2014
Pe Faapefea ona Maua le Malosi ma le Manuia
Oketopa 2014

Pe Faapefea onaMaua le Malosi ma le Manuia

Official portrait of Elder Jeffrey R. Holland of the Quorum of the Twelve Apostles, 2004.

Saunia e Elder Jeffrey R. Holland

O Le Korama a Aposetolo e Toasefululua

Mai se faeasaite a le Iunivesite o Polika Iaga na faia i le aso 2 Mati, 1997.

O nisi o outou ua iloa le mea e te manao e avea ai ma le mea e te manao e oo i ai lou olaga, ma o nisi o outou e leai. O nisi o outou ua foliga mai ua tele faamanuiaga ua maua ma e tele filifiliga matagofie o i outou luma. O nisi o outou o loo lagonaina, mo se taimi ma po o le a lava le mafuaaga, e le tagolima ma e le tele ni ala matagofie o taooto lalata mai i o outou luma.

Ae po o ai lava oe ma po o fea lava e te mauaina ai oe lava ao e sailia lou auala i le olaga, Ou te ofoina atu ia te oe “le ala, le upumoni, ma le ola” (Ioane 14:6). Po o fea lava e te manatu o e agai i ai, ou te fai atu ia te oe ia “o mai ia te Ia” (tagai i le Mataio 11:28–30) o le laasaga muamua lea o le taunuu ai iina, i le mauaina o lou fiafia ma le malosi ma le manuia faaletagata.

Ina ua faatoa faalogo Aneterea ma Filipo o fetalai atu Keriso, sa matua faagaeetia i laua, na matua lofituina na la mulimuli ai ia te Ia ao Ia tuua le motu o tagata. O le silafiaina o loo tuliloaina o Ia, na faliu Keriso ma fetalai atu i alii e toalua, “Se a ea la oulua feau?” (Ioane 1:38). Na tuuina atu isi faaliliuga faapea, “O le a se mea lua te mananao ai?”

Sa laua tali atu, “O fea e te mau ai?” po o le “O fea e te nofo ai?”

Ma sa fetalai atu Keriso, “O mai ia, ina matamata.” I sina taimi puupuu mulimuli ane sa Ia valaauina aloaia ai Peteru ma isi Aposetolo fou i lea lava agaga e tasi o le valaaulia, “Ina mulimuli mai ia ia te au” (tagai i le Mataio 4:19).

E foliga mai ia te au o le fatu o o tatou olaga o loo faaputuina i lalo o nei elemene pupuu e lua i nei vaaiga amata o le talaiga faaletino a le Faaola. O se tasi o elemene o le fesili, ia i tatou taitoatasi, “Se a ea lau feau? O le a se mea e te manao ai?” O le lona lua o Lana tali i le auala e oo ai iina. Po o ai lava i tatou, ma po o le a lava so tatou faafitauli, e tutusa lava Lana tali e faavavau: “O mai ia te au.” O mai e vaai po o le a se mea o ou faia ma pe faapefea ona ou faaaluina lo’u taimi. Aoao ia te a’u, mulimuli mai ia te au, ma i le faagasologa o le a ou tuu atu tali i a outou tatalo ma le malologa mo o outou agaga.

Au uo talavou pele e, ou te iloa e leai lava se isi auala mo outou ina ia faamanuiaina ai pe maua ai le fiafia pe maua ai le saogalemu. Ou te iloa e leai se isi ala mo outou ina ia mafai ona tauave a outou avega po o le mauaina o le mea na ta’ua e Iakopo o “le fiafia lena ua saunia mo le au paia” (2 Nifae 9:43). O le mafuaaga lena tatou te osia ai feagaiga faamaoni e faavae i luga o le taulaga togiola a Keriso, ma o le mafuaaga lea tatou te tauave ai i o tatou luga Lona suafa.

O Iesu o le Keriso, o le Alo o le Atua soifua. O Lana Ekalesia moni ma le ola lenei. E finagalo o Ia ina ia tatou o mai ia te Ia, ia mulimuli ia te Ia, ina ia faamafanafanaina ia te Ia. Ona Ia finagalo mai lea ia i tatou ina ia tuuina atu le faamafanafanaga i isi. Tau ina ia lava lo tatou faatuatua e taliaina ai le agalelei o le Atua ma le alofa mutimutivale o Lona Alo e Toatasi na Fanaua. Ia tatou o mai ia te Ia ma Lana talalelei ma ia faamaloloina.