Taimi o Fetufaaiga

Manatua

Saunia e Elizabeth Ricks

“Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5).

E te manatu o le a le upu e sili ona taua i le tusi lomifefiloi? Na saunoa mai Peresitene Spencer W. Kimball (1895–1985) atonu o le upu e sili ona taua o le manatua. Na ia faapea mai o lo tatou manaoga sili o le manatua (tagai “Circles of Exaltation,” saunoaga i faiaoga faalelotu, Iunivesite o Polika Iaga, 28 Iuni, 1968, 8).

Na silafia e le perofeta o le Tusi a Mamona o Helamana le taua o le manatua. Na ia uunaia ona atalii o Nifae ma Liae ina ia manatua e tausi poloaiga a le Atua. Na ia talosaga atu ia i laua e manatua tagata maoae ua faaigoaina ai i laua. Na ia talosaga atu ia i laua ia manatua upu a perofeta. O le mea sili ona taua, na ia talosaga ia i laua ia manatua o Iesu Keriso o le a afio mai e togiola le lalolagi. Na faapea mai Helamana, “O’u atalii e, ia manatua, ia manatua lava, e ao ina outou atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua” (Helamana 5:12; tagai foi f. 5–9).

Na manatua e Nifae ma Liae aoaoga a lo la tama. Na totoa i laua i le tausiga o poloaiga a le Atua i o laua soifuaga uma.

Tatou te o i sauniga faamanatuga i Aso Sa taitasi ma aai ma feinu i le faamanatuga. O se taimi e manatua ai a tatou feagaiga o le papatisoga. A faamanuia e se ositaulaga le faamanatuga, tatou te faalogo o fai mai o ia, “Ma manatua pea o ia ma tausi i ana poloaiga” (MFF 20:77; faaopoopo le faamamafa).

O le a tuputupu ae lou faatuatua pe a e osia feagaiga o le papatisoga. A uma ona e papatiso ma faamauina, e tatau ona e manatua e tausi na feagaiga i lou olaga atoa. O le a faaauau ona e tuputupu ae i lou faatuatua a o e manatua Iesu Keriso.

Gaoioiga

Faapipii le itulau U4 i se pepa malo, ona oti ese lea o ata. Faafao i lalo. Faataliaga ni ata se lua. Afai e tutusa, tuu i le faaputuga, ma toe taalo. Afai e le tutusa, toe faafao, ma taalo loa le isi tagata e faataliaga ni ata se lua. Taumafai e manatua le mea o i ai ata taitasi. Taaalo pea seia uma ona faatutusa ia ata uma ma le upu manatua.

Manatu mo Taimi o Fetufaaiga

1. 1. Tusi upu taitasi o le Ioane 3:5 i luga o fasipepa, ma tufa pepa i tamaiti. Fai atu i tamaiti e faitau upu i soo se faasologa, ma fesili ia i latou po o le a le uiga o le mau. Faamalamalama o upu autu e pei o le vai, Agaga, ma le ulufale atonu o le a fesoasoani ia i latou. A sao ona mate e tamaiti o le mau e faatatau i le papatisoga, tuu atu ia i latou le tusi o loo maua ai le mau, ma fesoasoani ia i latou e faatulaga lelei upu o le mau. Toe fai faatasi le mau mo ni nai taimi. I se vaiaso atoa i luma mai, valaaulia ni tamaiti e tuuina atu se lipoti puupuu i le uiga o o latou igoa ae pe aisea na filifili ai e o latou matua o latou igoa. A maea a latou lipoti, fesili i tamaiti po o le a le uiga o le tauave i luga o se tagata o le suafa o Keriso. Ia saunia ma ni faataitaiga, e pei o faifeautalai o loo i ai le suafa o Iesu Keriso i a latou pine aua o i latou o Ona sui.

2. 2. Vavae le Peraimeri i vaega e lua. Fai i le vaega muamua e sue se mau e tau mai ai po o ai le sui lona tolu o le Aigaatua. Fai atu i le vaega lona lua e sue se mau e tau mai ai po o le a le vaega lona fa o uluai mataupu faavae ma sauniga o le talalelei. Afai latou te manaomia se fesoasoani, faamanatu ia i latou o Mataupu Faavae o le Faatuatua o se vaega o le Penina Tau Tele. Toe faamanatu le sauniga muamua ma le fa. Ta’u i tamaiti e faigata ona faamatala tonu pe faapefea ona lagonaina le Agaga. Fai i se tamaitiiti matua e faitau le Ioane 14:26. Fai i tamaiti e faalogo mo se isi igoa mo le Agaga Paia (Fesoasoani). Faasino auala e avea ai le Agaga Paia ma Fesoasoani.