O le aoaoina e Alema o Kori’oa

Ua Faailoa Mai i Mea Uma e i Ai le Atua (Alema ma Kori’oa), saunia e Walter Rane

6--12 Iulai

Alema 30–31

“Le Mana o le Afioga a le Atua”

Suesue le Alema 30--31 ma le manatu i tamaiti o loo e aoaoina. A o e mafaufau i o latou malosiaga ma manaoga, o le a fesoasoani le Agaga Paia ia e iloa le auala e aoao ai i latou.

Tusi faamaumau Ou Lagona Uunai

aikona e fefaasoaai

Valaaulia le Fefaasoaai

Valaaulia tamaiti e faasoa mai tali i fesili e pei o nei: O le a le taimi e tatau ona tatou tatalo ai? O le a le mea tatou te fai atu ai pe a tatou tatalo? Mata e mafai e se tasi ona fetufaai pe na faapefea ona tatalo tagata Sa Sorama pe na faapefea ona tatalo Alema?

aikona e aoao atu

Aoao atu le Aoaoga Faavae: Tamaiti Laiti

Alema 30:44

E Molimau Mea Uma i le Atua.

Sa faasino atu Alema i mea i le lagi ma luga o le fogaeleele e molimau atu o loo soifua le Atua ma taitaia le atulaulau. O a mea e mafai ona e fesoasoani i tamaiti o siomiaina i latou o molimau mai e uiga i le Atua?

Gaoioiga e Mafai Ona Fai

• Faitau le Alema 30:44 i tamaiti, ma fai atu i a i latou e faalogo mo mea na fai mai Alema e fesoasoani tatou te iloa ai e moni le Atua. Faaali atu ni ata o nisi o nei mea, ma fai atu i tamaiti e faasino i ata pe a e faitau e uiga ia i latou i le fuaiupu. Valaaulia tamaiti e tusi ni ata o mea e fesoasoani latou te talitonu ai i le Atua.

• Afai e mafai, ia e savalivali i fafo ma tamaiti pe fai atu foi ia i latou e tutu i le faamalama aʻo e faitauina le Alema 30:44. Fai atu i a i latou e faasino mai mea latou te vaai i ai e fesoasoani latou te iloa ai e moni le Atua. E mafai foi ona fesoasoani le itulau o gaoioiga mo lenei vaiaso.

• Fai atu i tamaiti e nonofo i se lio ma usu faatasi se pese e uiga i foafoaga a le Atua, e pei o le “E Alofa Lo’u Tama Faalelagi Ia Te A’u” (Tusipese a Tamaiti,16). A o pepese tamaiti, valaaulia i latou e pasi se mea e pei o se polo. A taofi le musika, fai atu i le tamaitiiti o loo uuina le mea faitino e faasoa atu se mea se tasi na foafoaina e le Tama Faalelagi e faafetai ai o ia.

Alema 31:5

O le afioga a le Atua e mamana.

Pe a mafaufau tamaiti i le mana, atonu latou te mafaufau i mea e pei o tagata maoa’e, masiofo, po o tupu. E mafai ona e fesoasoani ia latou malamalama o le afioga a le Atua e sili atu ona mamana nai loo “se isi lava mea” (Alema 31:5).

Gaoioiga e Mafai Ona Fai

• Tusi se pelu i luga o le laupapa. Faitau le Alema 31:5 i tamaiti, ma valaaulia i latou e faalogo mo le mea na fai mai ai Alema e sili atu le malosi nai lo le pelu. Faasoa atu se taimi na i ai se aafiaga mamana a le afioga a le Atua ia te oe.

• Usu faatasi se pese e faatatau i tusitusiga paia, e pei o le “Scripture Power” (music.ChurchofJesusChrist.org), ma fai i tamaiti e faalogo pe faapefea ona fesoasoani tusitusiga paia i a i tatou. Toe fai le fasi fuaitau “O le afioga a le Atua e sili atu ona mamana nai lo …” i ni nai taimi, ma fai i tamaiti e fesoasoani ia te oe e faauma le fuaitau.

Alema 31:8--35

E faafofoga mai le Tama Faalelagi i a’u tatalo.

Na lagona e Alema le faanoanoa ina ua ia vaai i le ala na tatalo ai sa Sorama (tagai Alema 31:24)---e lei talitonu i latou ia Iesu Keriso ma e masani ona latou faia le tatalo e tasi i se nofoaga e mafai ai e tagata uma ona vaai ia i latou (Alema 31:13--14). Ae o le tatalo a Alema na faaalia ai le lotomaualalo ma le faatuatua ia Keriso.

Gaoioiga e Mafai Ona Fai

• Otooto puupuu le tala a Alema ma sa Sorama mo tamaiti e faaaoga ai fuaiupu mai le Alema 31:8--35. E mafai foi ona e faaaogaina le “Mataupu 28: O Tagata Sorama ma le Rameutoma” (Tala o le Tusi a Mamona 78--80, po o le vitio talafeagai i luga o le ChurchofJesusChrist.org). Faailoa atu eseesega i le va o le tatalo a sa Sorama ma le tatalo a Alema. Valaaulia tamaiti e vaai faalemafaufau na latou feiloai ma se tasi o fanau a sa Sorama. O le a se latou tala e fai e aoao ai o ia i le auala e tatalo ai?

• Fesoasoani i tamaiti e faailoa mea na fai mai ai Sa Sorama i a latou tatalo (tagai Alema 31:15--18) ao latou fesoasoani ia te oe e fausia se olo Rameutoma i poloka po o le maa. Faamalamalama atu e le o le auala lea tatou te tatalo ai. Fai atu i tamaiti pe faapefea ona tatou tatalo, ma tuu atu ia i latou e aveese se poloka po o se maa mo mea taitasi latou te taʻua.

aikona e aoao atu

Aoao atu le Aoaoga Faavae: Tamaiti Matutua

Alema 30

Ua lapataia au e le Tusi a Mamona mai aʻoaʻoga sese.

O aoaoga sese a Korioa o loo faamatalaina i le Tusi a Mamona e fesoasoani ai ia i tatou ia iloa ma teena aoaoga tutusa i o tatou aso.

Gaoioiga e Mafai Ona Fai

• Faaali atu nisi o mea (e pei o tupe po o meaai) ma meataalo faafoliga o nei mea. O fea le mea e sili ona mananao i ai tamaiti? Fesoasoani i tamaiti e sue le Alema 30:12--18 mo pepelo po o aoaoga sese na aoao mai e Korioa e uiga i le Atua.

• Fesoasoani i tamaiti e iloa ia pepelo na aoao atu e Korioa ma tusi i luga o fasi pepa e tuu i luga o le laupapa (tagai Alema 30:12--18, 24). Fai atu i tamaiti e suesue le Alema 30: 32--35, saili mo auala na tali atu ai Alema i pepelo a Korioa. Fai atu i tamaiti pe mafai faapefea ona latou iloa o mea na aoao atu e Alema e moni.

  Na talanoa Kori’oa ma Alema

  Ua Faafetaiaʻia e Kori’oa Alema, saunia e Robert T. Barrett

Alema 31:5

O le afioga a le Atua e sili atu ona mamana nai lo se isi lava mea.

O anafea na e lagonaina ai le mana o le afioga a le Atua? Mafaufau pe mafai faapefea e ou aafiaga ona musuia tamaiti o loo e aoaoina.

Gaoioiga e Mafai Ona Fai

• Valaaulia tamaiti e mafaufau i se mea po o se tasi e malosi, pe faaali ata o ni nai mea mamana. O a mea e faʻamalosia ai nei mea? Faitau faatasi le Alema 31:5 , ma fesili i tamaiti pe o le a so latou manatu i le uiga o lenei fuaiupu. E faapefea ona malosi le afioga a le Atua nai lo le pelu? O le a le mea e i ai le mana e fai ai?

• Faafesootai muamua ni nai tamaiti, ma fai atu ia i latou e mafaufau i se aafiaga e faasoa atu i le vasega ina ua fesoasoani tusitusiga paia po o se lauga mai se taitai o le Ekalesia latou te faia se mea lelei. Aisea na avea ai le afioga a le Atua ma mea latou te mananao ai e faia mea lelei?

• Usu se pese faatasi ma tamaiti e faatatau i le afioga a le Atua, e pei o le “Saili, Mafaufau Loloto, ma Tatalo” po o le “Mulimuli i le Perofeta” (Tusipese a Tamaiti, 66, 58). E mafai foi ona latou usuina le “Scripture Power” (music.ChurchofJesusChrist.org).

Alema 31:8--35

E mafai ona ou lotomaualalo.

Mai mea sese uma sa faia e sa Soramă, o lo latou faamaualuga na foliga mai na sili ona faanoanoa ai Alema. E mafai ona avea lenei mea ma avanoa e aoao atu ai i tamaiti le taua o le lotomaualalo.

Gaoioiga e Mafai Ona Fai

• Fesoasoani i tamaiti ia malamalama i le eseesega o le faamaualuga ma le lotomaualalo (tagai “Faamaualuga” ma le “Lotomaualalo, Agamalu” i le Taiala i Tusitusiga Paia). Fai atu i tamaiti e auaua’i i le faitauina o le Alema 31:24–28. Pe faitau faatasi le “Mataupu 28: O Tagata Sorama ma le Rameutoma” (Tala o le Tusi a Mamona 78--90). Ao latou faitau, fai atu ia i latou e matau pe na faapefea ona faaalia e sa Soramă lo latou faamaualuga. Na faapefea ona faaalia e Alema lona lotomaualalo? (tagai Alema 31:30–33).

• Vaevae tamaiti i ni vaega, ma fai atu i vaega taitasi e filifili se tali i fesili e pei o nei: O le a le mea na tuu i ai e sa Sorama o latou loto? (tagai Alema 31:24, 28). O a nisi o mea faalelalolagi e faamuamua i loto o tagata i aso nei? Aisea atonu e manatu ai tagata e sili atu i latou nai lo isi? Pe a faasoa e vaega taitasi se tali, ia latou tusia se vaega o le olo o Rameutoma i luga o le laupapa. Ona fai atu lea ia i latou e solo ese vaega o le olo i taimi uma latou te mafaufau ai i se auala latou te faaalia ai le lotomaualalo.

aikona o le aoaoina

Fautuaina le Aoaoina i le Aiga

Valaaulia tamaiti e aoao o latou aiga i se mea sa latou aoaoina e uiga i le mamana o le afioga a le Atua i le aso.

Faaleleia o Lo Tatou Aoao Atu

Fesoasoani i tamaiti e aoao mai tusitusiga paia. Atonu e le mafai e tamaiti laiti ona faitau lelei, ae e mafai lava ona e faagalulue i latou e aoao mai tusitusiga paia. Mo se faataitaiga, e mafai ona e faitauina se fuaitau ma valaaulia i latou e tutu i luga pe sii i luga o latou lima pe a latou faalogoina se upu patino poʻo se fuaitau. Ona fesoasoani lea ia i latou e malamalama i le upu po o le fuaitau. (Tagai Aoao Atu i le Ala a le Faaola, 20–21.)

itulau o gaoioiga: o mea uma e molimau i le Atua