Lototele e Filifili le Tauagafau
Saunia e Carol F. McConkie
Fesoasoani Muamua i le Au Peresitene Aoao o Tamaitai Talavou
Mai se saunoaga na tuuina atu i le aso 2 o Me, 2013, i le Konafesi a Tamaitai i le Iunivesite a Polika Iaga.
O le a se mea e mafai ona tatou aoao atu i o tatou atalii ma afafine e fesoasoani ia i latou ina ia maua le lototele e filifili ai le tauagafau i se lalolagi o le a tauemu mai ia te i latou mo a latou filifiliga mama?
Aisea e matua taua ai le tauagafau? Aisea o le a taua ai i le Alii le mea e gata ai le umi o le ofu, le tele o le ua o le ofu, po o se mitiafu? O au o se tina o se fanau teine e toalima ma tama e toalua, ma e pei ona e vaai faalemafaufau i ai, o le autu o le tauagafau e oso soo mai lea taimi i lea taimi i lo matou aiga. Ae i le tele o tausaga, ua ou iloaina o le tauagafau e sili ona aoaoina e ala i le aoao atu o aoaoga faavae ma faatuina se faataitaiga lelei. O le a fesoasoani le aoaoga faavae ia tatou fanau ia malamalama ai pe aisea e taua tele ai le tauagafau, ma o le a faaalia ai e a tatou faataitaiga ia faamanuiaga o le tauagafau i ni auala fiafia.
O Le A Le Tauagafau?
O le tauagafau o se mataupu faavae na tuuina mai e le Atua e mafai ona fesoasoani ia i tatou e faaaoga ma le talafeagai o tatou tino iinei i le olaga nei. O le faauigaga o le tauagafau i le faamaoni i le Faatuatua o “Se uiga o le lotomaualalo ma le faaaloalo e ala i laei, teuga, gagana, ma amioga.”1 O le tauagafau e le toilalo pe mimita. O tagata tauagafau e le faaaogaina o latou tino po o a latou amioga e sailia ai le faamaoniga mai le lalolagi pe faatosina atu i a latou lava mea moni ua ausia pe tatau ona ausia po o uiga e manaomia.
Faamolemole ia manatua o mataupu faavae o le tauagafau o loo faasoa mai iinei e faatatau uma i alii ma tamaitai, atalii ma afafine, ma ia manatua e tusa lava pe afai o tatou aoao atu ma fai faataitaiga o le tauagafau, tatou te le faasalaina lava i latou o e filifili ia sakete puupuu po o “lauulu lanu nuanua ma le tele o mama matagofie.”2 Tatou te faaalia pea e le aunoa le agaalofa ma le alofa faaKeriso mo tagata ao tatou tumau faamaoni i tulaga faatonuina na faatuina e le Alii.
Ou te molimau atu o filifiliga tatou te faia e faaalia ai ma amio ai tauagafau o loo auina atu ai se savali mamana faapea ua tatou malamalama i lo tatou faasinomaga o ni atalii ma afafine o le Atua ma ua tatou filifili e tutu i nofoaga paia.
Ou te fiafia i lenei mau: “Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou? … E paia le malumalu o le Atua, o outou lava ia” (1 Korinito 3:16–17). O tatou tino o malumalu ia o o tatou agaga. O le malumalu o lenei tino tatou te valaaulia ai le mafutaga a le Agaga Paia. Ou te talitonu afai tatou te filifili e ofuina lavalava tauagafau ma amio i se uiga tauagafau, ua tatou te oofu ma tatou ola i la tatou molimau i le Atua le Tama Faavavau ma Lona Alo o Iesu Keriso. Tatou te molimau atu e ala i o tatou foliga vaaia faaletino o i tatou o soo o Keriso ma o lea tatou te ola i Lana talalelei.
Aisea e Taua ai le Tauagafau?
Ua tatou ola i se lalolagi o le lelei ma le leaga, ma o le tino faaletino e mafai ona faaaogaina a le o faamoemoega amiotonu po o le amioleaga. Ae ua tatou iloa o o tatou tino faapelepele o se meaalofa mai le Atua ia i tatou taitoatasi. E paia. Na aoao mai Elder David A. Bednar o le Korama a Aposetolo e Toasefululua, “Ia i latou e iloa ma malamalama i le ata o le faaolataga, o le faatautala i le tino o se gaoioiga o le fouvale [tagai Mosaea 2:36–37] ma o se faafitia o lo tatou faasinomaga moni o ni atalii ma afafine o le Atua.”3 Tatou te filifili e tausia ma puipuia o tatou tino ina ia mafai ai ona avea i tatou o ni meafaigaluega i aao o le Atua e faataunuu ai Ana faamoemoega mamalu (tagai i le Alema 26:3). Afai tatou te mananao e tutu atu mo le Faaola ma fai Lana galuega, e tatau ona tatou fesili ifo ia i tatou lava, Afai e tu le Faaola i o tatou tafatafa, pe o le a tatou lagona ea le toafilemu i laei o tatou ofuina?
O le tauagafau i lavalava, foliga vaaia, manatu, ma amioga o le faamaoniga lea o loo tatou malamalama i feagaiga na tatou osia lea e faamanuiaina ai i tatou, puipuia i tatou, ma faatagaina ai i tatou i a tatou sauniuniga e toe foi atu i Lona afioaga. Ina ua tatou papatiso, na tatou laa ese mai le lalolagi ma agai atu i le malo o le Atua. O mea uma e tatau ona eseese mo i tatou. Na aoao mai Elder Robert D. Hales o le Korama a Aposetolo e Toasefululua: “O le filifili ia i ai i Lona malo, tatou te vavaeese—ae le o le faaesea—mai o i tatou mai le lalolagi. O le a fai lelei o tatou laei, o le a mama o tatou mafaufau, ma mama foi la tatou gagana.”4
O le tauagafau o se mataupu faavae o le a fesoasoani e taofia ai i tatou ma le saogalemu i le ala o le feagaiga a o tatou agai i luma i le afioaga o le Atua. O le tauagafau i laei ma foliga vaaia ma mafaufauga ma amioga o le a fesoasoani e saunia ai i tatou e osia ma tausia feagaiga paia o le malumalu. Ina ia faamanuia ma puipuia Atamu ma Eva, na tuuina atu e le Atua ia i laua ni ofu paʼu manu e faaofuina ai i laua a o lei auina atu i laua i fafo o le faatoaga. E faapena foi, ua tuuina mai e le Atua ia i tatou se ufiufi o feagaiga i le olaga nei, e faatusa i o tatou ofusa o le malumalu.
O A Ni Faamanuiaga o le Tauagafau?
O le a se mea e mafai ona tatou aoao atu i o tatou atalii ma afafine e fesoasoani ai ia te i latou ia maua le lototele e filifili ai le tauagafau i se lalolagi o le a tauemu ma sauaina i latou mo a latou filifiliga o le mama ma le amiomama? Pe ua latou vaaia i tatou o faaaogaina o tatou tino e tosina mai ai po o le faamamaluina o le Atua?
O le tauagafau i mafaufauga, upu, foliga vaaia, ma amioga e fesoasoani ia i tatou e maua ai ni faamanuiaga mamana ma faamamaluina se tolu.
1. O le tauagafau e valaaulia ai le mafutaga faifai pea a le Agaga Paia. Ua aoao mai Elder Hales, “O le tauagafau e taua i le agavaa ai mo le Agaga.”5
Sei o tatou fesoasoani i a tatou fanau ia malamalama latou te le mananao e faia soo se mea e taofia ai mai ia i latou “le meaalofa lē mafaamatalaina a le Agaga Paia” (MF&F 121:26). Fesoasoani ia i latou ia iloa o na meaalofa faaleagaga taua ma le mamana e o mai faatasi ma Lana mafutaga paia. Ua folafola mai e le Atua, “O le a Ou faaali atu ia te oe ai lo’u Agaga, lea o le a faapupula ai lou mafaufau, lea o le a faatumulia ai lou agaga i le olioli; … Pe o le a e iloa i lenei mea, i le faatuatua i le talitonu mai ia te au o le a e mauaina, mea uma o soo se mea e te manao mai ai ia te a’u, ua faatatau i mea o le amiotonu” (MF&F 11:13–14). O le malamalama, poto, ma le molimau; olioli, filemu; ma le fiafia—o nisi nei o faamanuiaga silisili e mafai ona tatou folafola atu ia tatou fanau pe a tatou valaauliaina i latou e ola tauagafau ma ia agavaa ai mo le Agaga Paia.
O se tasi o luitau o le ofuina o ofu talafeagai ona o tifiga ma amioga e taliaina faalevaifafo e sui soo. O tulaga faatonuina a le Alii e le suia lava. Aoao atu alii talavou ma tamaitai talavou ina ia mataala i le Agaga a o latou faia ni filifiliga e uiga i mea e ofuina, tautala ai, ma faia. A o latou ola latalata i le Agaga, e le manaomia ona latou faapei o le lalolagi.
Ua maua e a tatou fanau le meaalofa o le Agaga Paia, ma o loo latou malaga i le ala o le feagaiga e tau atu i le malumalu ma o le a toe faafoi atu i latou i le afioaga o le Atua. Latou te manaomia i tatou e faamautinoa atu ia te i latou ma fai ma faataitai ia i latou o le a taialaina, puipuia, faamafanafanaina, ma faamamaina i latou a o latou ola agavaa mo le Agaga Paia.
2. E mafai ona tatou aoaoina o tatou atalii ma afafine e faapea o foliga vaaia ma amioga tauagafau o le a fesoasoani e puipuia i tatou mai aafiaga le lelei o le lalolagi. O se tasi o auupega sili ona taufaasese o loo faaaoga e faasaga ia i tatou uma, o le uiga lautele ua taliaina e faapea o le ola mama ua tuai. O le tauagafau o se puipuiga e tetee atu i na ituaiga uunaiga leaga ma o se puipuiga o le legavia ma le mama. Faalogo i upu nei i le Mo le Malosi o le Autalavou: “A o lei faaipoipo, … aua lava nei … faia soo se mea e faaosoina ai ni lagona feusuai.”6 O le foliga vaaia ma amioga le tauagafau e masani lava ona faaosofia ai lagona feusuai ma o le a lepetia ai i lalo papupuni ma valaaulia ai le tele o faaosoosoga e solia le tulafono o le ola mama.
Ua aoao mai Elder Hales: “O le tauagafau e i totonugalemu o le avea [ma se tagata] mama aiai ma le nofo mama, i mafaufauga ma amioga. O le mea lea, talu ai ona na te taialaina ma faatosinaina ai o tatou mafaufauga, amioga, ma filifiliga, o lea e avea ai le tauagafau ma se vaega tutotonu o o tatou uiga.”7 Aoao atu ma fai ni faataitaiga o le tauagafau e fesoasoani ai io tatou alii talavou ma tamaitai talavou ia saunia e puipuia ia mana foafoa i totonu o i latou. Fesoasoani ia i latou e taofimau i mea paia ma faasaoina le faailoaga o le alofa i le va o se tane ma se ava mo le faaipoipoga.
3. O le tauagafau e mafai ai ona tatou “tutu o ni molimau a le Atua i taimi uma” (Mosaea 18:9). Sa fetalai mai le Faaola: “Ia tuu i luga lo outou malamalama ina ia susulu atu i le lalolagi. Faauta o au o le malamalama lea e tatau ona outou tuu i luga” (3 Nifae 18:24). Ua i ai se poloaiga paia e avea ma se sulu taiala i le lalolagi, e faaalia ai le olioli i le ola ai i le talalelei, e aoao atu le amiotonu, ma fausia le malo o le Atua i le lalolagi. O i tatou taitoatasi e atagia mai ai le Malamalama o Keriso pe a tatou tauagafau ma mama, ma tausi i poloaiga. O le tauagafau o se tautinoga o la tatou molimau i le Faaola ma i le talalelei a Iesu Keriso.
E maeu le matagofie ma le faamanuiaina o i latou o e o loo taialaina e le Agaga Paia, o e puipuia i latou lava mai mea o le lalolagi, ma o loo tutu o ni molimau a le Atua i le lalolagi. Ma amuia lava i latou o e fai ma faataitaiga ma aoao atu le aoaoga faavae o le tauagafau mo atalii ma afafine o Siona.
A o tatou osifeagaiga e mulimuli i le Faaola ma manao ia maua le atoatoaga o faamanuiaga o Lana Togiola i o tatou olaga, e na o le tasi lava le ofu e taua. Na faamaumauina e Moronae, “Ala mai, ma tulai mai i le efuefu, … ioe, ma ofu ou ofu matagofie, le afafine e o Siona; … ina ia mafai ona faataunuuina o feagaiga a le Tama faavavau” (Moronae 10:31; faaopoopo le faamamafa).
O ofu matagofie o ofu talaloa o le amiotonu, e laeiina e i latou o e na tausia a latou feagaiga. Pe ua tatou saunia ea a tatou fanau e ofuina nei ofu matagofie?
Ou te molimau atu o le faaolataga o loo ia Keriso ma o i latou o e na tausia a latou feagaiga o le a “maua e e amiotonu se malamalama atoatoa o lo latou olioli, ma lo latou amiotonu, ua faaoofuina i le mama, ioe, i le ofu talaloa lava o le amiotonu” (2 Nifae 9:14).