Savali a le Au Peresitene Sili
O Le Tatalo o le Faatuatua
Saunia e Peresitene Henry B. Eyring
Fesoasoani Muamua i le Au Peresitene Sili
O le tatalo e sili atu nai lo upu tatou te faaleoina atu i le Atua. O se fesootaiga e lua itu i le va o le Atua ma Lana fanau.
Pe a faia tatalo e pei ona tatau ai, tatou te faailoa atu lagona o o tatou loto i ni upu faigofie. E masani lava ona tali mai le Tama Faalelagi e ala i le tuuina o mafaufauga i o tatou mafaufau lea e o mai faatasi ma lagona. Na te faafofoga mai lava i taimi uma i le tatalo faamaoni tatou te faia pe a tatou tatalo atu ma se tautinoga ia usiusitai ia te Ia, po o le a lava Lana tali, ma po o le a foi le taimi e oo mai ai.
E faia e le Alii lenei folafolaga ia i latou uma o e faitau ma tatalo e uiga i le Tusi a Mamona:
“Ma pe a outou maua nei mea, ou te apoapoai atu ia te outou ia outou ole atu i le Atua, le Tamā Faavavau, i le suafa o Iesu Keriso, pe ua le moni ea nei mea; ma afai tou ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.
“Ma o le mana o le Agaga Paia e mafai ona outou iloa ai le moni o mea uma lava” (Moronae 10:4–5).
E mautinoa lava lena folafolaga. E faitau miliona tagata ua tofotofoina ma faamaoniaina lena folafolaga matagofie e uiga i le tatalo e ala i le mauaina o se faamanuiaga lea ua faatumulia ai o latou olaga i le olioli ma le fiafia tumau. O lena folafolaga e faatatau i a tatou tatalo e iloa ai le manatu ma le finagalo o le Atua mo i tatou. E mafai ona tatou faaaogaina i soo se taimi lava tatou te maua ai se fautuaga mai se auauna a le Atua, o le ua faatagaina e tuu mai ia i tatou le taitaiga. Mo se faataitaiga, e mafai ona tatou faalagolago i ai pe a tatou faalogo atu i se lauga i le konafesi aoao. E mafai ona tatou faaaogaina pe a aoaoina i tatou e faifeautalai faatauvaa e valaauina e le Atua e ala i le perofeta soifua. E faatatau foi i le fautuaga tatou te maua mai lo tatou epikopo po o le peresitene o le paranesi.
Mo le tatalo ina ia galue i o tatou olaga, o tulafono e faigofie lava. E tatau ona tatou ole atu ia iloa le mea moni e ala i le tatalo atu i le Tama i le suafa o Iesu Keriso. E tatau ona tatou ole atu ma le loto faamaoni, o lona uiga e tatau ona tatou maua se faamoemoega faamaoni e fai soo se mea e manaomia mai ia i tatou e tusa ma tali a le Atua. Ma o o tatou faamoemoega moni e tatau ona puna mai i lo tatou faatuatua ia Iesu Keriso.
O le tagata sailiili e faitau i le Tusi a Mamona a o lei papatisoina ma faamauina e mafai ona maua uma se faamautinoaga e moni le tusi ma se molimau o Iosefa Samita na ia faaliliuina e ala i le mana o le Atua. A uma ona faamauina o se tagata o le Ekalesia, e mafai ona tatou mauaina le Agaga Paia e avea ma o tatou soa e faamautuina mai isi upumoni. O soo se taimi lava la tatou te tatalo ai i le faatuatua, e mafai ona tatou faamoemoeina o le a molimau mai le Agaga Paia ia i tatou o Iesu o le Keriso, o loo soifua le Atua le Tama, ma e alolofa i Laua ia i tatou ma fanau uma a le Tama Faalelagi.
O se tasi lena o mafuaaga o loo i ai se folafolaga i le Tusi a Mamona o le a tatou maua le alofa mama i o tatou loto a o molimau mai le Agaga Paia ia i tatou o Iesu o le Keriso: “Afai e agamalu ma maualalo se tagata i le loto, ma tautino atu i le mana o le Agaga Paia o Iesu o le Keriso, e ao ina i ai ia te ia le alofa mama” (Moronae 7:44).
O loo i ai se avanoa sili e tuputupu ae ai faaleagaga i Aso Sa anapogi uma. O Aso Sa anapogi e mafai ona fesoasoani ia i tatou e latalata atu ai i aafiaga o Alema ma atalii o Mosaea, o e na tatalo ma anapopogi ina ia iloa le upumoni e faavavau ina ia mafai ona latou aoao atu sa Lamanā i le mana, pule, ma le alofa (tagai Alema 17:3, 9).
I le Aso Sa anapogi tatou te tuufaatasia ai le tatalo ma le anapogi. Mo le faamanuiaina o e matitiva, tatou te tuuina atu se taulaga anapogi limafoai i le epikopo po o le peresitene o le paranesi e tali tutusa lelei ma le tau o ‘aiga e lua tatou te le faaaogaina. E liliu atu o tatou mafaufauga ma a tatou tatalo i le Faaola ma ia i latou ua Ia finagalo tatou te auauna atu i ai e ala i le taulimaina o o latou manaoga faaleagaga ma faaletino.
O lea, e latalatala atili atu ai a tatou tatalo ma faanaunauga e pei o tatalo ma faanaunauga o le Faaola pe a tatou anapopogi ina ia sili atu ona agamalu, aoaoina gofie, ma agaalofa. Ma e pei ona sa Ia faia, tatou te tatalo ia iloa le finagalo o le Tama mo i tatou, ma usitai i ai.