Auaunaga i le Ekalesia
Faafetai Lava, Uso Jay
E alala le tusitala i Nevada, ISA.
Ou te faafetai mo le agaga, tautinoga, sauniuniga, ma le alofa o le anoanoai o auauna faamaoni i le Ekalesia atoa.
“Taeao o le Aso Sa,” sa ou ta’u atu i lo’u afafine e lima tausaga le matua a o ia faapupuu i luga o lo’u vae. Sa ataata mai ona foliga.
“Oi, ua lelei,” o lana tala lea. “O le a ou vaai la ia Uso Jay.”
Na faatumulia lou loto i le agaga faafetai.Sa ou lagonaina le faafetai mo se faiaoga Peraimeri alofa, ma popole o le na faamāmāina lo matou siitia atu i se uarota fou ina ua mavae le masii ese atu. O le tuua o lo matou fale i le ogatotonu i Sisifo o le I.S. ma nonofo i le 1,350 maila (2,173 km) le mamao o se tulaga faigata mo le aiga atoa ae maise lava i lo matou tamaitiiti laitiiti, o Season. O lona natura e matamuli, ma sa fefe o ia i ni tulaga fou ma sa popole e uiga i le auai i le lotu i lo matou vaiaso muamua i se uarota fou.
O Uso Jay, o se alii agamalu, tuuto, e fetaui lelei le agamalie ma le alofa e manumalo ai i le faatuatuaga a Season. I lena Aso Sa muamua sa ia tootuli ai i lalo, uu mai lona lima, tilotilo atu i ona mata, ma faapea atu, “Sau ia, le manamea. O le a e fiafia i la tatou vasega.”
A o mavae atu vaiaso, na tulimatai atu Season i le Aso Sa nai lo se isi lava aso o le vaiaso. O le taimi lava matou te taunuu ai i le lotu, sa ia taumafai lava e saili le faapotopotoga mo lona faiaoga. Na te faafeiloai mai i le ataata.
I le gasologa o tausaga na manatua ai e Uso Jay ia tamaiti aoga taitasi faatasi ai ma ni meaalofa laiti mo aso malolo ma aso fanau. Ina ua oo mai le aso fanau o Season, o le malo aupito sili ona taua sa ia manao e valaaulia i lana pati o Uso Jay.
Mata sa i ai sona manatu i le faatosinaga sa avea ai o ia i le olaga o le ma tama teine laitiiti? Mata na te iloa ea le ala na aafia ai e ana upu ma taga lenei vaega o tamaiti Peraimeri e tai lima tausaga le matutua? Mata na te iloa le taua tele mo au, i le avea ai ma se tina, le avea ai o ia ma se vaega o le olaga o lau tama teine?
Mulimuli ane, na siitia atu Season i le vasega a Uso Edward, ma sa faaauau pea lana aafiaga matagofie i le Peraimeri. Ou te matua faafetai mo alii ma tamaitai uma faamaoni, saunia lelei, lotomaualalo o e sa i ai se uunaiga lelei faaleagaga i le olaga o Season.
Na faamanuiaina lo matou aiga atoa e ala i le tuuto o tagata taitoatasi o e sa auauna ia i matou i lo matou ala o le alualu i luma faaleagaga. Ou te manatua se taitai Sikauti maoae, se faufautua tali-tiga o le korama a ositaulaga, se faiaoga onosai o le Seminare, se au peresitene tulaga ese o Tamaitai Talavou, ma se epikopo alofa.
E pei o le faamanuiaina sa i ai lo matou aiga, ou te iloa matou te le tulaga ese. O “Uso Jay” e mafai ona avea ma tagata e toatele, aua e toatele uso ma tuafafine tuuto o a latou auaunaga ua pai atu i olaga o aiga e pei lava o i matou. Matou te matuai faafetai mo lo latou agaga, tautinoga, sauniuniga, ma le alofa.
Faafetai atu i auauna le mafaitaulia faamaoni i le Ekalesia atoa o e na fesoasoani i lo matou aiga.
Manuia le Aso Fanau!
Ata na pueina e Nikolai Sorokin/Hemera/Thinkstock