O La’u Tatalo i le Sami i Matu

Olaf Thorlief Jensen, Iuta, ISA

Ina ua 17 o’u tausaga, sa matou nonofo i se motu i saute o Nouei e ta’ua o Andabeløy. Na liliu mai lo’u tama i le Ekalesia i Andabeløy, ma sa ou papatiso i le vasa iina.

Sa avea au o se faifaiva i lena taimi, ma sa ou malamalama lelei i le taulimaina o se vaa. Sa tuu au e lo’u tama e vaaia la matou auaunaga laupasese i luga o le vasa e faaaoga e tagata o loo nofoia le eria.

I se tasi aso i le 1941 sa matou mauaina se valaau mai le fomai i Flekkefjord, i le itu i matu. O se tamaitai e nofo pe a ma le lua itula le mamao ese mai le vaa na manaomia vave se vaaiga faafomai. Sa talosaga mai Dr. Hoffman pe mafai ona ou aveina o ia e vaai le tamaitai, ae sa popole ou matua i se afa fulifao i le Sami i Matu. Sa matou filifili e tatalo, ole atu i le Tama Faalelagi po o le a le mea e fai. Sa matou mauaina se tali e tatau ona ou faaauau.

Ina ua ou tuuina Tryg, o lau vaa fagota e 31-futu (10 m) le umi i le sami, sa leaga le tau ma sa tetele ia galu. Ina ua uma ona pikiina le fomai, sa ou folau agai atu i le vaega vaapiapi ma agai atu i le vasa. Na tatau ona ma malaga atu i se nuu e i le itu i matu o Lista, o loo i ai i le talafatai papa i saute o Nouei—e lauiloa mo tau matagia ma vaa faaleagaina.

Sa ou uliina le foeuli e ala atu i le matagi seia oo ina ma taunuu atu i se vaegavai lauitiiti papa, e tusa ma le 40 futu (12 m) i le isi itu, lea e tau atu i le mea ma te taunuu i ai. O galu matuai maualuluga na fafati faanatinati atu i le vaegavai lauitiiti ma taia ai ia papa, sa le mafai ai ona ou faafoeina le vaa e agai atu i le vaegavai lauitiiti.

“O le a se mea e tatau ona ta faia?” na fesili mai ai le fomai i le taimi o le malosi o le matagi.

“E tatau ona ta tatalo e uiga i ai,” sa ou tali atu ai.

Sa ou malolo ma tatalo, aioi atu i le Tama Faalelagi mo se taitaiga. O le taimi lava sa ou fai atu ai amene, sa oo manino mai ia te au se tali. Na faafuasei lava ona ou manatuaina se tala a se faifaiva matua na tau mai ia te au. Sa ia fagogota i lenei lava vaega e tasi i le taimi o se matagi leaga ma le mafai ai ona oo i le matafaga. A o ia faatalitali ina ia faaitiitia le matagi, sa ia matauina se mamanu i galu o fafati mai. Ina ua uma ona fafati mai ni galu maualuluga se tolu, ona sosoo ai lea ma se taimi puupuu o le toafilemu—e lava le umi na te ulu atu ai i le vaegavai lauitiiti.

Sa ou fagota i le tele o taimi i lenei eria, ae sa lei iloaina se mamanu o galu. Ae ui i lea, sa ou aumaia le vaa i le pito i luma o le vaegavai lauitiiti, lea na ma faatalitali ai ma matamata ao fafati mai galu lapopoa e tolu. E sa’o lava, na sosoo ai ma se malū faafuasei. Sa ou faaseeina i luma le vaa i luga o vai laugatasi o le faga ma avatu Dr. Hoffman ma le saogalemu i le matafaga. Sa ia faanatinati atu i le tamaitai ma’i a o ou faatali atu i le vaa, ma faafetai ai i le taliina mai e le Tama Faalelagi o la’u tatalo.

Ina ua toe foi mai le fomai pe tusa ma se itula mulimuli ane, sa ia tautino mai, “Ua ta faasaoina lona ola!”

O le lagonaina o le toafilemu i le tala ma le lelei o le tau, sa ou aveina atu ai le vaa i le fale e aunoa ma se mea na tupu.

Ou te molimau atu afai tatou te manaomia le fesoasoani, e tatau ona tatou tatalo. Ou te iloa o le a tali mai le Tama Faalelagi.

Sa matua maualuluga ia galu sa le mafai ai ona ou faafoeina le vaa e agai atu i le vaegavai lautiiti.