O Uo mai le salafa o le Lalolagi
Ou Au o Bárbara mai Chile
E alala le tusitala i Iuta, ISA.
¡Hola, amigos!*
E nofo Bárbara i Chile, o se atunuu i le talafatai i sisifo o Amerika i Saute. E umi ma paee ma e pei o se lipine. O nisi o eria e vevela ma mamago (e pei o le Toafa a Atacama), ma o nisi e vevela ma susu (e pei o le Motu o le Eseta). E nofo o ia i le laumua o Chile, o Santiago.
Na o a’u le tagata o le Ekalesia i la’u vasega i le aoga. O lenei mea e aumaia ai ia te au avanoa e ta’u atu i au uo e uiga ia Iesu Keriso ma le Tusi a Mamona. I se tasi taimi sa fai mai la’u uo mamae ia te au e aoao atu ia te ia le auala e tatalo ai. O lea sa ou faia ai. Ona ma faia uma lea o se tatalo i le taimi o le malologa i le aoga.
E iva o’u tausaga ma e toalua ou tuagane laiti. Ou te taumafai e avea ma se tuafafine matua lelei ma fesoasoani e tausia i laua ma taaalo faatasi ma i laua. Ou te fiafia i le tausiga o tamaiti. Ou te manao e avea ma se faiaoga pe a ou matua.
I le 2013 sa atoa ai lou valu tausaga ma sa papatisoina ma faamauina e lo’u tama. Sa ou matuai fiafia lava! O se aafiaga faapitoa o le a ou manatua pea.
Matou te faamanatuina aso malolo fiafia i Chile. O le aso 18 o Setema o le Aso o le Tutoatasi, ao le aso 19 o le Aso o Vaegaau Faaauupegaina. I le taimi o nei aso e lua, matou te sisiva ai i lo matou siva a le atunuu e ta’ua o le “La Cueca” ma aai i pai e fai i aano o manu fasi e ta’ua o empanadas.
I le faaiuga o vaiaso, e fiafia lava lo’u aiga e alu se savaliga sopo ma tietie i taavale fa-pau i luga o mauga e lata ane i lo matou fale. Matou te fiafia foi e o i le matafaga.
E i ai le matou taumafataga faapitoa o le Kerisimasi—o tamato e faatumu i le tuna. I Chile, e sau tonu lava Santa Claus i le vaeluapo o le Po o le Kerisimasi. Matou te feala lava seia sau o ia!
Taumatau: ata o taga na tusia a Thomas S. Child