Puipui le Fanau
Saunia e Elder Dallin H. Oaks
O Le Korama a Aposetolo e Toasefululua
E leai se tasi e tatau ona teenaina le aioiga ia tatou tutufaatasi ia faateleina lo tatou popolega mo le tulaga manuia ma le lumanai o a tatou fanau—le tupulaga faiae.
E mafai ona tatou manatuaina uma o tatou lagona pe a tagi se tamaitiiti laitiiti ma aapa mai ia i tatou mo se fesoasoani. Ua tuu mai ia i tatou e se Tama Faalelagi alofa na lagona e uunaia ai i tatou ia fesoasoani atu i Ana fanau. Faamolemole ia manatunatu i na lagona a o ou lauga atu e uiga i lo tatou tiutetauave e puipui ma galulue mo le tulaga manuia o fanau.
Ou te tautala atu mai se vaaiga o le talalelei a Iesu Keriso, e aofia ai Lana ata o le faaolataga. O lo’u valaauga. Ua i ai i taitai o le Ekalesia i le lotoifale se tiutetauave mo se faataatiaga faalelaueleele, e pei o se uarota po o se siteki, ae ua nafa se Aposetolo ma le molimau atu i le lalolagi atoa. I malo uma, o ituaiga uma ma gagana, o fanau uma o fanau a le Atua.
E ui lava ou te le tautala i faaupuga faaupufai po o aiaiga mo tagata lautele, ae e pei foi o taitai o isi Ekalesia, e le mafai foi ona ou tautala mo le tulaga manuia o fanau e aunoa ma le talanoaina o filifiliga ua faia e tagatanuu, taitai faalemalo, ma tagata faigaluega i faalapotopotoga tumaoti. Ua tatou i ai uma i lalo o le poloaiga a le Faaola ia fealofani ma fetausiai le tasi ma le isi, aemaise lava mo e ua vaivai ma lē malupuipuia.
O fanau e maualuga tele le vaivai. E itiiti pe leai foi se malosi latou te puipuia pe tausi ai i latou lava ma itiiti foi se uunaiga i le tele o mea ia e taua i lo latou tulaga manuia. E manaomia e le fanau isi e tautatala mo i latou, ma latou te manaomia ni tagata e faia ni faaiuga o e e faamuamuaina lo latou tulaga manuia i lo mea e fiafia i ai tagata matutua manatu faapito.
I.
I le lalolagi atoa, ua faateia i tatou i le faitau miliona o fanau aafia i solitulafono leaga a tagata matutua ma le manatu faapito.
I nisi o atunuu o loo fevatauai, ua ave faamalosi ai le fanau e fai ma fitafita i vaegaau faatuiese.
I se lipoti a Malo Aufaatasi o loo ta’ua ai e faapea ua silia ma le lua miliona tamaiti e sauaina i tausaga taitasi e ala i amioga faatalitane ma ponokalafi.1
Mai le vaaiga i le ata o le faaolataga, o se tasi o sauaga aupito sili ona ogaoga o fanau o le taofia lea o lo latou fananau mai. O se faiga lea i le lalolagi atoa. O le fananau mai o tamaiti i le malo o le Iunaite Setete o le tulaga aupito sili lea ona maualalo i le 25 tausaga,2 ma o le fananau mai o tamaiti i le tele o atunuu Europa ma Asia ua maualalo ifo ma tulaga tului mo le tele o tausaga. E le na o se faafitauli faalelotu lenei. A o faaitiitia le aofai o le tupulaga faiae, ua faavaivaia foi aganuu ma ua faaitiitia foi malo ma e iu lava ina mou atu.
I se tasi mafuaaga o le faaitiitia o le fananau mai o tamaiti o le faatinoga lea o le taotoga o le faamutaina o se maitaga. I le lalolagi atoa, pe tusa e silia ma le 40 miliona taotoga i le tausaga e tasi.3 E tele tulafono o loo faatagaina ai pe faalauiloa ai foi ia taotoga o le faamutaina o maitaga, ae ia i tatou o se mea leaga tele lenei mea. O isi sauaga o fanau lea o loo tupu i le taimi o maitaga o aafiaga e oo i ai le pepe e lei fanau mai ona o se taunuuga o le le lelei o meaai a le tina po o le faaaogaina o fualaau faasaina.
O loo i ai se malapagatia ua iloagofie, ua tele tamaiti e fasiotia pe faamanualiaina a o lei fananau mai a o lea foi e naunau ni matua e le mafai ona fanauina ni fanau, e saili atu i ni pepe ina ia vaetamaina.
O le sauaina o tamaiti po o le lafoaia o fanau lea e tupu pe a mavae le fanau mai o loo sili atu ona vaaia faalauaitele. I le lalolagi atoa, e toetoe lava a valu miliona fanau e feoti a o lei atoa le tai lima tausaga, o le tele lava e mafua mai i faamai e mafai ona togafitia ma puipuia.4 Ma ua lipotia mai e le Faalapotopotoga o le Soifua Maloloina o le Lalolagi e faapea e tasi i le fa tamaiti e le mafai ona tutupu ae malolosi e pei ona tatau ai, faalemafaufau ma faaletino, ona o le le lava o meaai.5 O le nonofo ai ma faimalaga solo faavaomalo, ua matou vaaia ai o ni taitai o le Ekalesia le tele o nei tulaga. Ua lipotia mai e le au peresitene aoao o le Peraimeri ia fanau o loo ola i tulaga “tatou te le mafaufauina.” Sa faapea mai se tina i le Atu Filipaina: “O nisi taimi e le lava ai ni matou tupe mo ni meaai, ae e le afaina lena ona ou te maua ai le avanoa e aoao ai la’u fanau e uiga i le faatuatua. Matou te faapotopoto ma tatalo mo se toomaga, ma e vaaia e le fanau le faamanuiaina o i matou e le Alii.”6 I Aferika i Saute, sa feiloai ai se tagata faigaluega o le Peraimeri ma se teineitiiti laitiiti, ua tuuatoatasi ma le faanoanoa. I ni tali tau le lagona i ni fesili alofa, sa ia fai mai ai e leai sona tina, leai se tama, ma e leai foi se tina matua—ua na o se tama matua o loo tausia o ia.7 O ia faalavelave e taatele i se konetineta lea e toatele ai ē tausia fanau ua maliliu i le AIDS.
E oo lava foi i malo mauoa o loo faamanualia ai lava le fanau laiti ma le autalavou i le tuulafoaiina. O fanau o loo tutupu ae i le mativa e leaga le tausiga o le soifua maloloina ma lē lava ni avanoa faaleaoaoga. Ua aafia foi i latou i siosiomaga lamatia i o latou siosiomaga faaletino ma faaleaganuu ma e oo foi i le tuulafoaiina e o latou matua. Sa faasoa mai talu ai nei e Elder Jeffrey R. Holland le aafiaga o se alii leoleo AAG. I se suesuega na ia maua ai ni fanau laiti se toalima o loo faapupuu faatasi ma taumafai e momoe e aunoa ma se faamalu i luga o se fola palapala i se fale o loo inupia ai ma patī lo latou tina ma isi. Sa leai se meaai i le fale e aveesea ai le fiaai. Ina ua uma ona ia faamomoeina le fanau i se moega ua ufiufiina, sa tootuli le leoleo ma tatalo mo lo latou puipuiga. A o ia savali ese atu i le faitotoa, sa oso atu ia te ia se tasi o i latou, pe ono tausaga, uu lona lima, ma augani atu, “E mafai ona e vaetamaina au faamolemole?”8
Tatou te manatua le aoaoga a lo tatou Faaola a o ia faatuina se tamaitiiti laitiiti i luma o Ona soo ma tautino atu:
“Ai se talia se tamaitiiti faapenei ona o lo’u igoa, ua ia talia au.
“Ai se na te faatausuai i se tasi o i latou nei e faatauvaa o e faatuatua ia te au, e lelei i lea tagata pe ana nonoa se maaolo tele i lona ua, ma faagotoina o ia i le moana loloto” (Mataio 18:5–6).
Pe a tatou mafaufau i le matautia o mea e tatau ona puipuia mai ai le fanau, e tatau foi ona tatou faaaofia ai ma le sauaina faalelagona. O matua po o isi tagata e tausia tamaiti po o faiaoga po o uo e faatausuai, taufaamatau, pe faamaasiasia le fanau po o le autalavou e mafai ona latou faamanualiaina tumau [i latou] nai lo se manua faaletino. O le faia ia lagonaina e se tamaitiiti po o se talavou e leai sona taua, lē alofaina, po o le lē manaomia e mafai ona faatupuina ai se manuaga ogaoga ma tumau i lona tulaga manuia faalelagona ma le tuputupu ae.9 O tagata talavou e tauivi ma soo se tulaga e le masani ai, e aofia ai le tosina atu i le itupa e tasi, e patino lava le leaga ma e manaomia ai le malamalamaaga agaalofa—ae le o le taufaifai i ai po o le faaesea.10
Faatasi ai ma le fesoasoani a le Alii, e mafai ai ona tatou salamo ma suia ma ia sili atu ona alolofa ma fesoasoani atu i fanau—i a tatou lava fanau ma i latou o vagaia i tatou.
II.
O loo i ai ni nai faataitaiga o le taufaamatau faaletino pe faalelagona i fanau e taua foi e pei o na taufaamatau e sau mai ia latou sootaga ma o latou matua po o e vaavaaia i latou. Sa saunoa mai Peresitene Thomas S. Monson e uiga i le mea sa ia ta’ua o “galuega leaga” o le sauaina o fanau, lea e nutimomoia ai pe faaleagaina ai e se matua ia foliga o se tamaitiiti, faaletino pe faalelagona.11 Sa ou faanoanoa ona sa tatau ona ou suesue i faamaoniga faateia o ia tulaga i le taimi o la’u tautua i le Faamasinoga Sili i Iuta.
I le taua aupito silisili i le tulaga manuia o le fanau, o le tulaga lea i le faaipoipo pe leai o o latou matua, o le natura ma le umi o le faaipoipoga, ma le mea aupito taatele, o le aganuu ma faamoemoega o le faaipoipoga ma le tausia o le tamaitiiti i le mea o loo latou nonofo ai. Ua faamalamalama mai e ni tagata tomai se toalua o le aiga: “I le talafaasolopito atoa, sa avea lava le faaipoipoga ma se faalapotopotoga muamua ma le sili mo le foafoaina ma le tausiaina o le fanau. Ua maua ai se fusi faaleaganuu lea e saili atu e faafesootai ai le tama i lana fanau e ala i le fusia o ia i le tina o lana fanau. Ae i le taimi nei, ua faateleina pea le tuleieseina o le fanau mai le taulaiga atoa.”12
Ua faamatalaina e se polofesa o tulafono i Harvard le tulafono o loo i ai nei ma le uiga e faatatau i le faaipoipoga ma le tatalaga o faaipoipoga: “O uiga Faa-Amerika [o i ai nei] e uiga i le faaipoipoga, e pei ona ta’ua i le tulafono ma i se aoaoga sili ona lauiloa, e faapenei: o le faaipoipoga o se sootaga lea e i ai muamua lava mo le faamalieina o toalua taitoatasi. Afai e le toe faatinoa lenei matafaioi, e leai se tasi e tuuaia ma o se isi lava o toalua e mafai ona faamutaina i lona loto. … E faigata ona mafaufauina le fanau i nei tulaga; i le tele o tulaga e mafaufau i ai e le taua i latou.”13
Ua aoao mai taitai o la tatou Ekalesia e faapea o le mafaufau i le faaipoipoga “ua na o se maliliega e mafai ona ulu i ai mo le faamalieina … ma toe vavaeeseina ai pe a oo mai se faigata muamua lava … o se faatinoga faatiapolo ua agavaa mo se faasalaga matuia,” aemaise lava le “mafatia ai fua o le fanau.”14 Ma e aafia ai ma fanau i le tatalaga o faaipoipoga. E silia ma le afa o faaipoipoga na tatalaina i se tausaga talu ai nei na aafia ai ni ulugalii sa i ai ni fanau laiti.15
E toatele tamaiti semanu e maua faamanuiaga o le tausiaina e o latou matua uma pe ana faapea e mulimuli o latou matua i lenei aoaoga musuia i le folafolaga i aiga: “O le tane ma le ava ua i ai le tiutetauave paia e alofa ma tausi e le tasi le isi ma a la fanau. … Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ma ia aoao i latou ia alolofa ma feauaunaai.”16 O aoaoga aupito sili ona mamana mo fanau e auala lea i faataitaiga a o latou matua. O matua e tatala faaipoipoga e mautinoa lava ua la aoao atu se lesona le lelei.
O loo i ai ni tulaga mautinoa ia e talafeagai ai ona tatala se faaipoipoga mo le lelei o le fanau, ae o na tulaga e le masani ai.17 I le tele o faigata o faaipoipoga e tatau ai i matua femisaai ona mafaufau mamafa i manaoga o le fanau. Faatasi ai ma le fesoasoani a le Alii, e mafai ai ona la faia lena mea.
O fanau o tagata ia e muamua lava mafatia i tulafono o loo i ai nei ia o loo faatagaina ai le mea ua ta’ua o le “tete’a ae leai se sese.” Mai se manatu o le fanau, o le tatalaga o faaipoipoga ua faigofie tele. I le aoteleina o sailiiliga o le malamalama faaagafesootai, sa faaiuina ai e se tagata tomai faaeteete e faapea “o le faatulagaga o le aiga lea e maua ai taunuuga aupito sili ona lelei mo fanau, i se averesi, e toalua matua moni o loo tumau pea le la faaipoipoga.”18 Sa matauina e se tusitala o le New York Times “le mea moni faateia e oo lava i se faaipoipoga e masani ai ua faaitiitia i le Iunaite Setete … ua faateleina faamaoniga mo le taua o le faaipoipoga i le tulaga manuia o fanau.”19 O lena mea moni e tatau ona tuu atu ai se taiala taua i matua ma ē o le a avea ma matua, atoa ai ma taitai ina ia faateleina lo latou gauai atu i mea e silisili ona lelei mo fanau e ese mai le manatu faapito o tagata palota ma tagata e lagolagoina tele ia mea e fiafia i ai tagata matutua.
E faamanualiaina foi le fanau i faaipoipoga ia e le o faia. O ni nai mea moni e uiga i le tulaga manuia o la tatou tupulaga faiae ua sili atu ona faapopoleina nai lo le lipoti talu ai nei e faapea e 41 pasene o pepe fananau mai i le Iunaite Setete e fananau mai i tamaitai e le o faaipoipo.20 O tina e le o faaipoipo e matua anoanoai luitau o i ai, ma ua manino le faamaoniga o loo i ai a latou fanau i se tulaga le lelei tele pe a faatusatusa i fanau e tausia e matua faaipoipo.21
O le toatele o fanau e fananau mai i tina lē faaipoipo—58 pasene—sa fananau i ulugalii e nonofo faatasi ae le faaipoipo.22 Po o le a lava sa tatou tala e uiga i nei ulugalii le faaipoipo, o loo faaalia i suesuega e faapea o a latou fanau e mafatia i tulaga le lelei iloga pe a faatusatusa atu i isi tamaiti.23 Mo le fanau, o le fesootaiga tumau o le faaipoipoga e taua.
E tatau foi ona tatou manatu o tulaga le lelei foi ia e tasi mo fanau e tausia e ni ulugalii o le itupa e tasi. O le aoaoga o le malamalama faaagafesootai e finauina leaga ma faaupufai i aafiaga faaumiumi o lenei mea i fanau, ona o le mafuaaga autu, e pei ona matauina ai e se tusitala o le New York Times, o le faaipoipoga o le itupa e tasi o se suesuega faaagafesootai, ma e pei lava o le tele o suesuega o le a tele se taimi e faaaluina ia malamalama ai i ona taunuuga.”24
III.
Ua ou talanoa atu mo le fanau—o fanau i soo se mea. E ono teenaina e nisi tagata nisi o nei faataitaiga, ae e leai se tasi e tatau ona teenaina le aioiga ia tatou tutufaatasi ia faateleina lo tatou popolega mo le tulaga manuia ma le lumanai o a tatou fanau—le tupulaga faiae.
O loo matou talanoa atu e uiga i fanau a le Atua, ma e faatasi ai ma Lana fesoasoaniga mamana, e mafai ai ona tatou faia ni mea sili atu e fesoasoani ai ia i latou. I lenei augani, e le gata ai ou te lauga atu i le Au Paia o Aso e Gata Ai ae faapena foi tagata uma o faatuatuaga faalelotu ma isi o loo i ai se faatulagaga taua lea e mafua ai ona latou mafaufau e sili atu le taua o manaoga patino o isi nai lo o latou lava manaoga patino aemaise lava i le tulaga manuia o fanau.25
Ua nofouta foi tagata faalelotu e uiga i le aoaoga a le Faaola i le Feagaiga Fou e faapea o fanau iti mama o o tatou faataitaiga ia o le lotomaualalo ma le aoaoina gofie.
“E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi.
“O lenei o se faamaulalo o ia ia te ia e pei o le tamaitiiti nei, e sili lea i le malo o le lagi” (Mataio 18:3–4).
I le Tusi a Mamona tatou te faitau ai i le aoaoga a le Alii toetu i sa Nifae e faapea e tatau ona salamo ma papatisoina i latou “ma avea e pei o se tamaitiiti” a leai e le mafai ona latou maua le malo o le Atua (3 Nifae 11:38; tagai foi Moronae 8:10).
Ou te tatalo ina ia faamaualaloina i tatou lava e pei o tamaiti laiti ma aapa atu e puipui a tatou fanau laiti, aua o i latou o le lumanai, mo i tatou, mo la tatou Ekalesia, ma lo tatou malo. I le suafa o Iesu Keriso, amene.