O Le Misiona Paia a Iesu Keriso: Areto o le Ola

Ia suesue ma le agaga tatalo lenei anomea ma saili ia iloa le mea e faasoa atu. O le a faapefea e le malamalama i le soifuaga ma le misiona a le Faaola ona faateleina lou faatuatua ia te Ia ma faamanuia ai isi e te tausia e ala i faiaoga asiasi? Mo nisi faamatalaga, alu i le reliefsociety.lds.org.

Faatuatua, Aiga, Toomaga

Ata

Jesus Christ seated at a table with His apostles. The apostles are watching Christ as He breaks bread and offers it to them in remembrance of His body and blood. The painting depicts the institution of the Sacrament at the Last Supper.

Faamatalaga mai le Ia Fai ma Faamanatuga ia te Au, saunia e Walter Rane

Na fetalai Iesu, “O a’u le areto ola na alu ifo mai le lagi: pe a ai se tasi i lenei areto ona ola ai lea o ia e faavavau” (Ioane 6:51). “Ua aoao mai e Iesu i tatou, o Ona soo, e tatau ona tatou vaai atu i le Atua i aso taitasi mo le areto—le fesoasoani ma le tausiga—tatou te manaomia i lena lava aso,” sa saunoa ai Elder D. Todd Christofferson o le Korama a Aposetolo e Toasefululua. “O le valaaulia a le Alii … o loo talanoa e uiga i se Atua alofa, e silafiaina manaoga e oo lava i manaoga iti ma faatauvaa o Lana fanau ma e naunau e fesoasoani ia i latou, taitoatasi. O loo faapea mai o Ia, e mafai ona tatou ole atu i le faatuatua i lena Tagata ‘e foai tele mai i tagata uma, ma le le toe tautaua; ona foaiina mai ai lea ia te ia’ (Iakopo 1:5).”¹ A tatou malamalama o le a foai mai e Iesu Keriso mea tatou te manaomia, o le a tatou liliu atu ia te Ia mo lo tatou tausiga faaleagaga.

Ua valaaulia i tatou e Elder Jeffrey R. Holland o le Korama a Aposetolo e Toasefululua “ia aufaatasi i le malaga a uluai soo o Keriso o e foi na naunau mo le areto o le ola—i latou o e sa le’i toe foi i tua ae o mai ia te Ia, ma mau faatasi ma Ia, ma o e na iloaina e leai lava se isi tagata e mafai ona sulu i ai mo le saogalemu ma le faaolataga.”²

Mau Faaopoopo

Ioane 6:32–35; Alema 5:34; 3 Nifae 20:3–8

Mai Tusitusiga Paia

Sa aoaoina e Iesu Keriso le motu o tagata e sili atu ma le 4,000. Ina ua mavae aso e tolu, sa Ia fetalai atu i Ona soo: “Ou te alofa atu i le motu o tagata, aua … e leai foi ni a latou mea e ai:

“Afai foi ou te tuuina atu ia te i latou e o i o latou aiga, o matelaina, e lailoa i latou i le ala. …

“Ona tali mai lea o ona soo ia te ia, Maifea e mafai ai se tasi ona fafaga ia te i latou i areto i lenei vao?

“Ona fesili atu lea o [Iesu] ia te i latou, Pe fia ea ni a outou areto? Ona latou fai mai lea, E fitu.”

Ona “tago lea o [Keriso] i areto e fitu, ua faafetai, ua tofitofi, ma avane i ona soo, latou te laulauina atu; …

“Ua ia te i latou foi nai i’a lauiti, ua ia faafetai foi, ona fetalai atu lea ia laulauina atu foi ia mea.

“Ona latou aai lea, ua maoona, ona latou fu’e lea o toe ‘aiga ua fitu ete.” (Tagai Mareko 8:1–9.)