I Luga o Vai
E alala le tusitala i Iuta, ISA.
Sa ou aioi atu i le Tama Faalelagi e aveese lo’u popole ma le faanoanoa, ae a aunoa ma nei tofotofoga, atonu ou te lē taunuu i soo se “nuu folafolaina” o Ia taitaiina atu au i ai.
E tusa ma le ono masina talu ona ou faauu mai le kolisi, sa amata ona ou oo i ni osofaiga o le fefe, popole, ma galu o le atuatuvale. Ou te le iloa po o fea na o mai ai nei lagona, ae sa malolosi ma faavaivai loto.
Sa ou tauivi e tumau le taulai atu. I le galuega, soo se galuega fou na aumaia ai lena atuatuvale na le mafai ai ona ou nofo filemu. E le filemu lou mafaufau, ma e tatavale lou fatu ma ou faapea o le a oso mai i fafo o lou fatafata. Na alualu ai pea lenei tulaga mo le tele o aso, ma a ou toe foi i le fale mai le galuega i aso taitasi, ou te faapau i luga o le nofoa umi. Ou te toe iloa ane, ua uma le afiafi ma ua amata se isi aso faigaluega.
O nei lagona na faifai ai pea mo le tele o masina, na oo lava i le taimi na maua ai sau galuega fou ma sailia ai se fesoasoani faapolofesa.
Sa ou tatalo i taeao uma i le agai atu i le galuega mo le malosi ina ia faamaea ai le aso ma toe foi ai i le fale i lou toalua ma le afafine. Sa le mafai ona ou vaai i se faaiuga o la’u tauiviga, ma sa masani ona ou manao ia toilalo. O le tele o aso sa ou augani atu i le lagi mo se fesoasoani ao faatumulia ou mata i loimata. Sa ou tatalo ma le faamaoni sili atu nai lo se isi lava taimi sa i ai muamua, aioi atu i le Tama Faalelagi e fesoasoani mai ia te au ina ia malamalama i lenei tofotofoga, ma ia aveese atu mai ia te au.
Sa ou lagonaina le feseseai i le pouliuli ma le faanoanoa pe a ou le lagonaina le Agaga. Ae ina ua siitia ae au e le Agaga mai le leai o se faamoemoe, sa ou maua le lototele e faaauau ai pea—pe afai seia oo i le isi au tatalo. Na ou faalagolago i lo’u Tama Faalelagi mo le sili atu nai lo le na o se tatalo i le taimi o meaai po o se siaki i le po faasamasamanoa. O se taunuuga, sa ou latalata atili atu ia te Ia.
Felafoaiina i luga o Galu
I le ogatotonu o lo’u popole ma le faanoanoa, sa ou toe faitauina le tala ia sa Iareto lea na sopoia le “moana tele” (Eteru 2:25). E mafai ona ou vaai faalemafaufau i lo latou naunautaiga le mautonu ao latou ulu atu i a latou vaa. Atonu o la latou malaga e matautia, ae sa latou iloa sa latou agai atu i “se laueleele o le a silisili ona lelei i luga o isi laueleele uma” (Eteru 2:15).
I la latou malaga, tatou te faitau ai:
“Ma sa oo ina faia e le Alii le Atua ia i ai se matagi malosi e agi mai i luga o vai, agai i le laueleele na folafolaina; ma sa faapea ona felafoaiina ai i latou i luga o galu o le sami i luma o le matagi.
“Ma sa oo ina tele taimi sa tanumia ai i latou i le loloto o le sami, ona o galu mauga sa fati i o latou luga, ma afa tetele foi ma matautia na pogai mai i le malosi tele o le matagi.
“… O lea a siomiaina faataamilo i latou i vai e tele sa latou tagi atu i le Alii, ma sa ia toe aumaia i latou i luga o vai.
“Ma sa oo ina lei pe lava le agi mai o le matagi agai i le laueleele na folafolaina ao latou i ai i luga o vai; ma sa faapea ona latou lelea atu i luma o le matagi” (Eteru 6:5–8).
O nei fuaiupu na avea ma mea patino ia te au. Sa ou lagonaina faapea sa ou i ai i lo’u lava vaa, faatasi ai ma matagi o le popole o loo taia ai au ma galu o le atuatuvale o loo fati ae i ou luga ma tanumia au i le loloto o le faanoanoa. Ina ua “siomiaina faataamilo” au ma o le a tagi atu i le Alii, o le a ou ea ae i luga ae toe tanumia foi.
Sa ou toe faitauina le fuaiupu e 8: “Ma sa oo ina lei pe lava le agi mai o le matagi agai i le laueleele na folafolaina … ma sa faapea ona latou lelea atu i luma o le matagi” (faaopoopo le faamamafa). Ona ou iloaina lea o se mea. O matagi lava ia na mafua ai galu mauga e tanumia ai ia vaa lea na faamanuiaina ai foi ia sa Iareto i la latou malaga. Sa ou aioi atu i le Tama Faalelagi ina ia faafilemuina le matagi ma galu, peitai a aunoa ma i latou, atonu o le a le mafai ona ou ausia soo se “nuu folafolaina” na Ia taitaiina atu i ai au.
O nei fuaiupu na suia la’u vaaiga i le olaga. O lou popole ma le atuatuvale na faateleina ai lou faalagolago atu i le Tama Faalelagi. A aunoa ma le matagi ma galu, masalo ou te le iloaina lava le Atua e pei ona ou iloaina nei—ma atonu e le taunuu lava sa Iareto i le laueleele folafolaina.
Mo le taimi nei, o ni nai tausaga talu ona mavae lenei aafiaga, ua le o toe agi faata’uta’u mai ou matagi o le popole ma ua le o toe tanuina au e ou galu o le atuatuvale. Ae afai ma pe a toe foi mai le afa, o le a ou valaau atu i le Alii ma ia faafetai atu, i le iloaina e le aveina atu e sami toafilemu ia vaa i le laueleele folafolaina—e faia e sami sousou.
Ata na tusia e Jerry Harston