O La’u MolimauFemilosa’i

Na saunia e Ivy Noche

E alala le tusitala i Sigapoa.

Ia te au, o le moni o le talalelei a Iesu Keriso ma le moni o le Tusi a Mamona o loo femilosai. Afai e moni le talalelei, e moni foi le Tusi a Mamona.

Sa aoaoina e faifeautalai lo’u aiga i le talalelei i lo matou fale i Sigapoa. E lei auai lo’u tama i le Ekalesia, ae na auai lo’u tina. Sa ia aoaoina i matou e uiga ia Iesu Keriso ma Lana talalelei. E oo lava i lou laitiiti, sa ou mitamita e fai atu i a’u uo o a’u o se tasi o le Au Paia o Aso e Gata Ai.

Sa ou talitonu lava i aoaoga a lo’u tina. Ae ina ua avea au ma se talavou matua, sa fesili mai se faifeautalai ia te au pe faafia ona ou faitauina le Tusi a Mamona. Sa fesiligia muamua au e uiga i lenei fesili, ae o le taimi la lenei ona sa ou iloaina ou te lei faitauina le Tusi a Mamona, ou te le iloa pe moni.

O Se Mea Moni e Lemafaafitia

Sa le mafai ona ou toe aloese mai se mea moni e lemafaafitia: o le moni o le talalelei a Iesu Keriso ma le moni o le Tusi a Mamona o loo milo faatasi. Afai e moni le talalelei, e moni foi le Tusi a Mamona. Talu ai sa ou le iloa pe moni le Tusi a Mamona, ua ou lagona i lenei taimi le le mautonu i mea uma lava sa ou tuputupu ae ma talitonu i ai. Sa faatumulia lou mafaufau i le le mautonu, ma o le fesili—“Pe e moni le Tusi a Mamona?”—sa tumau ai lava i lo’u loto.

Na taitaiina foi au e la’u mafutaga tuputupu ae ma le Faaola, o Iesu Keriso, i se manao mo le upumoni. O le aso lea sa ou iloaina ai sa le mafai ona lava mea ou te aoaoina e uiga ia Iesu Keriso e aunoa ma le faitauina ma le faamaoni o le Tusi a Mamona o le aso lea sa ou matuai fia iloa ai lava pe ua moni.

Valaauina e avea ma se Faiaoga

Sa ou tatalo mo le taitaiga. O le taimi lea, na valaauina ai au e lou peresitene o le paranesi e aoao atu le Tusi a Mamona i le vasega o Mataupu Faavae o le Talalelei. Sa ou taliaina le valaauga aua sa ou lagonaina atonu o le tali lea a le Alii e fesoasoani ai ia te au ia iloa le moni o le Tusi a Mamona ma faalatalata atili atu ai i le Faaola.

Sa faigata le aoao atu. Ina ua mavae ni nai aso Aso Sa muamua, sa ou iloaina o le a le mafai ona faamanuiaina au seiloga ou te talitonu i le Tusi a Mamona.

O Tala na Faaalia Mai i lea Mataupu ma lea Mataupu

Sa amata ona ou suesueina le Tusi a Mamona i vaiaso taitasi ma e lei umi ae maua le olioli i a’u faitauga. O tala i le Tusi a Mamona na faaalia mai e ala i lea mataupu ma lea mataupu ma faalatalata atili atu ai au ia Iesu Keriso.

Sa ou faitau i le fanau mai o Keriso, lea na vaai i ai Nifae i se faaaliga:

“Ma sa ou vaai i le aai o Nasareta; ma i totonu o le aai o Nasareta sa ou vaaia ai se taupou, ma sa matua silisili ona lalelei ma paepae o ia. …

“Ma sa fetalai mai o ia ia te au: Faauta, o le taupou ua e vaai atu i ai o le tina lea o le Alo o le Atua, e tusa ma la le tino” (1 Nifae 11:13, 18).

Sa ou faitau ai i le fuafuaga o le fiafia ma iloa ai o le faatuatua ia Iesu Keriso e taua mo lo tatou faaolataga. Na aoao mai Amoleka:

“Ua ou iloa o le a afio mai Keriso i totonu o le fanauga a tagata, e ave i ona luga solitulafono a ona tagata; ma o le a ia togiola mo agasala a le lalolagi; ona ua fetalai mai ai le Alii le Atua.

“… Ona e tusa ma le fuafuaga tele a le Atua Faavavau, e ao ona faia o se togiola, a leai o le a le maalofia le fano o tagata uma” (Alema 34:8–9).

Sa ou faitau i le auauna atu o Iesu Keriso i isi Ana mamoe i Amerika anamua, ma sa ou iloaina o Ia o le Atua o malo uma. Sa Ia fetalai atu i tagata sa Nifae: “O outou ia o i latou ia na ou fai atu ai: Ua ia te au ni isi mamoe e le o i lenei lotoa; e ao foi ona ou aumai i latou, ma o le a latou faalogo i lou leo; ma o le a tasi le lafu, ma tasi le leoleo mamoe” (3 Nifae 15:21).

Na Auauai Mai La’u Molimau

A o ou faitauina le Tusi a Mamona, na susulu lo’u faatuatua ia Iesu Keriso ma ua faalauteleina lo’u malamalama i Lana fuafuaga (tagai i le Alema 32:28).

Ou te molimau atu o le Tusi a Mamona o le maaauau o la tatou tapuaiga. Ua faaalia mai e le Agaga Paia ia te au o Iosefa Samita o se perofeta moni o le na toefuatai mai ai le Ekalesia a le Atua i luga o le fogaeleele ma o le na faaliliuina le Tusi a Mamona mai papatusi auro. O le Tusi a Mamona e molimau ia Iesu Keriso ma e galulue soosootauau ma le Tusi Paia. La te molimau faatasi mai o Iesu Keriso o le Alo moni o le Atua ma o Ia o le Atua o malo uma, ae le na o se tasi.