O Se Au Faaleaiga
E alala le tusitala i Alberta, Kanata.
E faigofie ona malo pe a galulue faatasi tagata uma.
“Fealofani matou uma, ma o se aiga fiafia” (Tusipese a Tamaiti, 104).
Sa mapuea Amona ao tuua e ia ma Tama le taaloga lakapi. “Ou te le malamalama,” o lana tala lea. “E tele naua a tatou tagata taaalo lelei. Aisea e le mafai ai ona tatou sikoa?”
Sa avea Tama ma se tagata taalo lakapi lelei. Atonu e mafai ona ia fesoasoani.
“Ou te manatu e tatau ona tou aoao e galulue i le avea ai ma se au,” o le tala lea a Tama. “Tou te mananao uma lava e sikoa ni ai, e sa’o?”
“Ioe,” sa fai atu ai Amona. “Ae e le mafai ona tatou sikoa uma. O le uiga lena o lau tala?”
Na lue atu le ulu o tama. “E le mafai ona maua se sikoa na o oe lava. Muamua e tatau ona aveese mai e le au puipui le polo mai le isi au, e sa’o?”
Na ata Amona. “E fai lava si faigata ona sikoa pe afai e le o ia te outou le polo.”
“Sa’o lelei,” o le tala lea a Tama. “Ona tuu atu lea e le au puipui i se tasi e mafai ona sikoa. E leai se tasi e mafai ona faia na o ia.”
“Ou te matea,” na fai atu ai Amona.
Ina ua latou taunuu i le fale, o loo siiina e Tina le pepe ao faia lana meaai o le afiafi. “Na a mai le taaloga?” na ia fesili ai.
“Na tatou toe faiaina foi,” o le fai atu lea a Amona. “Ae o le a sili atu le tatou taaalo i le isi taimi.”
“O se uiga faaalia lelei lena,” o le tala lea a Tina.
“Ua ou fia ai lava!” o le ee atu lea a Miguel, ao latou tamomoe atu i totonu ma Samuelu, ma Lucas.
“Tamaiti, e mafai ona tou fesoasoani e seti le laulau ma teu meataalo?” o le talosaga mai lea a tina.
Na tomumumu uma tama e toafa.
“Ae ou te le’i taalo i meataalo,” o le tala lea a Samuelu.
“O le a alu ai le taimi atoa!” o le tagi mai lea a Miguel.
Na ata tama. “Ou te manatu e tutusa lava le faafitauli i le tatou aiga ma le au a Amona.”
“O le a lena mea?” o le fesili lea a Samuelu.
“Tatou te le o galulue faatasi,” na fai atu ai Amona. “Tatou te mananao uma e sikoa se ai e ala i le ‘aina o le meaai o le afiafi. Ae o loo tatou tiaiina uma ia Tina.”
“Sao!” o le tala lea a tama. “E mafai faapefea ona tatou galulue o se au?”
Sa i ai se manatu a Amona. “Ae a pe a ma setiina ma Samuelu le laulau? E mafai ona pikiina i luga e isi tama meataalo.”
“Manaia le manatu!” o le tala lea a tama.
E lei umi ae ua saunia le meaai. Sa piilima Amona mo le tatalo. Sa fiafia o ia i le galulue a lona aiga o se au. Sa ia faamoemoe o le a mafai e lana au lakapi ona faia lea lava mea e tasi.
Ata na tusia e Mareko Jarman