O Mea Faafeagai o La’u Misiona
E alala le tusitala i Manaus, Pasila.
Ina ua uma ona faatalanoaina au e auauna atu i se misiona, na fai mai lo’u peresitene o le siteki, “O le a i ai ni mea uiga ese o le a tupu i lou olaga e taumafai ia te oe e suia lou mafaufau.”
Ata na tusia e Greg Newbold
Sa ou auai i le Ekalesia i le 15 o ou tausaga, ma o le fa tausaga mulimuli ane na ou tuuina atu ai la’u pepa talosaga o le misiona. I le faatalanoaga ma lou peresitene o le siteki, sa ia faamalō mai ia te au mo le filifilia e auauna atu i le Alii o se faifeautalai faamisiona. Ona fai mai lea o lena taitai musuia o se tala na avea o se uunaiga maoae ia te au: “Uso e, mai lenei taimi, o le a i ai ni mea uiga ese o le a tupu i lou olaga e taumafai ia te oe e suia lou mafaufau e uiga i lau filifiliga e auauna atu i le Alii.”
A o faatalitali mo lou valaauga o le misiona, sa ou galue i le avea ai ma se tagata faigaluega faataitai i Xerox. O lenei galuega na mafai ai e au ona maua nisi o mea o le a ou manaomia mo le galuega faamisiona ma fesoasoani ai i lo’u tina mo le totogiina o mea i le aiga. Sa matua sologa lelei mea uma.
Ae paga lea, na amata ona tutupu ni “mea uiga ese.” Muamua, sa fasia lo’u tina ma sa toetoe lava a maliu mai ona manua, ae sa faasaoina faavavega o ia e se Tama Faalelagi alofa.
I lena taimi, sa matou nonofo ai ma lo’u tina, ma tuafafine laiti e toalua, i se fale mautotogi. Sa matou ola i lou totogi ma se tamai penefiti lea sa maua e lou tina ona o le maliu o lou tama i tausaga ua mavae.
O nisi tagata, e aofia ai tagata o le Ekalesia, e fesili mai, “Mata o le a e maua le lototele e tuua ai lou tina faapenei ae alu i se misiona?” O le faalogo soo i lenei fesili na amata ai ona mafua masalosaloga i lo’u loto.
I se tasi aso na valaau mai ai lo’u peresitene o le siteki ma tau mai ua taunuu lou valaauga o le misiona ma fai atu ou te alu atu i lona ofisa i lena afiafi ina ia mafai ona ia tuuina mai le teutusi ua loa ona faatalitalia mai le laumua o le Ekalesia. Sa ou popole ma toe fiafia i le tala.
I lena lava aso, na fai mai ai lo’u pule i le galuega e fia talanoa ia te au a o lei faia le taumafataga o le aoauli. Ina ua ou ulu atu i lona ofisa, na faafeiloaia au i se auala faauo, ma sa ma talanoa mo ni nai minute e uiga i au aoaoga ma mea sa ou aoaoina i le kamupani. Ona, fai mai lea e lena alii maualuga i le faalapotopotoga o se tala e mafai ona avea ma se miti i le toatele o tagata i le aai: “Ua e faia se galuega lelei iinei i le avea ai ma se tagata faigaluega faataitai, ma e matou te mananao e faafaigaluegaina oe ma taofia ai i totonu o le au. O le a sou manatu?”
O se tasi nei o faaiuga aupito sili ona faigata o lo’u olaga. O sekone na foliga ua pei o le faavavau. Na foliga mai sa mafai ona ou lagona atu ia tagata o fai mai ia te au pe o le a ou tuulafoaia lo’u tina e aunoa ma la’u lagolago tautupe ae alu i le galuega faamisiona.
Ae ui i lea, sa ou manatua ia mea sa ou aoaoina mai tusitusiga paia ma ou taitai o le Ekalesia, ma i se auala e matua paia lava, sa ou iloa ai ma se faamautinoaga le maluelue e finagalo le Atua ia te au e auauna o se faifeautalai faamisiona o Lana Ekalesia. Sa ou iloaina o le a Ia tausia lo’u aiga, e mafai ona ou talitonuina o Ia, ma o le a lelei mea uma.
Sa ou faamatala atu le tulaga i lo’u pule, ma o lana tali o loo i ai pea i lo’u mafaufau: “Sa ou manatu o oe o se alii talavou e lelei le mafaufau, ao lea o le a e tiaiina le avanoa o lou olaga.”
Sa ou faafetai atu ia te ia mai le ta’ele o lo’u loto mo lana ofa, ma i le 28 aso mulimuli ane sa ou lipoti atu ai i le nofoaga autu e aoao ai faifeautalai i São Paulo, Pasila.
I le taimi o la’u misiona, sa saunia e le Alii mea na manaomia e lo’u aiga e ala i uo o le Ekalesia ma i ni auala faavavega. Na toefuatai mai le malosi o lo’u tina ma sa tulai mai ni avanoa fou faigaluega mo o’u tuafafine faapea ma ia.
E tutupu moni lava “mea uiga ese” pe a tatou filifili e auauna atu i le Alii. Ae o le a faaopoopo atu ma le faamaulalo la’u molimau i molimau o le faitau afe o isi o e sa o atu i le galuega a le Atua e faapea o le auaunaga faafaifeautalai ua matuai aafia ai lava lo’u olaga.