Faifeautalai, Talafaasolopito o Aiga, maGaluega o le Malumalu
Saunia e Elder David A. Bednar
O Le Korama a Aposetolo e Toasefululua
Mai le tautalaga na tuuina atu i se semina mo peresitene fou o misiona i le aso 25 o Iuni, 2013.
I se potopotoga paia na faia i le Malumalu o Katelani i le aso 6 o Aperila, 1837, na saunoa ai le Perofeta o Iosefa Samita, “I le uma ai o faamatalaga uma lava ua faia, o le tiute silisili ma matua taua o le talaiina o le Talalelei.”1
Toeitiiti lava atoa le fitu tausaga mulimuli ane, i le aso 7 Aperila, 1844, na ia tautino mai ai: “O le tiutetauave silisili i lenei lalolagi ua faataatiaina mai e le Atua i o tatou luga o le sailia lea o o tatou tagata oti. Fai mai le aposetolo, ‘Ina ia le faaatoatoaina i latou pe a le i ai i tatou’ [tagai i le Eperu 11:40]; aua e manaomia le i ai o le mana o faamauga i o tatou lima e faamauina ai a tatou fanau ma o tatou tagata oti mo le atoatoaga o le tisipenisione o taimi—o se tisipenisione e fetaiai ai ma folafolaga na faia e Iesu Keriso a o lei faavaeina le lalolagi mo le faaolataga o le tagata.”2
O nisi tagata atonu e tuufesili pe faapefea e le talaiga o le talalelei ma le sailia o o tatou tagata oti ona avea faatasi ma tiute ma tiutetauave silisili na tuuina mai e le Atua i luga o Lana fanau. O lo’u faamoemoega o le fautua atu faapea o nei aoaoga e faamamafa atu le lotogatasi ma le tasi o le galuega o aso e gata ai o le faaolataga. O le galuega faafaifeautalai ma le talafaasolopito o aiga ma galuega o le malumalu o ni vaega e faaatoatoaina ma auaufaatasi o se galuega maoae e tasi, “ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi; e oo lava ia te ia” (Efeso 1:10).
Ou te tatalo o le a fesoasoani le mana o le Agaga Paia ia te oe ma a’u a o tatou mafaufau faatasi i le galuega ofoofogia o aso e gata ai o le faaolataga.
O Loto ma Sauniga o le Perisitua
O le talai atu o le talalelei ma le sailia o tatou tagata oti o ni tiutetauave paia e lua ua atofaina atu e fesootai ma o tatou loto ma sauniga o le perisitua. O le ute o le galuega a le Alii o le suia lea, liliu atu, ma le faamamaina o loto e ala i feagaiga ma sauniga e faataunuuina i le pule tatau o le perisitua.
O le upu loto e silia ma le faa 1,000 taimi ona faaaogaina i tusitusiga faavae ma e faailoga ai lagona o i totonu o se tagata. O lea la, o tatou loto—o le aofaiga atoa lea o o tatou manaoga, alofa, faamoemoega, mafuaaga, ma uiga faaalia—e faamatalaina ai po o ai i tatou ma iloa ai le tagata o le a avea ai i tatou.
O le faamoemoega o le Alii mo le galuega faafaifeautalai o le valaaulia lea o tagata uma e o mai ia Keriso, maua faamanuiaga o le talalelei toefuataiina, ma tumau e oo i le iuga e ala i le faatuatua ia Keriso.3 Tatou te le faasoa atua le talalelei e na ona faateleina ai le fuainumera ma le malosi o le Ekalesia o aso e gata ai. Nai lo lena, tatou te saili ina ia faataunuu le tiutetauave paia ua atofaina atu ia folafola atu le moni o le fuafuaga o le fiafia a le Tama, le paia o Lona Alo e Toatasi na Fanaua, o Iesu Keriso, ma le mana o le taulaga togiola a le Faaola. O le valaauliaina o tagata uma ia “o mai ia Keriso” (tagai Moronae 10:30–33), o le iloaina o le “liuga tele” o le loto (tagai i le Alema 5:12–14), ma le ofoina atu o sauniga o le faaolataga i tagata taitoatasi i le olaga faitino e le’i osi feagaiga, o faamoemoega autu ia o le talaiina o le talalelei.
O le mafai ona faaeaina o tagata o loo soifua ma e ua maliliu o le faamoemoega lea a le Alii mo le fausiaina o malumalu ma le faataunuuina o sauniga sui. Tatou te le tapuai i malumalu paia seia maua ai na o se aafiaga e le faagaloina faaletagata lava ia pe faaleaiga. Nai lo lena, tatou te saili ina ia faataunuu le tiutetauave paia o le ofoina atu o sauniga o le faaolataga ma le faaeaga o le aiga atoa o le tagata. O le totoina i loto o fanau o folafolaga na faia i tama, o Aperaamo, Isaako ma Iakopo; liliu atu o loto o fanau i o latou lava tama; ma le faatinoina o sailiga o talafaasolopito o aiga ma sauniga sui i le malumalu o ni galuega e faamanuiaina ai tagata taitoatasi i le lalolagi o agaga e le’i osi feagaiga.
O sauniga o le perisitua o le ala lea i le mana o le faale-atua:
“Ma o le perisitua tele lea e pulea le talalelei ma umia le ki o mealilo o le malo, o le ki lava lea o le malamalama e uiga i le Atua.
“O lea, o ona sauniga, ua faaalia ai le mana o le faale-atua.
“Ma a aunoa ma ona sauniga, ma le pule o le perisitua, e le faaalia mai le mana o le faale-atua i tagata i la le tino” (MF&F 84:19–21).
Faamolemole ia mafaufau i le mamafa o le taua o nei fuaiupu. E tatau ona muai ulufia e se tagata le faitotoa o le papatisoga ma maua le meaalofa o le Agaga Paia—ona faaauau ai pea ma fetaomi atu i luma i le ala o feagaiga ma sauniga lea e tau atu i le Faaola ma faamanuiaga o Lana Togiola (2 Nifae 31). O sauniga o le perisitua e taua tele ina ia atoatoa ai ona “o mai ia Keriso, ma faaatoatoaina ia te ia” (tagai i le Moronae 10:30–33). A aunoa ma sauniga, e le mafai e se tagata ona maua faamanuiaga uma ua mafai ona maua e ala i le taulaga togiola le iu ma faavavau a le Alii (tagai i le Alema 34:10–14)—e oo lava i le mana o le faaleatua.
O le galuega a le Alii o se tasi o galuega matagofie e taulai atu i loto, feagaiga, ma sauniga o le perisitua.
Aafiaga
O lenei aoaoga faavae paia o loo fautuaina mai ai ni aafiaga taua se lua mo la tatou galuega i le Ekalesia.
Muamua, atonu e masani ona tatou tuuina atu se faamamafa le manaomia i vaega eseese o le galuega o le faaolataga ma aiaiga faavae ma faiga faavae e fesootai i ai. Ou te popole o le toatele o i tatou e mafai ona taulai atu faapitoa ma le malosi i vaega patino o le galuega a le Alii ua tatou toilalo ai ina ia maua le malosi atoa o lenei galuega atoa o le faaolataga.
A o saili le Alii e faapotopoto faatasi mai mea uma ia tasi ia Keriso, atonu e masani ona tatou faaesea ma taulai atu i auala ia e faatapulaaina lo tatou malamalama ma vaaiga. Pe afai e oo atu i se tulaga matautia, o le faamuamua e tuuina atu i le pulea o polokalama ma le faaleleia o fuainumera e sili atu i le valaauliaina o tagata taitoatasi ina ia ulu atu i feagaiga ma mauaina sauniga ma le agavaa. O sea auala e taofiofia le faamamaina, le olioli, le liua faifaipea, ma le mana faaleagaga ma le puipuiga lea e maua mai i le “tuu atu o [tatou] loto i le Atua” (Helamana 3:35). O le tau ina faatinoina ma le faataunuuina o mea i la tatou lisi umi o mea “e fai” o le talalelei e le faapea o le a mafai ai e i tatou ona maua Ona foliga i o tatou mata pe oo mai ai se liuga tele o le loto (tagai i le Alema 5:14).
Lona lua, o le agaga o Elia e totonugalemu ma taua tele i le galuega o le folafolaina atu o le talalelei. Atonu sa faamamafa mai e le Alii lenei upumoni i totonu o le faasologa tonu o mea na tutupu lea na tupu a o toefuatai mai le atoatoaga o le talalelei i le lalolagi i nei aso e gata ai.
I le Vao Paia, na vaai Iosefa Samita ma talanoa i le Tama e Faavavau ma Iesu Keriso. O lenei faaaliga na aumaia ai le “faaatoatoaga o tausaga” (Efeso 1:10) ma na mafai ai e Iosefa ona aoao e uiga i le natura moni o le Aiga Atua ma faaaliga faifai pea.
Pe tusa ma le tolu tausaga mulimuli ane, i le tali atu i se tatalo faatauanau i le afiafi o le aso 21 o Setema, 1823, sa faatumulia le potumoe o Iosefa i le malamalama seia oo ina “sili atu le malamalama o le potu nai lo le aoauli” (Iosefa Samita—Talafaasolopito 1:30). O se tagata na faaali mai i tafatafa o lona moega, valaau atu i le tama talavou i lona igoa, ma tautino mai “o ia o se avefeau na auina mai mai le Atua… ma e faapea o lona igoa o Moronae” (Iosefa Samita—Talafaasolopito 1:33). Na ia aoaoina Iosefa e uiga i le oo mai o le Tusi a Mamona. Ona sii mai lea e Moronae mai le tusi a Malaki i le Feagaiga Tuai, ma sina eseesega laitiiti i le gagana o loo faaaogaina i le King James Version:
“Faauta, ou te faaali atu ia te outou le Perisitua, e ala i le lima o Elia le perofeta, ae lei oo mai le aso tele ma le matautia o le Alii. … Ma o le a ia totoina i loto o fanau folafolaga na faia i tama, ma o le a liliu atu loto o fanau i o latou tama. Afai e le faapea, o le a faaumatia atoa le lalolagi i lona afio mai” (Iosefa Samita—Talafaasolopito 1:38–39).
O aoaoga a Moronae i le perofeta talavou na iu ina aofia ai autu taua e lua: (1) o le Tusi a Mamona ma (2) upu a Malaki na muai valoia ai le matafaioi a Elia i le toefuataiga “o mea uma lava, ua fetalaia mai e le Atua i fofoga o ana perofeta paia uma lava talu mai anamua” (Galuega 3:21). O lea la, o mea tomua na tutupu o le Toefuataiga na faaalia mai se malamalama sa’o i le Aiga Atua, faavaeina le moni o faaaliga faifaipea, faamamafa mai le taua o le Tusi a Mamona, ma valoia le galuega o le faaolataga ma le faaeaga mo e o soifua ma e ua maliliu.
Faamolemole ia mafaufau nei i le matafaioi o le Tusi a Mamona i le liuaina o loto—ma le agaga o Elia i le faaliliuina o loto.
O le Tusi a Mamona i le tuufaatasiga ma le Agaga o le Alii o le “meafaigaluega e tasi silisili lea ua tuuina mai e le Atua ia i tatou e faaliliu ai le lalolagi.”4 O lenei voluma o mau o le Toefuataiga o le maaauau o la tatou tapuaiga ma e taua i le aumaia o agaga i le Faaola. O le Tusi a Mamona o se tasi molimau ia Iesu Keriso—o se molimau faamautinoa e taua tele i le paia o le Togiola i se lalolagi lea e tuputupu ae e sili atu lona poto salalau ma le masalosalo. Ua suia loto o tagata taitoatasi e faitau ma suesue le Tusi a Mamona ma tatalo ma le manatu moni i ai ina ia iloa ai le moni o le tusi.
O le agaga o Elia o “se faaaliga mai o le Agaga Paia o loo molimau i le uiga paia o le aiga.”5 O lenei uunaiga uigaese a le Agaga Paia e molimau mamana i le fuafuaga tele o le fiafia a le Tama ma uunaia tagata e saili ma le faatauaina o latou augatuaa ma tagata o le aiga—ua tuanai ma le taimi nei. O le agaga o Elia e aafia ai tagata i totonu ma fafo atu o le Ekalesia ma mafua ai ona liliu atu loto i tama.
Ua oo mai le taimi mo i tatou e faaaoga ai avanoa sili atu ona lelei i le tuufaatasiga mamana o se liuga tele o le loto, ua mafaia ona o le mana faaleagaga o le Tusi a Mamona, ma le liliuina o loto i tama, ua ausia e ala i le agaga o Elia. O se faanaunauga mo fesootaiga ma lo tatou taimi ua tuanai e mafai ona saunia se tagata ia maua ai le mama o le afioga a le Atua ma faamalosia lona faatuatua. O se loto ua liliu atu i tama e tulaga ese le fesoasoani i se tagata ia tetee atu i faatosinaga a le fili ma faamalosia ai le liua.
Matamata i le vitio lona lua, o se tala o loo faatino ai lenei mataupu faavae.
Mataupu Faavae
Ou te fia faailoa atu nei mataupu faavae e fa e uiga i le mana faaleagaga e afua mai i le liuga ma le liliu atu o loto.
-
O loto ma le liua. O le liliu atu i tama e fagua ai ma saunia ai se loto mo le liuga tele. O lea la, e fesoasoani le agaga o Elia i le liuaina.
Matamata i le vitio lona tolu, o se tala o loo faatino ai lenei mataupu faavae.
4:33 -
O loto ma le faatumauina. O le liliu atu i tama o le a lagolagoina ma faamalosia ai loto ia na oo i ai le liuga tele. O lea la, e fesoasoani le agaga o Elia i le faatumauina o tagata fou liliu mai.
Matamata i le vitio lona fa, o se tala o loo faatino ai lenei mataupu faavae.
1:58 -
O loto ma le toe faatoagaina mai. O le liliu atu i tama e faamaluluina ai se loto lea na faamaaaina ina ua uma ona oo i ai le liuga tele. O lea la, o le agaga o Elia o le ki lea i le toe faatoagaina mai.
Matamata i le vitio lona lima, o se tala o loo faatino ai lenei mataupu faavae.
3:59 -
O loto ma faifeautalai lototoa. O se faifeautalai na oo i se liuga tele ma le liliu atu o le loto o le a sili atu ona avea ma auauna ua liua, faapaiaina, ma lototoa.
Matamata i le vitio lona ono, o se tala o loo faatino ai lenei mataupu faavae.
3:14
Faatasi ai ma se autau o faifeautalai ua saoasaoa le faateleina ma saunia lelei, e le mafai le na ona tatou faalagolago atoa atu i faamanuiaga o talaiga ua tuanai e fuafua ai lo tatou auala ma metotia mo le lumanai. Ua musuia e le Alii tekinolosi ma meafaigaluega ia e mafai ai ona faamanuiaina i tatou mai le tuufaatasia o le galuega faafaifeautalai ma galuega o malumalu ma talafaasolopito o aiga e sili atu nai lo soo se taimi na muamua atu i lenei tisipenisione. Ma e le o se mea na faafuaveta ona tulai mai, le oo mai o nei faigafou i le taimi tonu lea e matua manaomia ai latou te faalauteleina le galuega faafaifeautalai i le lalolagi atoa. O le galuega a le Alii o se tasi o galuega matagofie e taulai atu i loto ua suia ma liliu atu ai, i feagaiga paia, ma i le mana o le faale-atua ua faaalia e ala i sauniga o le perisitua.
Aotelega ma le Molimau
Na fetalai le Alii, “Ou te mafai ona faia o laʼu lava galuega” (2 Nifae 27:21), ma le “o le a Ou faanatinatiina la’u galuega i lona taimi” (MF&F 88:73). O i tatou o molimau i Lona faanatinatiina o Lana galuega.
Ua tatou ola ma auauna atu i le tisipenisione o le atoatoaga o taimi. O le iloaina o le taua e faavavau o le tulagaese o le tisipenisione ua tatou ola ai e tatau ona uunaia ai mea uma ua tatou faia, ma taumafai e avea ai. O le galuega o le faaolataga e faataunuuina i nei aso e gata ai e maoa’e, tele, taua, ma faanatinati. Ua tatau ia i tatou taitoatasi ona maua le lotofaafetai mo faamanuiaga ma tiutetauave o le ola ai i lenei vaitau patino o le tisipenisione mulimuli. E tatau ona tatou lotomaualalo i le iloaina o “ia o lē ua tuu atu i ai mea e tele, e tele mea ua manaomia mai ai” (MF&F 82:3).
O le talai atu o le talalelei ma le sailia o o tatou tagata oti o ni vaega felagolagomai o se galuega maoae e tasi—o se galuega o le alofa o faamoemoe e suia ai, liliu, ma faamama ai loto o tagata sailiili faamaoni o le upu moni. O le laina tuaoi fai tatou te masani lava ona tuuina atu i le va o le galuega faafaifeautalai ma le malumalu ma talafaasolopito o aiga ua aveesea; o se galuega maoae lenei o le faaolataga.6
E mafai ona tatou amata malamalama i le matafaioi o le galuega o le malumalu ma talafaasolopito o aiga i le fesoasoani lea i se tagata sailiili po o se tagata lē toaga ia maua se malamalama loloto atu o le ata o le faaolataga? Pe ua tatou iloa o se tasi o uunaiga aupito sili i luga o le faatumauina o tagata liliu mai o le agaga lea o Elia? Mata e mafai ona tatou faafetaia atoatoa le taua o taimi o le liliuina atu o le loto lea e tupu i le faasoaina atu o tala o aiga e avea o se vaega o le sailia o tagata e aoao atu e tagata o le ekalesia ma faifeautalai? E mafai ona tatou fesoasoani atu ia i latou o tatou auauna atu i ai ia maua soo le mana o le faale-atua e ala i le auai ma le agavaa i sauniga e pei o le faamanatuga ma le papatisoga ma faamauga mo e ua maliliu?
Tau ina ia manino lau vaai, le sese lau faalogo, ma manatua pea le taua o lau auaunaga i le galuega a le Alii o le liuga, liliu atu, ma le faamamaina o loto.