Pe Faapefea ona Fai Atu ni Fesili e Taua

Saunia e David A. Edwards

Mekasini a le Ekalesia

O le fai atu o fesili sa’o e mafai ona fesoasoani e tatala ai loto o tagata i se molimau o le upumoni.

E i ai ou avanoa e aoao atu ai i soo se mea o siomia ai oe, tusa lava pe i se talanoaga e tasi le minute le umi i luga o se pasi, i se lesona i le lotu, i faamatalaga i le initoneti, po o se talanoaga loloto faafesagai ma se uo.

O se motugaafa la lenei mo le aoao atu ma le lelei i soo se tulaga: fai ni fesili.

O fesili lelei e taitai atu ai i se aoaoga lelei, ma e laki, o le fai atu o ni fesili lelei o se mea e mafai ona e suesue i ai, faataitai, ma aoao ia lelei ona faatinoina. O le auala la lenei.

Fai Atu Fesili E Taua

O fesili e taua o fesili ia e faatupuina le loloto o ou manatu ma lagona, fesili ia e taitai atu ai oe i le upumoni, molimau, ma suiga. E mafai ona aofia ai se vaega tele o mataupu, ae e masani lava ona i ai ni nai mea e tutusa ai: (1) e le papa’u pe na ona sao (e ui e mafai ona avea o se tulitatao i fesili sao), (2) e i ai sina latou sootaga i o tatou olaga i aso uma, ma le (3) latou te luiina i tatou e tuuina atu nisi mea e sili atu nai lo le na o se tali ua uma ona faapolokalamaina.

Ia Manatua Pe Aisea Tatou Te Fai Atu Ai Fesili

O fesili e faaaofia ai i tatou e ala i le faailoaina atu o se avanoa lea e manao o tatou mafaufau i lena taimi e faatumuina. O le tulaga patino lava, o le fai atu o fesili e uunaia ai mafaufauga faaletaga lava ia e mafai ona faatagaina ai le faiga lenei e tulai mai:

1. E amata ona fiafia tagata i mea o e fai atu ai.

2. Latou te faaaogaina lo latou faitalia e mafaufau ai ma faailoa atu se tali.

3. O lenei faaaogaina o le faitalia e mafai ai e le Agaga Paia ona molimau atu ia i latou i le upu moni.¹

O le mafaufau ai i lenei faagasologa, o le a e maua ai se lagona po o a ituaiga o fesili e fai atu ma po o a fesili e aloese mai ai.

Faataitaiga: Nai lo le na ona fai atu, “Aisea e taua ai le faitauina o tusitusiga paia?” e mafai ona e fesili atu, “Na faapefea ona i ai se eseesega i lou olaga i le suesue i tusitusiga paia?”

Ia Manatua o loo E Aoaoina Atu Tagata, Ae Le Na O Lesona

Afai e te iloa tagata o e aoaoina ma mafaufau e uiga i mea latou te manaomia, o le a e filifilia ni fesili e faasagatonu lava ina ia fesoasoani ai ia i latou, ae le na o le faasafua atu oni manatu faapitoa.

Faataitaiga: Nai lo le na ona fai atu, “O a laasaga i le faagasologa o le salamo?” atonu e te fesili, “E faapefea ona e faasaoina ni mea pe afai ua e iloa ua e faia se mea sese?”

Suesue ma Mafaufau Loloto

Ina ia saunia e aoao atu le talalelei, suesue i tusitusiga paia ma aoaoga a perofeta ma aposetolo o aso nei, ma tatalo ina ia mafai e le Agaga Paia ona faatasi ma oe ma i latou o e aoaoina atu (tagai i le MF&F 42:14; 50:21–22).

Ma le isi, afai e te manao e fai atu ni fesili i tagata lea o le a latou matua mafaufau ai, e tatau ona e faia lena lava ituaiga o mafaufauga ia te oe lava. Mafaufau loloto i mea ua e suesueina. O le a e iloaina o mea ia e sili ona e mafaufau loloto ai o fesili ia e te fesiligia ai oe lava i le aluga o le ala. Ia gauai atu i ituaiga o fesili ia e matua faatupuina ai ou manatu. O fesili ia e taitai atu ai i se malamalamaaga sili atu ma le molimau, o ituaiga fesili lava ia e mafai ona fai atu pe afai o e fesoasoani atu i isi e aoao e uiga i le talalelei.

Faataitaiga: Nai lo le fai atu, “E faapefea ona tatou maua le alofa moni?” atonu e te fesili, “O le a sou manatu i le uiga o i le Moronae 7:48 pe a fai mai ia tatalo mo le alofa ‘ma le malosi atoa o le loto’?”

Faafaigofie le agai atu i Fesili Loloto

O nisi taimi e sili ona lelei le faafaigofie o le agai atu i fesili e manaomia ai le mafaufau atili ma manatuaga faaletagata lava ia, ma atonu e te manao e fai atu ai se fesili tomua e faigofie le taliina ona tulitatao ai lea i se fesili se tasi po o le sili atu foi ma taitai atu ai i ni tali e sili ona mafaufauina. O nisi nei o faataitaiga faigofie:

Fesili Tomua	Fesili Tulitatao
O le a le matua o Iosefa Samita ina ua ia alu i le Vao Paia?	O anafea na e tatalo ai i le Tama Faalelagi ma le ituaiga o naunautaiga faamaoni lea sa i ai ia Iosefa?
E te talitonu i le Atua?	O le a le matafaioi o loo faia e le Atua i lou olaga?
O le a se mea ua e faia e auauna atu ai i isi talu ai nei?	E faapefea i le iloaina o tatou uma o fanau a le Atua ona suia ai le auala e te mafaufau ai e uiga i le auauna atu?

Afai e te sailia le taitaiga a le Agaga Paia a o e fai atu ni fesili, o le a mautinoa lava o le a e fai atu le fesili sa’o i le taimi sa’o. E te le iloa lava. E ono suia ai le olaga o se tagata.

Faamatalaga

1. “E tatau ona e faaaogaina lou faitalia e faamaonia ai le Agaga e aoao ia te outou” (Richard G. Scott, “E Maua le Taitaiga Faaleagaga,” Liahona, Nov. 2009, 8).

Lesona i Aso Sa

Autu o le Masina Lenei: Avea Atili e Faapei o Keriso

Motugaafa mo le Fai Atu o Fesili

• Faatali mo tali.

• Faaaoga fesili tulitatao e faaosofia ai manatunatuga loloto.

• Aloese mai fesili e fatu ai feeseeseaiga po o le uunaia o finauga.

• Ia fai atu i nisi taimi ni fesili e uunaia ai mafaufauga le magagana.

Mo nisi motugaafa, tagai i le O Le Aoao Atu, E leai Se Isi Valaauga E Sili Ai: O Se Risosi Taiala mo le Aoaoina Atu o le Talalelei (1999), 71–72.

Auai i le Talanoaga

O Mea e Mafaufau Loloto i ai mo le Aso Sa

• Na i ai se tagata na fai atua se fesili ia te oe na e manao ai ina ia malamalama atili e uiga i le talalelei po o le suia ai o lou olaga i nisi o auala?

• Na faapefea ona faaaoga e le Faaola fesili i Ana aoaoga?

O Mea E Te Ono Faia

• A o e suesue i tusitusiga paia i lenei vaiaso, tusi se lisi o nisi o fesili e te mafaufau i ai.

• I le lotu, fai atu se fesili o se vaega o se talanoaga a le vasega.

Ata o meafaigaluega na tusia e Sergey Markov/Hemera/Thinkstock; ata o le ulu na tusia e johavel/iStock/Thinkstock

Ata o lima na tusia e ilyast/iStock/Thinkstock