Aoao Atili e uiga i le Mea o loo Faapolopoloina
E alala le tusitala i Oslo, Norway.
Sa faaaluina e le autalavou i Oslo, Nouei, se aso e sauniuni ai mo le olaga o se faifeautalai faamisiona.
Faatusa o faavaa na saunia e lukas_zb/iStock/Thinkstock
Talu mai le fofogaina mai e Peresitene Thomas S. Monson o le suiga i tausaga mo le galuega faafaifeautalai, ua tali mai ma le naunautai ia le autalavou uma o le Ekalesia e le gata i le valaaulia e auauna atu ae faapea foi i le valaaulia ina ia saunia e auauna atu. Ma o se tasi o auala e saunia ai o le aoao atili e uiga i le mea o loo faapolopolo mai pe a avea oe ma se faifeautalai faamisiona.
Na faia tonu lava e nisi talavou i Nouei lena mea i le aluga o se aso atoa “Aafiaga Faafaifeautalai” sa faia e le Uarota a Fredrikstad o le Siteki a Nouei Oslo.
Ulufale atu i le “NAF”
Sa faapotopoto le autalavou i le falelotu i se potu o loo avea ma se nofoaga autu e aoao ai faifeautalai. “Sa matou maua ai se tofiga e aoao e uiga i se atunuu,” o le tala lea a Jakob R. o le Uarota a Moss. “Na tuuina mai ia i matou se lagona atonu o se lagona lea o le a i ai i le mauaina o se valaauga o le misiona ma le iloaina e mafai ona valaauina i se nofoaga e ese mai le mea ua e masani ai.”
Feiloai i le “Peresitene o le Misiona”
“Ona matou o lea i le potu na sosoo ai e feiloai ma se faifeautalai ua maea lana misiona o le sa faatinoa le matafaioi o se peresitene o le misiona,” o le tala lea a Simona W. o le Uarota a Oslo. Sa talanoaina e le faifeautalai ua maea lana misiona ma isi faifeautalai ua maea misiona le mea e tatau ona faamoemoe i ai ao auauna atu i se misiona. “Sa ou faapea sa matuai manaia le aoao mai o faifeautalai ua maea misiona ma le mea e faamoemoe i ai i le taimi o se misiona talai,” o le tala lea a Simona. Sa maua foi e tagata na auai se pine o le igoa, sa tofia i ai se soa, ma sa faatonuina e faatasi ma a latou soa i taimi uma.
Atiaeina o Tomai
Na aoao mai e ni mafutaga faaleaoaoga le autalavou e uiga i le atiaeina faaleagaga ae faapea foi i le puleaina o manaoga faaletino e pei o le faia o tagamea, mulimuli i se paketi, ma le tumau ai i le tulaga lelei faaletino.
“Sa faapitoa lava lou fiafia i mafutaga faaleaoaoga e uiga i auala e amata ai talanoaga o le talalelei,” o le tala lea a Inger Sofie J. o le Uarota a Oslo. “O se mea lena e mafai ona ou amata loa ona faia i le taimi nei.
“Sa ou fiafia i le talanoaina pe faapefea ona faaaoga le Talai La’u Talalelei,” o le tala lea a Karl Frederik O. o le Uarota a Fredrikstad. “Sa ou manatu lava o faifeautalai sa i ai a latou lava lisi o tusitusiga paia e aoao ai, ae sa ou iloa ai o mea o loo ou faia i le seminare o le a fesoasoani mai ia te au o se faifeautalai ma e faapena foi i mea o loo ou suesueina i le Talai La’u Talalelei.”
Na fai mai le toatele o alii talavou o se tasi o mafutaga faaleaoaoga e sili ona manatua pea na aofia ai aafiaga e faatatau i le auliina o se ofutino paepae. “E faamanatu mai ia te au o loo i ai le tele o tomai aoga e mafai ona ou galue ai ia saunia ai mo se misiona talai,” o le tala lea a Jakob.
“Sa ou iloa o loo i ai le tele o mea e mafai ona ou faia nei e auai atu ai ma faifeautalai faamisiona o loo auauna atu iinei ina ia avea i tatou uma o se vaega o le au lava e tasi,” o le tala lea a Sara R. o le Uarota a Sandvika. “O tagata o le ekalesia o faifeautalai foi.”
O se faamanatu o faifeautalai e auauna atu i le lalolagi atoa, o taumafataga mama e faaalia ai fua o kuka mai atunuu eseese. “Na faamanatu mai ia te au e lena mea le tatau ona ou taumafai e fai meaai fou nei ina ia ou masani ai i le faataitaia o mea ou te le ‘ai ai i le tele o taimi. O le a fesoasoani lena mea ia te au e fetuunai vave ai pe afai ua valaauina a’u i se nofoaga latou te taumamafa i meaai ou te le masani ai,” o le tala lea a Simona.
Sauni
“I le faaiuga o le aso, ina ua uma ona matou faalogo i molimau a talavou e toalua ma faifeautalai e toalua faatoa maea misiona, sa matou usuina le pese ‘Tofia e Auauna i le Atua,’” o le tala lea a Liss Andrea O. o le Uarota a Fredrikstad. “Sa ou lagonaina afai ou te usuina pea lenei pese i taimi uma lava, o le a maua se faamanatu faifai pea faapea afai e avea i tatou ma faifeautalai, o loo tatou auauna atu i le Tama Faalelagi ma o le a Ia faamanuiaina i tatou.”
E oo atu i le faaiuga o le aso, sa malamalama le autalavou i le siteki e le gata o loo latou sauniuni mo se aafiaga faafaifeautalai faamisiona ae e mafai ona latou maua ni aafiaga faafaifeautalai i le taimi nei ma i o latou olaga atoa.