Filifiliga Saoloto po o le Faitalia?
O le faaaogaina tatau o le faitalia e tausia a tatou filifiliga saoloto ma faaleleia lo tatou tomai e filifili ai ma le sa’o.
Ata na tusia e Bryan Beach
Ou te manatua pea lou popole sa i ai a o ou sauni e vaai lo’u epikopo e uiga i le auauna atu i se misiona. Sa ou mafaufau pe o lava lou lelei. E pei o le Perofeta o Iosefa Samita, sa leai ni au “agasala tetele pe matuia” (Iosefa Samita—Talafaasolopito 1:28), ae sa ou popole lava pea.
Sa ou popole aua sa le mafai ona aveese lo’u mafaufau i la’u uo o Danny (ua suia le igoa). Mo le tele o masina sa talanoa Danny e uiga i lona tulimatai atu i le auauna atu i se misiona. Ae na suia lena mea ina ua uma ona ia feiloai ma le epikopo.
Talu ai ona sa auai Danny i ni amioga le lelei ma nisi o tamaitai talavou, sa ia tauina mai ia te au mulimuli ane, sa ia taofiaina o ia lava mai le galuega faafaifeautalai. Sa ia le toe saoloto e filifili i se misiona.
O Danny, i upu a Peresitene Boyd K. Packer, Peresitene o le Korama a Aposetolo e Toasefululua, ua pau atu i faaosoosoga a Satani “e faaaoga sese [lona] faitalia.”1
O le saolotoga moni, e pei ona aoao mai le Mo le Malosi o le Autalavou e oo mai i lo tatou faaaogaina o lo tatou faitalia e filifili ai le usiusitai. O le aveesea o le saolotoga, e pei ona aoaoina e Danny, e oo mai i le filifili o le le usiusitai.
“E ui ina e saoloto e filifili lau lava ala o taga fai, e te le saoloto e filifili taunuuga. Pe lelei pe leaga, o le a mulimuli mai taunuuga o se iuga masani lava o filifiliga e te faia.”2
Sui mo i Tatou Lava
Talu ai o loo aoao mai tusitusiga paia faapea ua tatou “saoloto e filifili,” “saoloto e fai,” ma saoloto e faia mea “i lo [tatou] lava loto malie” (2 Nifae 2:27; 10:23; MF&F 58:27; Helamana 14:30), e masani lava ona tatou faaaogaina le faaupuga “filifiliga saoloto.”
Ae tou te silafia o le fuaitau “filifiliga saoloto” e le o i ai i tusitusiga paia? Nai lo lena, o loo aoao mai tusitusiga paia “ia mafai e tagata taitoatasi ona faia e tusa ma mataupu faavae ma mataupu autu… e tusa ma le faitalia ua Ou tuu atu ia te ia, ina ia mafai e tagata taitoatasi ona tali mo ana lava agasala” (MF&F 101:78; faaopoopo le faamamafa).
Na aoao mai Elder D. Todd Christofferson o le Korama a Aposetolo e Toasefululua: “O le upu faitalia o loo faaali mai [i tusitusiga paia] a lē na o ia pe faatasi ai ma le upu faaliliu tatau. … Pe a tatou faaaogaina le faaupuga filifiliga saoloto, ua tatou faamamafaina atu ma le talafeagai le tali atu lea e avea o se vaega taua o le meaalofa paia o le faitalia. O i tatou o ni tagata amio mama ma sui mo i tatou lava, ua saoloto e filifili ae e tali foi mo a tatou filifiliga.”3
Na faaopoopo mai foi Peresitene Packer, “O le faitalia o loo faamatalaina i tusitusiga paia o se “faitalia e filifili ai,” o lona uiga e mafai ona tatou filifili i le va o le lelei ma le leaga.”4 O lenei meaalofa ua tuuina mai e le Atua o lona uiga ua tatou “saoloto ai … e filifili le saolotoga ma le ola faavavau, talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo” (2 Nifae 2:27).
O Le Taua a Satani e tetee atu i le Faitalia
Talu ai o le filifiliga saoloto e i ai se matafaioi taua i le ata o le faaolataga, o lea na saili ai Satani e faaumatiaina i le muai olaga. Sa tuli ese o ia i fafo mo lona fouvale ma ua saili i le taimi nei “e faasese ma faatauaso tagata, ma taitai faatagataotaua i latou i lona loto” (Mose 4:3–4).
E manao Satani ia tatou faia ni filifiliga e faatapulaa ai lo tatou saolotoga, ma taitai atu ai i ni mausa leaga ma vaisu, ma tuua i tatou e aunoa ma se malosi e tetee atu ai i ana faaosoosoga. O le matagofie o le talalelei e faailoa maia ia i tatou a tatou filifiliga ma taunuuga o na filifiliga. O le faaaogaina tatau o le faitalia e tausia a tatou filifiliga saoloto ma faaleleia lo tatou tomai e filifili ai ma le sa’o.
O Le Faataitaiga a le Faaola
Ina ua folasia mai le ata o le faaolataga i le Fono Sili i le Lagi, na faaali mai e le Faaola ia i tatou le ala e faaaoga ai ma le sao la tatou filifiliga saoloto. Na fetalai mai o Ia, “Lo’u Tama e, ia faia Lou finagalo, ma ia ia te Oe pea le mamalu e faavavau” (Mose 4:2). Ona sa Ia naunau e faia le finagalo o le Tama ma mulimuli ane, i le Faatoaga o Ketesemane ma luga o le satauro (tagai i le Mataio 26: 39; Luka 22:42), na totogi ai e Iesu le tau mo a tatou filifiliga leaga ma saunia se ala mo i tatou ina ia faamagaloina e ala i le salamo.
Afai tatou te mulimuli i le faataitaiga a le Faaola, nai lo le faapea atu, “Ou te faia le mea ou te manao e fai,” o le a tatou tautino atu, “Ou te faia le mea e finagalo ai le Tama.”5 O le faaaogaina o la tatou filifiliga saoloto i le auala lenei o le a aumaia ai ia i tatou le saolotoga ma le fiafia.
A o ou alu e vaai lo’u epikopo mo lo’u faatalanoaga muamua o le misiona, sa ou faafetai na ou faia ni filifiliga lelei. I ni nai masina mulimuli ane sa ou auauna atu i le Alii i Kuatemala—aoao atu i isi le ata o le faaolataga ma le matafaioi taua o loo faia e le filifiliga saoloto i lena fuafuaga.