Auauna Atu i le Taimi Nei ina ia Auauna Atu i se Taimi o Mulimuli Mai
E alala le tusitala i Iuta, ISA.
“Auauna ia Ieova ma o outou loto atoa” (1 Samuelu 12:20).
“Ta taututuu i le falesa!” Na fai mai ai Mamona, ao faasino atu i le tumutumu o le falesa o loo aliali i luga ae o laau pama. Ona ia tamoe saoasaoa lea ina ia mafai ona ia pito i luma o lona uso laitiiti o Moriana.
Pe a ma se maila ua uma ona savalia e tama ma o laua matua mai lo latou fale, ae na taututuu malosi lava ia Mamona ma Moriana ina ua taunuu i le faitotoa uamea i fafo atu o le falelotu a le latou uarota. Sa la tutu e taumafai ia manava.
Ae la te filifili pe o ai na manumalo, sa valaau mai se tamaitiiti ia i laua, “Te lua fia taalo soka?”
E fiafia Mamona i le soka, ae o lea sa latou o ma lona aiga e faamama le fale o le uarota ina ia saunia ai mo le lotu i le aso na sosoo ai.
Sa lulu e Mamona lona ulu. “E le o le taimi lenei—atonu o se isi taimi!” sa ia valaau atu ai.
E lei umi ae ua galulue malosi Mamona ma Moriana. Sa fesiitai e Mamona nofoa ma salu ia fola faatasi ma lona tama ao Moriana sa ia mopuina ia fola ma lona tina.
Mulimuli ane, sa fufuluina faatasi e tama ia faata i totonu o le faletaele. “Ou te le’i manatu ou te fiafia e faamama le falesa, ae e malie,” o le tala lea a Moriana. “A e a oe, Mamona? O le mafuaaga lena na e sau ai nai lo le taalo soka?”
Sa mafafau Mamona i lona tama. O ia o le epikopo o le latou uarota, ae sa ia faaaluina lava le taimi e faamama ai le falelotu.
“Ua ou i ai iinei aua ou te fia pei o Tama,” o le tala lea a Mamona.
Ona ia mafaufau lea i faifeautalai o lana uarota. Sa pisi i laua e tuitui i faitotoa ma faasoa atu le Tusi a Mamona i isi. O le a la valaaulia tagata e o mai i le lotu i le fale o loo faamamaina e tama.
“Ua ou i ai iinei ona o le a i ai se aso ou te fia auauna atu ai foi i se misiona,” na mafaufau i ai Mamona. “E mafai ona ou fesoasoani i faifeautalai i le saunia o le falesa.
Sa mafaufau Mamona e uiga i le aso e sosoo ai, pe a la feala ae ma lona uso i le 6:00 i le taeao, savavali i le lotu i o laua ofutino papae ma fusiua, ma saunia nofoa ma tusipese i le potu o le Peraimeri.
“Ua ou iinei aua ou te fia auauna atu i se valaauga o le Ekalesia,” sa mafaufau i ai o ia.
Sa mafaufau Mamona e uiga i le le toe mamao avea o ia ma se tiakono. O le a ia tufaina le faamanatuga ma faia isi mea e tele e auauna atu ai.
“Ua ou i ai iinei ona o le tausaga a sau o le a ou mauaina le perisitua, ma ou te manao e faia mea uma ou te mafaia i le taimi nei e sauniuni ai.”
Ua uma ona faia e Mamona se mea e saunia ai mo le perisitua: sa ia mauaina lona Taui o le Faatuatua i le Atua. Ua uma ona ia aoaoina e ola i le talalelei ma auauna atu i isi.
Na iu lava ina ia tilotilo atu i le ata o lona uso o i le faata ma ataata.
“Ua ou i ai iinei ona ou te alofa i le Alii,” sa ia fai mai ai, “ma ona o le auauna atu i le taimi nei o le a fesoasoani mai ia te au e saunia ai e auauna atu i se taimi mulimuli ane.”
Ata na tusia e Adam Koford