O Paionia i Atunuu Uma
O Le Liua ma Suiga i Chile
O papatisoga muamua na faataunuuina i le 1956. O le taimi nei i le Ekalesia ua 1 le malumalu, 9 misiona, 74 siteki, ma toetoe lava a 600,000 tagata o le ekalesia i Chile.
I le faagasologa o le 58 tausaga o lo latou talafaasolopito, na faaalia ai e tagata o le Ekalesia i Chile lo latou gafatia e sui auala, faia ni fetuunaiga laiti i o latou olaga i le itu sa faasino mai e perofeta. O lenei agaga, ua saofaga i le tuputupu ae maoae o le Ekalesia iina i le taimi o le afa seneturi ua mavae. I le taimi nei, ua toeitiiti atoa le 600,000 tagata o le ekalesia i Chile, o le avea o se tagata e toa 1 mai tagata Chile uma e 30 o se tagata o le Ekalesia.1
Ua Asiasi Se Aposetolo i Chile
I le 1851, na taunuu ai Elder Parley P. Pratt (1807–1857) o le Korama a Aposetolo e Toasefululua i Valparaíso ma le faamoemoe e faatulaga le Ekalesia. Ae peitai, o ia ma ana soa e le tautatala faaSipaniolo, sa le tele ni a latou punaoa tautupe, ma sa leai se saolotoga faalelotu i le atunuu, o lea sa le mafai ai ona latou faatulagaina le Ekalesia.
Na fautuaina e Elder Pratt ia Peresitene Polika Iaga (1801–77): “Ua tatau ona faaliliuina ma lolomiina le Tusi a Mamona ma nisi o lomiga taugofie i le gagana Sipaniolo, ona auina atu lea o le talalelei i nei malo a o i ai se mea e o faatasi ma le Perisitua ola mo i latou e faitauina—e oo lava i na tusitusiga o loo i ai folafolaga a le Atua, o tatalo ma le faatuatua o tagata anamua, ma le mana ma le Agaga o le Atua e galulue faatasi ma i latou i le toefuataiga o le aiga o Isaraelu.”2
Ua Faavaeina le Ekalesia
E ui lava i taumafaiga anamua a Elder Pratt, na silia ma le 100 tausaga ua mavae ae faatoa faavaeina tumau le Ekalesia i Chile. I le 1956, na auina atu ia Elder Joseph Bentley ma Verle Allred mai le Misiona a Atenitina e talai atu le talalelei i Chile, lea ua fiafia i le faateleina o le taliaina o tulaga faalelotu. I Santiago, sa maua e nei faifeautalai le lagolago o le aiga o Fotheringham, o tagata o le ekalesia o e na siitia atu mai Panama ma sa faamoemoe mo faifeautalai e o mai.
O papatisoga muamua sa faatinoina i Chile i le aso 25 o Novema, 1956, i se vaitaele i se kalapu o le atunuu i Santiago. Na ta’ua e Elder Allred, “Sa matou o i le kalapu o le atunuu a o lei oso ae le la ma sa faia se sauniga ma se tatalo ma ni lauga pupuu. Sa ou ulu atu i le vai faatasi ma Uso Garcia; sa ou papatisoina o ia muamua, ma sosoo ai ma isi tagata e toavalu ina ua maea o ia. O se mea faapitoa lenei mea na tupu. O le mea sa matou lagonaina uma sa le mafaagaloina. … O nei tagata o le a avea ma paionia o le Ekalesia i Chile ma ou te talitonu o i latou uma taitoatasi sa tumau faamaoni seia oo i le oti: o le au García, le au Saldaño ma Sister Lanzarotti.”3
Valaauina o Taitai
Ia Fepuari 1959, na asiasi ai i Chile Spencer W. Kimball (1895–1985) o le Korama a Aposetolo e Toasefululua ma faamamafa atu le manaomia o le atiina ae o taitai i le lotoifale. O se tasi o taitai muamua i le lotoifale, o Carlos Cifuentes, o le sa avea ma fesoasoani i le peresitene o le misiona, o Robert Burton. O Elder Julio Jaramillo, lea na mulimuli ane avea ma Fitugafulu Eria ma se peresitene o le malumalu, sa faamatalaina lenei aafiaga: “Sa ou maua la’u uluai faaaliga e uiga ia Uso Cifuentes ina ua valaaulia au i se sauniga perisitua ina ua mavae lo’u papatisoga. Ina ua amata le sauniga, sa sau o ia i le pulelaa ma e pau le mea sa ou vaaia o ona atigilima palapala, lanu uliuli. Sa ou mafaufau, ‘E faapefea ona taitaia e lenei alii se sauniga faatasi ma le peresitene o le misiona pe afai e palapala ona lima?’ O le manatu lena seia oo ina ia amata ona tautala mai ma na galo ia te au mea uma ina ua ou lagonaina lona agaga. I upu faigofie sa ia tuuina mai ni manatu faavae loloto ia i matou. O ia o se enisinia o masini mamafa ma o Aso Toonai e umi ai ona ia galue, ona faamama lea o ona lima, ae ona o le utiuti o nai vaega o loo maua i le fale enisinia sa le mafai ai ona aveesea uma le suauu. O iina sa ou aoao ai ia aua nei ou faamasinoina tagata e ala i foliga ae nai lo lena ia faataua i latou mo le tagata moni o avea ai i latou.”4
Faamalolosia o le Tupulaga Faia’e
I le aluga o le vaitau o le 1960 ma le 1970, sa faamalosia ai le Ekalesia i Chile e le gata i le faateleina o taitai atamamai i le lotoifale ae e ala foi i polokalama fou o le fausiaina ma aoaoga. Na aofia ai le fausiaina o falelotu faatasi ai ma le faatuina o aoga, seminare, ma inisitituti a le Ekalesia.
Ia Mati 1964, na faavaeina ai i Chile ni aoga tulagalua muamua e faafoeina e le Ekalesia. Mulimuli ane sa tatalaina ai ni nai a’oga, ma o le lesitala na oo atu i le silia ma le 2,600 tamaiti aoga.E oo atu i le faaiuiuga o le vaitau o le 1970 ma le amataga o le vaitau o le 1980, ua amata ona tele aoga a le malo ua avanoa, ma sa fofogaina e le Ekalesia le tapunia o aoga i Chile.
O le tuuina mai o ni manatu faaalia i le polokalama o aoaoga, na saunoa mai ai Elder Eduardo A. Lamartine, o le sa avea muamua ma Fitugafulu Eria ma o loo avea nei ma faufautua o talafaasolopito a le Ekalesia i Chile, “O aoga i Chile sa avea ma aafiaga sili i le aoaoina o le potosalalau ma le faaleagaga o le faitau afe o tagata talavou, ma sa latou saofaga atu i le sauniunia o taitai ma faifeautalai i tausaga na mulimuli mai.”5
Na amata le polokalama o seminare ma inisitituti i Chile i le 1972. I le taimi muamua, sa auai tamaiti aoga i se polokalama o le suesue i le fale ma vasega faalevaiaso. Mulimuli ane, sa faatulagaina ai nisi vasega masani. O nei polokalama na faamanuiaina ai tagata talavou o le atunuu, ma fesoasoani ia i latou e sauniuni mo le galuega faafaifeautalai faamisiona. O Elder Eduardo Ayala, o se uso sa avea muamua ma Fitugafulu, sa avea ma se tasi o faiaoga muamua o le seminare ma mulimuli ane galue mo le Ofisa o Aoga a le Ekalesia i Chile. Sa ia fai mai, “Na filifilia e le Alii ia tagata talavou o e sa i ai i lena taimi, ma o le toatele o i latou o ni faifeautalai ua foi mai misiona ma o ni taitai maoae faatasi ai ma ni aiga lelei. … Mo au, o le seminare ma le inisitituti o se auala o le faaolataga i le taimi o le tele o feteenaiga i lo matou atunuu ma ou te faafetai na valaauina au e galue i le ofisa o aoga.”6
O Le Uluai Siteki
I le aso 19 o Novema, 1972, sa faatulagaina ai e Elder Gordon B. Hinckley (1910–2008), ao avea ma se tasi o le Korama a Aposetolo e Toasefululua i lena vaitaimi, le Siteki o Santiago Chile, ma avea Cifuentes Carlos ma peresitene.
O le sauniuniga mo le siteki na faaalia ai uiga o le Au Paia i Chile ma lo latou naunautaiga ia mulimuli i perofeta. Na taunuu Elder Hinckley i Chile i ni nai masina na muamua atu e faatulaga le siteki. Ae ina ua uma ona faia faatalanoaga, sa tolopoina. I lena taimi, e toatele tagata sa feagai ma faafitauli tautupe, ma o nisi o tagata na feagai ma faafitauli o le usitaia o le tulafono o le sefuluai.
Na faamatalaina e Elder Hinckley, “Sa ou toe foi atu i le ono masina mulimuli ane, ma ao faia au faatalanoaga, sa ou iloaina le fua mai o le faatuatua; sa latou toe savavali i le faamaoni i luma o le Alii, sa faatulagaina le siteki, ma talu mai lena taimi ua latou tuputupu ae ma faamanuiaina.”7
O Paionia i luga o Tuaoi
I le taimi nei ua lua siteki i Arika, o le aai aupito i matu i Chile. O le tala ia Gladys ma Juan Benavidez, o uluai tagata liliu mai i Arika, ua faaalia ai le agaga paionia ma le faatosinaga faalelagi i le faatulagaina o le Ekalesia i Chile atoa.
Na faalauiloa mai Uso Benavidez i le Ekalesia i le 1961 ina ua feula mai e le savili ni pepa i lona ala: “O nei itulau o se vaega o le Reader’s Digest Selections ma sa i ai se tusiga faalauaitele e uiga i ‘Mamona,’ o faamatalaina ai o latou olaga ma talitonuga,” o lana tala lea.
E lei leva, ae maua o ia i se mai tuga lava na manaomia ai ni togafitiga faafomai i Santiago. “A o i ai iina, sa ou asia lo’u tuafafine ma iloa ai ua avea o ia ma se tagata o le Ekalesia,” na ia fai mai ai. “Sa ia valaauliaina au i se konafesi faapitoa. A o ou faalogologo atu i le tatalo amata ma mulimuli faalemafaufau i upu, sa ou lagonaina se olioli maoae i lo’u tino atoa ma iloa ai le uunaiga a le Agaga Paia. I le faaiuga o le konafesi, sa ave au e faifeautalai e lulu lima ma le pulega aoao o loo asiasi mai, o Elder Ezra Taft Benson (1899–1994), ao avea ma se tasi o le Korama a le Toasefululua i lena taimi.”
Sa toe foi Uso Benavidez i Arika ma faasoa atu ona aafiaga i lana uo teine, o Gladys Anguilar, lea ua avea nei ma ona faletua. I ni nai aso mulimuli ane, na vaai ai Gladys i ni faifeautalai se toalua o pasi ane i lona fale. “Sa vave ona ma o e saili i laua,” o le tala lea a Uso Benavidez. “I le aso 1 o Iulai, 1961, sa papatisoina i maua, faatasi ai ma le aiga o lo’u toalua. I le aso, ua i ai le ma fanau ma fanau a fanau i le Ekalesia. Ou te matua faafetai i le Alii mo lena matagi lea na feulaina mai le faamatalaga e uiga i le Ekalesia i oʼu lima.”8
O Se Taimi Faigata
I le faiga palota o le 1970, sa avea ma peresitene Dr. Salvador Allende ma faatuina se malo Marxist. O tagata o le Ekalesia sa mafatia i faigata ona o le tau leai o se meaai ma vailaau faafomai, le sauaina soo o faifeautalai, ma le gauai atu i le ala o faasalalauga le lelei.
I le 1973, sa faateleina le faafitauli tautupe ma agafesootai i le taitaiga faamiliteli ma pulega faafitafita lea sa i ai pea seia oo i le 1990. E ui ua faamanuiaina le malo temokalasi o Chile i le taimi nei, o lena luasefulu tausaga o se vaitaimi faigata mo tagata o le ekalesia. O vaega na tetee i le taitaiga faamiliteli na osofaia falelotu ma tagata o le ekalesia ona sa latou manatu o le Ekalesia sa avea ma sui o le malo o le Iunaite Setete. Na saunoa mai Elder Ayala, o se peresitene o le siteki i le taimi lea, “Matou te fono ma le au Pulega Aoao, ma sa latou ta’u mai ia i matou, ‘Faamolemole, faaaoga le poto, tatalo soo, fai mea sa’o, ina ia faatumauina le tulaga maopoopo o tagata i faapotopotoga.’”9
E ui lava i faigata tautupe a le atunuu ma le uiga faatuiese faaupufai na vaevaeina le atunuu o Chile i le amataga o le vaitau o le 1980, na televave le tuputupu ae o le Ekalesia. I le va o le 1970 ma le 1985, o le numera o tagata o le ekalesia i Chile ua faateleina mai le 15,728 i le 169,361.
O Le Malumalu o Santiago
I le 1980, sa faamanuiaina ai le Au Paia i le faasalalauga o le a fausia se malumalu i Santiago, Chile.
Ina ua faapaiaina e Peresitene Spencer W. Kimball le fasi fanua o le malumalu, sa matuai vaivai lava o ia; ae o lona i ai iina na faaalia ai lona alofa mo le Au Paia o Amerika i Saute, na latou galulue faatasi talu mai le 1959. Na fai mai Sister Adriana Guerra de Sepúlveda, o lē sa faamatalaupu mo Tuafafine Kimball i le faapaiaga, “Ina ua ou vaai i le perofeta, o se tagata e itiiti lava ma se foliga agelu, sa amata ona ou tagi ma na le mafai ona maua ni upu e tautala atu ai ia te ia. O le taimi muamua lea mo au e i ai i autafa o se perofeta soifua. O le vaaia o le fofoga taumomoli o le Alii iinei i le lalolagi ma i lo’u atunuu o se mea ofoofogia.”10
Na faapaiaina le malumalu i le 1983, avea ai ma [malumalu] lona lua i Amerika i Saute ma o le [malumalu] muamua i se atunuu e tautatala faa-Sipaniolo.
Elder Jeffrey R. Holland i Chile
Ia Aokuso 2002, sa tofia ai e le Au Peresitene Sili ni uso e toalua o le Korama a Aposetolo e Toasefululua e pulefaamalumalu i ni eria se lua o le Ekalesia: sa tofia ai Elder Dallin H. Oaks i Filipaina, ma Elder Jeffrey R. Holland i Chile. O le galuega ma le uunaiga a Elder Holland ao i ai i Chile e le mafuatiaina, ma o lona aafiaga o le a tumau pea mo augatupulaga.
O le faamoemoega autu a Elder Holland o le tuuina atu o se faataitaiga o le taitaiga i le ala a le Alii. Sa ia fesoasoani e aoao ia taitai fou ma vaavaaia le toe faatulagaga, faamutaina, ma le tuufaatasi o le faitau selau o uarota ma le anoanoai o siteki. O lenei aoaoga ma le toe faatulagaga sa manaomia ona o le televave o le tuputupu ae o le Ekalesia i le atunuu. O lana taitaiga na fesoasoani e faamalosia iunite ma saunia le Ekalesia i Chile mo le lumanai.
E le gata i lea, na faia e Elder Holland nisi fesootaiga taua lava i Chile. Na faamatalaina e Elder Carl B. Pratt o le Fitugafulu, o se fesoasoani i le Au Peresitene o le Eria, nisi o nei sootaga taua: “Na faatuina e Elder Holland se sootaga vavalalata ma Ricardo Lagos [o le peresitene o Chile] ma lona faletua; sa latou faatinoina le tele o galuega faatino o galuega fesoasoani mo tagata. Sa masani Elder Holland i le Aposetoliko o Nuncio [o se taitai Katoliko e maualuga lona tofi] ma isi tagata taua i Chile.”11
Faalagolago i le Lumanai
O taumafaiga a Elder Parley P. Pratt ma Jeffrey R. Holland, o osigataulaga a uluai faifeautalai o e na taunuu i Santiago, o le tuuto o taitai e pei o Carlos Cifuentes ma isi uluai paionia o Chile, tuufaatasia ma le faatuatua ma le tuuto o le faitau selau o afe o e na auai i le Ekalesia i le sili atu nai lo le afa seneturi, na fausia ai se faavae malosi mo le Ekalesia i Chile. I le taimi nei o le atunuu o se aiga i se malumalu (ma le isi na fofogaina mai), o se nofoaga autu e aoao ai faifeautalai, 9 misiona, ma siteki e 74. O le lumanai e lē faatapulaaina i le galuega faaleagaga o le valaauliaina o tagata uma e o mai ia Keriso.
O le tele o atapue i lenei tusiga o se faaaloaloga mai ia Néstor Curbelo; agavale, luga: ata na pueina e filipefrazao/iStock/Thinkstock; pito i lalo: ata na pueina e kavram/iStock/Thinkstock
Faiaoga ma a latou tamaiti aoga o le vasega fa o le aoga a Colegio A. D. Palmer o loo lagolagoina e le Ekalesia, circa 1966.
O le inisitituti o mataupu faalelotu i Temuco o se tasi o le 50 o na ituaiga inisitituti i Chile.
Agavale: ata na pueina e Flora Decker Donaldson; ata o Elder Melvin J. Ballard na pueina e S. W. Ecker © IRI
Ua saunoa atu Peresitene Gordon B. Hinckley i tagata Chile o le Au Paia o Aso e Gata Ai e toa 48,000 i le 1996 i se konafesi i Santiago.
I le tali atu ai i le mafuie o le 2010, na tuufaatasia ai e le autalavou ma tagata matutua o Chile, Mamona Lima Fesoasoani, ni pusa o vailaau faafomai.
kalafi na saunia e Marcelo Silva/iStock/Thinkstock