Alema o loo aoaoina Kori’oa

Ua Faailoa Mai i Mea Uma e i Ai le Atua (Alema ma Kori’oa), saunia e Walter Rane

6–12 Iulai

Alema 30–31

“O Le Mana o le Afioga a le Atua”

Na molimau mai Alema i le “uiga mamana tele” o le afioga a le Atua (Alema 31: 5). A e faitau i le Alema 30-31, tusifaamaumau ou lagona uunai ao e lagonaina le uiga mamana tele o le afioga a le Atua ia te oe.

Tusifaamaumau Ou Lagona Uunai

O tala o loo i le Alema 30–31 o loo faaalia manino ai le mana o upu—mo le leaga ma mo le lelei. O “upu faaviivii” ma “leotetele” a se aoao pepelo na igoa ia Kori’oa sa faamata’uina ai e aumaia le “tele o agaga i lalo i le faafanoga” (Alema 30:31, 47). E faapena foi, o aoaoga a se sa Nifae liliuese na igoa ia Sorama na taitai ai se vaega o tagata e pauu “i sese tetele” ma “faapiopio ala o le Alii” (Alema 31:9, 11).

I le isi itu, sa i ai ia Alema se faatuatua e le maluelue e faapea, o le afioga a le Atua o le a i ai se “sona uiga mamana tele atu i luga o mafaufau o tagata nai lo le pelu, po o se isi lava mea” (Alema 31:5)—e aofia ai ma upu a Kori’oa ma Sorama. O upu a Alema na faaalia ai le upumoni e faavavau ma valaau atu ai i mana o le lagi e faafilemu ai Kori’oa (tagai Alema 30:39–50), ma na valaauliaina ai faamanuiaga o le lagi i luga o i latou o e na latou o e toe aumai sa Sorama i le upumoni (tagai Alema 31:31–38). O ni faataitaiga taua nei mo soo o Keriso i aso nei, pe a toe i ai se aafiaga malosi o “upu tetele” ma “sese tetele” i mafaufau o le nuu (Alema 30:31; 31:9). Ae e mafai ona tatou maua le upumoni e ala i le faatuatuaina, e pei ona sa faia e Alema, “o le mana o le afioga a le Atua” (Alema 31: 5).

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Alema 30:6, 12

O le a se aneti-Keriso?

I le Alema 30:6, o loo ta’ua ai Kori’oa o se “Aneti-Keriso.” O se aneti-Keriso o se “o le a faafoliga ia Keriso ae o le mea moni o lea a tetee ia Keriso (1 Ioane 2:18–22; 4:3–6; 2 Ioane 1:7). I se faauigaga lautele, o soo se tasi po o soo se mea e faataitai seseina le talalelei moni po o le ata o le faaolataga ma e tetee faaaliali pe faalilolilo e tetee ia Keriso” (Bible Dictionary, “Antichrist”).

O a ni “taitai seseina [o le] talalelei moni” o e maitauina i le lalolagi i aso nei? Mo se faataitaiga, na aoao mai Sister Julie B. Beck, o le sa avea muamua ma Peresitene Aoao o le Aualofa, “O soo se aoaoga faavae po o se mataupu faavae [tatou] te faalogo i ai mai le lalolagi e tetee i le aiga, ua tetee foi ia Keriso” (“Teaching the Doctrine of the Family,” Ensign, Mar. 2011, 15).

Ua talanoa Kori’oa ma Alema

Ua Faafetaui e Kori’oa ia Alema, saunia e Robert T. Barrett

Alema 30:6–60

E mafai ona fesoasoani le Tusi a Mamona ia te au ia ou tetee ai i faatosinaga a i latou o e taumafai e faasese a’u.

A o e faitau i le Alema 30:6–31, atonu e te tau masani i aoaoga a Kori’oa. E pei ona sa aoao mai e Peresitene Ezra Taft Benson, ona o le Tusi a Mamona ua faaali mai ai ma mafai ona faamalosia ai i tatou e faasaga “i taupulepulega leaga, ma mataupu a le tiapolo i o tatou aso. O le ituaiga liliuese o ta’ua mai i le Tusi a Mamona, e tali tutusa lava ma ituaiga liliuese ua ia i tatou i aso nei. Na mamanuina e le Atua le Tusi a Mamona, faatasi ai ma lona muai silafia le mafuatiaina ina ia mafai ona tatou iloa ai le mea sese ma iloa ai auala e faafetaia’ia ai manatu sese faaleaoaoga, faaupufai, faalelotu, ma faafilosofia o o tatou aso” (Aoaoga a Peresitene o le Ekalesia: Ezra Taft Benson, [2014], 132).

Mafaufau e fai se lisi o aoaoga faavae sese na aoaoina e Kori’oa i le Alema 30:6–31. O a nisi o taunuuga o le talitonu i nei aoaoga? Mo se faataitaiga, o le a le taunuuga o le talitonu e faapea, “pe a oti le tagata, o lona iuga lea”? (Alema 30:18). O a aoaoga faavae sese na aoaoina e Kori’oa e talitutusa ma aoaoga faavae sese ua e maitauina i le lalolagi i aso nei?

O le faitau e uiga i le fegalegaleaiga i le va o Kori’oa ma Alema e mafai ona fesoasoani e te saunia ai mo tulaga pe a taumafai isi e faaseseina oe. Atonu e fesoasoani le suesue o le Alema 30:29–60 ina ia malamalama ai i le auala na faaseseina ai Kori’oa (tagai faapitoa i fuaiupu 52–53). O le a se mea e mafai ona e aoao mai i le tali a Alema i aoaoga a Kori’oa? (tagai Alema 30:31–35).

Alema 31

E i ai i le afioga a le Atua le mana e taitai atu ai tagata i le amiotonu.

O le faafitauli o le vavaeeseina o sa Sorama mai sa Nifae, atonu sa foliga mai i nisi, e pei sa manaomia ai se fofo faaleupufai pe faamiliteli (tagai Alema 31:1–4). Ae sa aoao e Alema ia faalagolago “i le mana o le afioga a le Atua” (Alema 31:5). O le a se mea ua e aoao mai i le Alema 31:5 e uiga i le mana o le afioga a le Atua? O faapefea ona e vaaia le taitai atu e le afioga a le Atua ia “tagata ia latou faia le mea tonu”? (Alema 31:5). Mafaufau loloto i auala e mafai ona e “faataitaia” (faaaoga pe sueina) le afioga a le Atua e fesoasoani ai i se tagata e te alofa i ai.

Ina ia malamalama atili i le tali a Alema i le laveaiina o isi, e mafai ona e faatusaina ona uiga faaalia, lagona, ma faatinoga ma [uiga, lagona ma faatinoga] a sa Sorama, e pei ona faamatalaina i le Alema 31. E mafai ona fesoasoani le siata lenei. O a ni eseesega ua e matauina? O le a sou manatu, e faapefea ona e avea atili e faapei o Alema?

Sa Soramā	Alema
Sa Soramā Na talitonu o i latou e i fafo atu o le latou vaega sa ta’usalaina i seoli (Alema 31:17).	Alema Na talitonu o sa Sorama o ona “uso” ma sa “pele” (Alema 31:35) o latou agaga.
Sa Soramā Pupū o latou loto i oa (Alema 31:24, 28).	Alema Manao e aumai agaga ia Iesu Keriso (Alema 31:34).
Sa Soramā	Alema

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Alema 30:44

Mafaufau e faitau ma talanoa faatasi i le Alema 30:44 a o outou savalivali i fafo pe vaavaai i ata o foafoaga a le Atua. E mafai e tagata o le aiga ona faasoa mai mea latou te vaai i ai o loo molimau mai e uiga i le Atua. E faapefea ona fesoasoani nei mea—po o isi aafiaga na tatou oo i ai—ia tatou iloa ai e moni le Atua?

Alema 30:56–60

O a ni mea ua tatou aoao mai i le Alema 30:56–60 e faatatau i le auala e taulima ai e le tiapolo ona soo? O a ni mea e mafai ona tatou faia e puipuia ai o tatou aiga e faasaga i ana faatosinaga atinae ai o tatou olaga i a latou aoaoga?

Alema 31:20–38

A uma ona outou faitaua faatasi ma lou aiga le Alema 31:20–38 , e mafai ona outou talanoaina fesili nei: Na faapefea ona ese le tatalo a Alema mai le tatalo a sa Sorama? E mafai faapefea ona tatou mulimuli i le faataitaiga a Alema i a tatou tatalo faletagata lava ia ma tatalo faaleaiga?

E mafai e tamaiti laiti ifo ona tuu se maa i lalo o o latou aluga e fesoasoani ia latou manatua ai ia tatalo i taeao ma afiafi uma. Atonu foi latou te fiafia e teuteu a latou maa.

Alema 31:23

O le a se mea o tatou faia i aso taitasi i o tatou fale e aoao ai ma talanoa e uiga i le Atua?

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia Suesuega Faaletagata Lava Ia

Tapenapena lou siosiomaga. “E mafai ona matua aafia o tatou siosiomaga i lo tatou tomai e aoao ai ma lagonaina le upumoni” (Aoao Atu i le Ala a le Faaola, 15). Taumafai e sue se nofoaga e suesue ai tusitusiga paia lea e valaaulia ai le mana o le Agaga Paia. O musika faagaeetia ma ata e mafai foi ona valaaulia le Agaga.

O le sa Sorama o loo tatalo i luga o le Rameutoma

O le Rameutoma, na tusia e Del Parson