Tatou te Talanoa ia Keriso
O Le Kapisi Maataua Lanu Meamata
E alala le tusitala i Iuta, ISA.
I la’u misiona i Taiuani, sa ma faaaluina ai ma la’u soa sina taimi o se tasi o aso sauniuni i le Falemataaga o le Maota o le Malo i Taipei. O le faatosinaga autu o se vaega o le galuega taulima ua ta’ua o le Kapisi Maataua Lanu Meamata. Sa toatele tagata na faamemelo i ai, ae na pau lava le mea sa ou vaaia o se kapisi na vaneina mai se maataua lanu meamata. Sa manaia, e mautinoa lava, ae atonu sa i ai se mea sa ou misiina.
Ina ua matou foi mai i le falemataaga, sa ou fesili atu i la’u soa, O le a sou manatu i le Kapisi Maataua Lanu Meamata?”
“Ou te fiafia i lena galuega taulima!”
“Aisea?” o lau fesili lea. “E na o se kapisi lava.”
“E te mo’i lava? O le Kapisi Maataua Lanu Meamata o se faatusa lea mo lo’u ola!” sa ia alaga mai ai.
“Le kapisi?”
“Ioe! E te le iloa le tala?”
“E foliga mai e leai.”
Sa ia tau mai ia te au le tala. Ma sa sa’o o ia. Na avea ma faatusa mo la’u misiona ma lo’u olaga.
Mo se maataua e vaneina ina ia taua tele, e tatau ona tasi se lanu mautu o le maataua. O galuega taulima na vaneina mai se maataua lelei e faatauina lea mo se tau maualuga aua e toetoe lava a le maua se maataua lanu meamata lelei atoatoa. O le Kapisi Maataua e lanu meamata le tasi itu ae lanu paepae le isi itu, ma e i ai mavetevete ma galugalu. E leai se tagata vane mamanu atamai o le a maimau se taimi i sea ituaiga maataua lanu meamata, seia iu ina sau se tasi e ta’ua e tagata Saina o se matai vane mamanu.
Pe ana mafai ona tautala lenei maataua, e mafai ona ou vaai faalemafaufau pe o le a se talanoaga o le a faia ma lenei vane mamanu fou. Ou te vaai faalemafaufau atu i le tagata vane mamanu o pikiina i luga lenei fasi maataua.
“O le a se mea e te manao i ai?” o le a fesili atu ai le maataua.
“O loo ou sailia se maataua e vaneina,” o le tala lea a le tagata vane mamanu.
“Ia sue se isi fasi maataua. E leai so’u aoga. E lua ou lanu e eseese ua matua fili faatasi e le mafai ona e toe tuueseeseina. E i ai ou mavetevete ma galugalu. Ou te le toe aoga lava. Aua le faamaimauina lou taimi.”
“Oi, le maataua e, laitiiti faavalevalea. Talitonu mai ia te au. O au o se matai vane mamanu. O le a ou faia oe o se galuega taulima silisili.”
O le mea e ofoofogia ai le Kapisi Maataua Lanu Meamata ona sa faaaogaina e lenei matai vane mamanu e le mailoa na faaaogaina ia vaega le lelei o le maataua—o lanu e lua, o mavetevete, ma galugalu—ina ia faia ai le kapisi e pei lava o se mea moi. O le vaega paepae mafiafia na avea ma au o le kapisi, ma o mavetevete ma galugalu na foliga mai ai ua ola laulaau. Pe ana leai ia “vaega le lelei” o lenei maataua, semanu e le foliga mai o se mea ua matua moi lava.
Ona o le matagofie o lenei galuega taulima, na avea ma se meaalofa mo se tasi o le aiga tupu i Saina ma na teuteuina ai faapaologa o maota matagofie o Asia seia oo ina iu i le falemataaga i Taiuani.
E faamanatu mai ai ia te au le Eteru 12:27: “Afai e o mai tagata ia te au o le a ou faaali atu ia te i latou o latou vaivaiga. … Ua lava lo’u alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”
Ina ua uma ona ou vaai i le Kapisi Maataua Lanu Meamata, na amata ona aumaia e lenei mau se malamalama fou. E faapei uma lava i tatou o lenei maataua, peitai o loo tatou i ai pea i le faagasologa o le vaneina. E tatau ona tatou faalagolago i le matai vane mamanu, o Iesu Keriso, o le o le a aveina o tatou vaivaiga ma faia ia avea ma malosiaga. O i tatou, i la tatou vaaiga lē atoatoa, o nisi taimi e taulai atu ai i o tatou le atoatoa ma sosoo ai ma le faanoanoa ona tatou te mafaufau tatou te le talafeagai. Ae e silasila mai lo tatou Faaola, o Iesu Keriso, ia i tatou i le mea e mafai ona avea ai i tatou. A o tatou faatagaina Lana Togiola e galue i o tatou olaga, o le a Ia faafoligaina i tatou i le galuega taulima silisili lea o le a i ai se aso e nofo faatasi ai ma le Tupu o tupu.