Avea ma Soo Moni

Saunia e Elder Daniel L. Johnson

O Le Fitugafulu

A tatou usiusitai i Ana poloaiga ma auauna atu i o tatou uso a tagata, ona avea lea o i tatou ma soo ua sili atu o Iesu Keriso.

O i tatou ua ulu ifo i le vai o le papatisoga ma mauaina le meaalofa o le Agaga Paia, ua osifeagaiga ua tatou naunau e tauave i o tatou lava luga le suafa o Iesu Keriso, pe i se isi faaupuga, ua tatou tautino atu i tatou lava o ni soo o le Alii. Tatou te faafouina lena feagaiga i vaiaso taitasi, a o tatou aai ma feinu i le faamanatuga, ma tatou te faatinoina lena tulaga o ni soo i le ala tatou te ola ai. O lena tulaga o ni soo, sa matagofie ona faatino i mea na faia talu ai nei i Mekisiko.

O se tautotogo matagofie mo nuu e toto ai laau aina suamalie i Mekisiko i matu. Sa matua fua tele laau ‘aina, ma sa maualuga foi le faamoemoe mo se seleselega faamanuiaina. Ua uma ona i ai fuafuaga o le a totogi uma nonogatupe, faafou masini ua elea, ma laau ua autausagā, ma taulima matafaioi a le tagata lava ia e pei o pili a’oga mo tagata o le aiga. Na faia foi ni fuafuaga mo tafaoga faaleaiga. Sa i ai se uiga masani o le faamoemoe maualuga. Ona oo lea i se afiafi o se Aso Gafua i le taufaaiuiuga o Mati, sa agi mai se matagi o le taumalulu, ma sa amata ona toulu le kiona. Sa toulu pea le kiona seia aulia le tolu i le vaveao. Ona oo lea, a o gasolosolo ese atu ao, sa pau faafuasei le fua o le tau. O le po atoa ma le taeao po, sa faia ai taumafaiga uma e faasao ai sina vaega o fua o laau. Ae na le faamanuiaina. Ua malulu tele, ma sa ‘aisā uma le fuata. O le a leai se seleselega e faatau atu i lena tausaga. Na fotuai mai le Aso Lua ma le le fiafia ma le lotovaivai i le galoma atu o fuafuaga matagofie, faamoemoega, ma miti o le aso ananafi.

Sa ou mauaina se imeli e uiga i le taeao o le Aso Lua mai ia Sandra Hatch, le faletua o John Hatch, a o fesoasoani muamua i le au peresitene o le Malumalu o Colonia Juárez Chihuahua. Ou te lau atua ni vaega o lena imeli: “Na vave ala a’e John pe tusa o le 6:30 e alu i le malumalu e vaai pe tatau ona le faataunuuina le sauniga i le taeao nei. Na toe sau ma fai mai, e leai se kiona o to’a i le mea e paka ai taavale, o lea na fai ai le tonu o le a ma o. Sa ma manatu atonu e i ai ni tagata faigaluega e leai ni faatoaga laau aina o le a o mai, ma o le a mafai ai ona tuu uma le au fai galuega i le sauniga. … E ese le faagaeetia i le vaai atu ua o mai alii, sau lea ma lea. Na o mai, ae leai se moe i le po atoa, i le tau mafaufau i le fuata ua mou atu. … Sa ou matauina i latou i le taimi o la matou fonotaga sauniuni, sa faigata ona pupula mata. Ae nai lo le faapea sa i ai se ‘alofaga lelei e le o mai ai, sa latou o mai. Ma e 38 tagata sa i ai i le sauniga (na tumu)! O se taeao faagaeetia mo i ma’ua, ma sa ma faafetai atu i le Tama Faalelagi mo tagata lelei o loo faia o latou tiute, tusa lava po o le a le mea e tupu. Sa faapitoa lo’u mauaina o le agaga iina i lena taeao. Ou te talitonu na fiafia o Ia i le silafia matou te alolofa i Lona maota ma o se nofoaga lelei e i ai i se taeao faigata faapena.”

E le muta ai iina le tala ma o le mea moni, e faifai pea.

O le toatele lava o i latou na le aoga a latou faatoaga laau aina, sa i ai ni o latou fasifanua e toto ai nisi laau mo le vaitau, e pei o polo feu po o pi. E mafai ona maua se tupe i nei laau, e lava e ola ai seia aulia le isi fuata o togalaau ‘aina. Peitai, sa i ai se isi uso lelei ma sona aiga laiti, sa lei i ai se isi fasi fanua ma sa leai se tupe maua i le tausaga. Sa vaai atu isi tagata o le nuu i le tulaga pagatia o lenei uso, ma sa latou galulue lava latou ma faaalu a latou tupe, e faatulaga se fasi fanua, faaaoga a latou lava masini e tapena ai le fanua, ma tuu atu mo ia ni polo feu e toto.

Ou te iloa tagata ia sa faatoa ou ta’ua. O le iloaina o i latou, sa ou le te’i ai i le mea sa latou faia. Ae mo i latou e le silafiaina i latou na, atonu o le a faia fesili nei e lua, e amata uma i le upu pe aisea. Aisea o le a o mai ai i le malumalu e fai o latou tiute ma galulue, ae e lei momoe i le po atoa, ae ua iloa ua leiloloa uma le vaega tele o la latou tupe maua mo le tausaga atoa? Aisea o le a latou faaaogaina ai mea ua ‘uti’uti nei, ma punaoa ua matuai taua i le taimi nei e fesoasoani ai i se tasi ua matuai manaomia le fesoasoani, ae o la foi e feagai i latou ma tulaga faigata tautupe?

Afai e te malamalama i le uiga o le avea o se soo o Iesu Keriso, ona e silafia lea o le tali i nei fesili e lua.

O le osia o le feagaiga ia avea o se soo o Keriso, o le amataga lea o se faagasologa i le olaga atoa, ma e le faigofie i taimi uma le ala. A tatou salamo i a tatou agasala ma taumafai e fai le mea e finagalo o Ia tatou te faia, ma auauna atu i o tatou uso a tagata e faapei ona Ia finagalo ai, o le a mautinoa lava lo tatou avea ai e faapei o Ia. O le avea e faapei o Ia, ma tasi ma Ia o le sini maualuga lea ma le faamoemoega—ma o le faauigaga moni lea o le soo moni.

E faapei ona fesili le Faaola i Ona soo ina ua asiasi atu o Ia i le konetineta o Amerika, “O lea, o a ituaiga o tagata e tatau ona outou i ai?” Ona tali lea o Ia i Lana fesili, sa Ia fetalai, “E moni ou te fai atu ia te outou, e pei lava o au nei” (3 Nifae 27:27).

O le avea e faapei o le Faaola e le o se galuega faigofie, aemaise i le lalolagi o loo tatou ola ai. Tatou te feagai ma faalavefau ma faigata i aso uma o o tatou olaga. E i ai le mafuaaga o lena mea, ma o se tasi o faamoemoega autu o le olaga nei. A tatou faitau i le Aperaamo 3:25, “Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua.”

O nei suega po o tofotofoga e eseese i natura ma le tele. Ae e leai se tasi o le a tuua lenei olaga e aunoa ma le ui atu ai. O le tele lava, tatou te vaai i tofotofoga e pei o le le aoga o se fuata po o le leai o se galuega, o le oti o sē pele, ma’i, faaletonu i le tino, mafaufau po o lagona, mativa, po o le leai o ni uo. Peitai, e oo lava i le mauaina o faamoemoega aoga, e mafai lava ona aumai ai ma ona tulaga matautia o le faamaualuga e le matineia, lea tatou te faananau atili ai i mamalu o le lalolagi nai lo le faaneetaga o le lagi. E mafai ona aofia ai le lauiloa faalelalolagi, aloaia i tulaga lautele, gafatia tele faaletino, taleni faafaatufugaga po o taaloga, manuia, ma le tamaoaiga. E faatatau i nei tofotofoga, atonu e i ai nisi o i tatou e i ai ni lagona e pei o ia na faaalia e Tevye i le Ili Fagufagu i luga o le Taualuga: “Afai e fetuuina ‘oa, talosia ia fasimate faatasi ai ma au e le Atua ma ia ou le toe ola mai lava!”¹

Ae o tofotofoga ia na ta’ua mulimuli, e ono sili atu ona taufaamata’u ma matautia ma sili atu ona faigata ona faatoilalo nai lo isi na ta’ua muamua. O le a atiina ae lo tatou avea ai ma soo, ma e le faamaonia i ituaiga o tofotofoga tatou te feagai ae o le ala na tatou onosaia ai. Pei ona sa aoaoina ai i tatou e Peresitene Eyring: “O lea, o le tofotofoga aupito sili o le olaga o le vaai lea pe o le a tatou faalogo ma usitai i poloaiga a le Atua i le lotolotoi o afā o le olaga. E le o le onosaia o afā, ae o le filifili o le mea tonu a o tulai mai tofotofoga. Ma o le mala o le olaga o le toilalo lea i lena tofotofoga, ma toilalo ai e toe foi atu ma le mamalu i lo tatou aiga faalelagi” (“Saunia Faaleagaga: Vave Amata ma Ia Mausali,” Liahona, Nov. 2005, 38).

O au o se tamamatua mitamita o fanau a fanau e 23. E le uma lava lo latou faaofoina o a’u i lo latou malamalama i upumoni o le faavavau, e ui lava i le laiti o o latou tausaga. A o ou sauniuni mo lenei lauga, sa ou fesili atu ia i latou taitoatasi e auina mai ia te au se faauigaga puupuu po o le a le uiga ia i latou o le avea ma soo po o sē mulimuli ia Iesu Keriso. Sa ou mauaina uma ni tali matagofie mai ia i latou uma, ae ou te fia faasoa atu na o le tali lenei mai ia Peniamina e valu tausaga le matua: “O le avea ma soo o Iesu Keriso o lona uiga o le avea o se faataitaiga. O lona uiga, o le avea o se faifeautalai ma sauniuni e avea o se faifeautalai. O lona uiga o le auauna atu i isi. O lona uiga e te faitauina tusitusiga paia ma fai au tatalo. O lona uiga, e te tausia ia paia le Sapati. O lona uiga, e te faalogo i uunaiga a le Agaga Paia. O lona uiga, e te alu i le lotu ma alu i le malumalu.”

Ou te ioe i le tali a Peniamina. O le avea ma soo o lona uiga o le faia ma le avea ai. A tatou usiusitai i Ana poloaiga ma auauna atu i o tatou uso a tagata, ona avea lea o i tatou ma soo ua sili atu o Iesu Keriso. O le usiusitai ma le gauai atu i Lona finagalo, e aumaia ai le mafutaga ma le Agaga Paia, faatasi ai ma na faamanuiaga o le filemu, olioli, ma le saogalemu lea e i ai pea lava i le sui lona tolu o le Aiga Atua. Ma e leai lava se isi auala e mafai ai ona maua. O le tulaga aoao, o le gauai atoatoa atu i Lona finagalo e fesoasoani ia i tatou e avea ai faapei o lo tatou Faaola. Ou te toe fai atu, o le avea e faapei o Ia ma tasi ma Ia, o le sini maualuga lea ma le faamoemoega—ma o le mea moni, o le faauigaga lea o le avea ai ma soo.

O le avea ma soo o le mea lea na ou vaai o faatino i le Malumalu o Colonia Juárez ma ona laueleele taulalata ane, a o toe faamautu e uso ma tuafafine i le faatuatua a latou tautinoga i le Atua ma i le tasi ma le isi, e ui lava i mafatiaga faamomoiloto.

Ou te molimau atu a tatou usiusitai i Ana poloaiga, auauna atu i isi, ma gauai atu o tatou manao i Lona finagalo, e moni lava, o le a avea i tatou ma Ona soo moni. Ou te molimau atu ai i le suafa o Iesu Keriso, amene.