Aiga: O Le Fatu o Aoaoga

Afai o le aoaoga i le lotu e lagolagoina aoaoga i le aiga, o le a e fausia se faavae malosi o le ola ai i le talalelei.

“Faamolemole ia mautinoa e fai le faitauga atofaina mo lesona o le vaiaso e sosoo ai.” Mata e foliga masani na upu? E masani lava ona oo mai mai se faiaoga o aioi mai i le faaiuga o se vasega o le Ekalesia.

Ma e ui e mautinoa lava le taua o le saunia mo lau lesona i Aso Sa, e te lagonaina lava o nisi taimi e pei o lau sini autu i le suesueina ma le mafaufau loloto ina ia mafai lea ona e saunia atoatoa mo le Aso Sa?

O le mea moni, e tatau ona avea ai i le isi itu.

O “aoaoga, polokalama, ma gaoioiga [uma a le Ekalesia] [e] faaautu i aiga ma e lagolagoina e le Ekalesia.”¹ O lona uiga o a tatou sauniga Lotu e tatau lava ona lagolago ai le aoaoina o le tagata lava ia ma aiga. E pei ona aoao mai le Epikopo Pulefaamalumalu o Gary E. Stevenson, “O le nofoaga autu o le aoao atu ma le aoaoina o le aiga lea.”² Afai o le aoaoina ma le aoao atu e totonugalemu lea i le aiga, o le a latou tauaveina le malosi e taitai atu ai i le liua.

O le savali lena o aoaoga mo ausilali faaletausaga o le 2014, Aoaoina ma le Aoao Atu i le Aiga ma le Ekalesia, o loo maua i le initoneti i le annualtraining.lds.org. “E leai se tasi o i tatou o loo tuuitiitia ia aoaoga i le falesa, i le falelotu,” o le tala lea a Elder Jeffrey R. Holland o le Korama a Aposetolo e Toasefululua. “Sa matou faia na mea uma i o matou olaga atoa, ae matou te fia faia aoaoga i le taimi atoa o o matou olaga o matou ola ai.”³ A o e faaaogaina na aoaoga i le 24/7 i taimi o aso uma i olaga o lou aiga, e mafai ona e faatuina ai se faavae malosi mo se “fale o le aoaoga” (MF&F 88:119) lea o le a saunia mo oe ma lou aiga se malutaga ma le puipuiga faaleagaga.

Aoaoina i le Aiga

Atonu e te le vaaia i taimi uma ia taunuuga e vave oo mai, ae a e faaaogaina taimi faigofie mo le aoaoina ma le aoao atu i ou taimi masani i aso taitasi, o le a mafai ona i ai se aafiaga mamana. O le auala lenei na matauina ai e le toatele o aiga lena aafiaga i o latou olaga.

Taimi Faigofie

A father and son carrying skateboards as they walk down a wet road.

“E i ai taimi tatou te lagonaina ai le maasiasi i le faia o ni talanoaga aloaia e uiga i ni autu e faatatau i le talalelei. O taimi o aoaoga faasamasamanoa ua faamanuiaina moni ai lava i tatou e aoao atu ni lesona taua i a tatou fanau. Ma le isi, ua sili atu taimi o aoaoga faasamasamanoa i se aso nai lo taimi o aoaoga aloaia, o lea ia tatou uumauina nei avanoa e aoao ai a tatou fanau i mataupu faavae taua. Mo se faataitaiga, sa ou aoao e uiga i le faamaoni a o fai se faatauga. E faigofie atu ona aoao e lau fanau ia mataupu faavae pe a latou vaai i le auala o faaaoga ai.”

Mona Villanueva, Filipaina

Fetufaaiga ma Talanoaga

A mother and her young daughters sitting together on a sofa. They are looking at a magazine.

“Ou te momoliina la’u fanau teine i le aoga i le pasi i taeao uma, o lea e tele ai avanoa matou te talanoa ai. I se tasi o taimi talu ai nei, sa matou iloa ai se feeseeseaiga i le va o se tane ma lana ava. Sa vave lava ona liliu mai lau fanau teine ia te au ma faatalitali mo sou manatu e faaali atu. Nai lo lena, sa ou fesili atu ia te i latou pe faapefea o latou lagona e uiga i le mea na tupu. Sa latou fai mai latou te manatu e le tatau lava i se alii ona talanoa faapena i sona toalua. Aua, sa faia se matou talanoaga e uiga i faaipoipoga ma mafutaga. Sa faaiuina la matou tietiega pasi e 30 minute ua matua faagaeetia ma musuiaina.”

Mario Lorenz, Kuatemala

Fusia Faatasi i le Taimi o Meaai Mama

Mother and children making cookies.

“O le taimi o aoaoga faasamasamanoa na fesoasoani ia te au e maua ai se mafutaga sili atu ona lelei ma lau fanau. Pe a matou saofafai i le laulau ai e ‘ai se meaai mama pe a tuua le aoga, matou te talanoa i mea na tutupu i le taimi o le aso o lo latou aoga. E masani ona tau mai e se tasi o i latou se mea sa fai atu ai se uo pe na faapefea ona lagona ina ua fai atu e se tasi se tala pe faia foi se mea. Ona mafai lea ona ou faasoa atu se molimau patino ma talanoaina lagonaina o lau tama e uiga i le mea na tupu. Ou te manatu o le faia o talanoaga tatala pe a lagonalelei le fanau, o le a sili atu ai ona latou naunau e talanoaina mea e taua pe a manaomia, aua ua latou maua se tulaga o le talitonuina, i le iloaina o le a faalogo o latou matua.”

Alyson Frost, Eleni

O Se Li’o o le Tausiga

Young family in New Zealand. The parents are holding their two boys.

“Na ma iloaina ma lo’u toalua o le ma tiutetauave muamua lava le aoao atu o le ma fanau ae le o se tiutetauave lea a taitai, peitai ma te faafetai mo mea o loo latou faia ma e ma te fesoasoani atu ia i latou i soo se mea ma te mafaia ai. O le matou uarota e i ai taitai lelei tele o e matuai taulai atu i le autalavou ma tamaiti ma faia le tele o mea e mafai ona latou fesoasoani ia latou iloa lo latou gafatia atoatoa e faavae i luga o mea na faia e le matua. Ua ou feiloai i le epikopo i ni nai taimi, ma e lelei ou fesootaiga ma taitai o le autalavou ma e masani ona fesili mai e uiga i la’u fanau ma lo latou alualu i luma. O le tulaga lea tatou te fesootai soo ai e uiga i le alualu i luma o a tatou fanau, e fesoasoani lea ia i tatou uma ina ia malamalama pe faapefea ona fesoasoani atu ia i latou.”

Jesse N. Arumugam, Aferika i Saute

Malosiaga i Tusitusiga Paia

Man studying the scriptures.

“O le suesue i tusitusiga paia e fesoasoani mai ia te au e aoao e uiga ia Keriso ma Ona uiga ina ia mafai ona ou avea faapei o Ia. E tuuina mai foi ia te au se malosi sili atu o le Agaga, lea e taialaina ma aoao mai ia te au pe faapefea ona ou faaaogaina na mea ua ou aoaoina ina ia mafai ona ou saunia e fetaiai ma luitau o le olaga ma faaosoosoga e tauai mai e Satani ia te au. A aunoa ma lenei faamanuiaga i lo’u olaga ou te iloa o le a ou le ausia lou gafatia o se atalii o le Atua.”

Natano Woodward, Egelani

Aoao i le Lotu: Mataupu Faavae e 10 e Tatau ona Silafia e Faiaoga Uma

E le gata i le faamalolosia o le mana o le aoaoina ma le aoao atu i le aiga, e mafai foi ona faamalosia le aafiaga o le potuaoga i le lotu. A o faaaogaina e faiaoga nei mataupu faavae e 10, o le a latou uunaia le liua i olaga o i latou o loo latou aoaoina.

1. Fefautuaai ma matua, o e i ai le matafaioi muamua lava i le avea ai ma faiaoga, e iloa ai manaoga o tagata o le vasega, ona aoao atu lea o na manaoga.

2. Saunia ma aoao atu e ala i le Agaga. Faailoa mai fesili ma gaoioiga e aoao ai lea o le a tuuina atu ai talanoaga e taitaiina e le Agaga ma faafaileleina ai faaleagaga tagata o le vasega.

3. Aoao atu tagata, ae le o lesona.

4. Taulai atu i aoaoga faavae autu o le talalelei.

5. Aoao atu ma le loloto se tasi o mataupu faavae autu pe lua foi nai lo le taumafai e faaaofia uma ia anomea o le lesona.

6. Valaaulia le Agaga e ala i le tuuina atu i tagata uma ia auai (tagai i le MF&F 88:122).

7. Ia aofia ai se valaaulia mamana e galue ai—e le na o se mea e alu i le fale ma faitau, ae o se mea e alu i le fale ma ola ai.

8. Tuu atu lau molimau e uiga i le aoaoga faavae—i le faaiuga o le vasega, ma soo se taimi e uunaia ai oe e le Agaga.

9. Ola i le talalelei, ma ia “faatulaga tatau” lou lava fale (tagai i le MF&F 93:43–44, 50).

10. Saili ni auala e faailoa atu le aoaoga o loo faaauau pea e ala i taimi faasamasamanoa i le olaga i aso uma.

Faamatalaga

1. Tusitaulima 2: Taitaiina o le Ekalesia (2010), 1.4.

2. Gary E. Stevenson, i le “The Ward Council—We’re All in This Together” [O Le Aufono a le Uarota—Ua Tatou I Ai Faatasi Uma i Lenei Mea] (vitio o aoaoga a ausilali 2014), annualtraining.lds.org.

3. Jeffrey R. Holland, i le “Learning and Teaching in the Home and the Church—the Home” [Aoao Mai ma le Aoao Atu i le Aiga ma le Ekalesia—o le Aiga] (vitio o aoaoga a ausilali 2014), annualtraining.lds.org.

Na Aoao Keriso i Luga o Mauga ma i totonu o Aiga

Elder Jeffrey R. Holland

“O le Faaola [sa] avea ma Faiaoga Sili. … Tatou te vaaia le tele o Lana galuega i le avea ai ma faiaoga. Ae peitai e toetoe lava a leai se tasi o lena aoaoga sa faia i se fale o le ekalesia. O Ana aoaoga sa faia i mea sa i ai tagata. Sa faia i ala televavave ma auala ‘alo ma luga o mauga ma matafaga ma i aiga.”

Elder Jeffrey R. Holland o le Korama a Aposetolo e Toasefululua, i le “Learning and Teaching in the Home and the Church—the Home” [Aoao Mai ma le Aoao Atu i le Aiga ma le Ekalesia—o le Aiga] (vitio o aoaoga a ausilali 2014), annualtraining.lds.org.

Punaoa mo le Aiga Uma

Faaaoga ia vitio o aoaoga a ausilali faaletausaga 2014 i le annualtraining.lds.org e:

• Faamalosia ai oe lava ia ma lou aiga. A o e matamata i nei vitio puupuu, mafaufau ma le agaga tatalo pe faapefea ona faaaogaina mataupu faavae latou te aoao atu i lou tulaga faaleaiga.

• Faamalosia ai lau uarota. E mafai ona matamata i lenei aoaoga i se fonotaga a taitai o loo loma a le siteki, se talanoaga o le Aso Sa lona lima a le uarota, po o se fonotaga a le aufono, e tusa ai ma le taitaiga a ou taitai faalesiteki ma faaleuarota.

• Faamalosia ai lau ausilali. E aofia ai foi i punaoa faaleaoaoga ia aoaoga e patino i ausilali lea e mafai e taitai o siteki po o taitai perisitua o le uarota ma ausilali ona faaaoga e fesoasoani ai ia te oe e faataunuu lou valaauga i le Ekalesia.

Ia faaaoga nei vitio, faatasi ai ma talanoaga e faatatau i pepa o faamatalaga, i le annualtraining.lds.org.