo ma le malosi tele ia aoga le Togiola i o latou olaga, “sa faatumulia i latou i le olioli”¹⁸ ma sa latou “naunau e ulu atu i se feagaiga ma le … Atua e faia lona finagalo ma usiusitai i ana poloaiga i mea uma.”¹⁹ O le osia, tausia, ma olioli i a tatou feagaiga o le a avea ma faamaoniga ua tusia moni le Togiola a Iesu Keriso i o tatou loto. Faamolemole ia manatua, uso e nei mataupu faavae e tolu:

“O mea uma lava e le talafeauga e uiga i le olaga, e mafai ona faasa’o e ala i le Togiola a Iesu Keriso.”²⁰
E i ai le mana i le Togiola e mafai ai e i tatou ona faatoilalo le tagata o le lalolagi ma avea ai o ni soo moni o Iesu Keriso.²¹
O le Togiola o le faamaoniga silisili lea ua tatou maua o le alofa o le Tama mo Lana fanau.²²

“Pe a mavae ia aso, ua fetalai mai ai Ieova, ou te tuuina la’u tulafono i totonu ia te i latou, ma ou tusi ai i o latou loto; e fai foi a’u mo latou Atua, oi latou foi e fai mo’u nuu.”²³ Ou te valaaulia i tatou ina ia ole atu i le Alii e tusia nei mataupu faavae o le Togiola i o tatou loto. Ou te molimau atu e moni ia. I le suafa o Iesu Keriso, amene.