Valu Uso Iapani
Ona o le faatuatua o le matou tina i le savali a faifeautalai, ua faamanuiaina e le talalelei lo matou aiga ma le tele o isi [tagata] i Iapani atoa.
E toaiva le fanau a o’u matua—valu atalii ma le afafine. Na maliu le teine e toatasi a o laitiiti i le Taua Lona Lua a le Lalolagi i le taimi o le taua o Okinaua. Ina ua mavae le taua, na faatuina e lo’u tama se fale lipea taavale faamanuiaina i Nago, i le itu i matu o le motu autu o Okinaua. I le 1954, a o 2 tausaga o lo’u uso laitiiti ae 17 lo’u uso matua, na maliu ai lo’u tama, ma na nofotoatasi ai lo’u tina i le 40 o ona tausaga. Na le mafai ona talia e Tina le maliu o Tama. I nisi taimi, i lona faanoanoa, na manao ai e mulimuli atu ia te ia, peitai, na i ai sana fanau tama e toavalu e le mafai ona ia tuua.
E oo mai lava i lena taimi, na faamoemoe lo’u tina, o Haru, i lo’u tama e tausia lo matou aiga; ae ina ua leai o ia, ua faamalosia nei o ia e faigaluega. Na taumafai o ia e faagalo ona faanoanoaga e ala i le faigaluega ona foi mai lea i le fale e tausi lana fanau. Na tauivi o ia e tausi toatasi nei tama ulavavale e toavalu. Ina ua lava lo’u matua ou te malamalama ai, na ou iloa ai ou te le i iloa lava le taimi e ala ai lo’u tina ma le taimi e moe ai.
Aoao La’u Fanau e Uiga i le Atua
O le sefulu tausaga talu ona maliu lo’u tama, sa pei na taitaia e le Agaga, na tuua ai e Tina ia Nago e ui i le tetee a uo ma aiga ae masii atu i Naha, le aai o Okinaua. I ni nai tausaga mulimuli ane, e tusa o le 1967, na tuitui mai ai faifeautalai i lo matou faitotoa. O lena taimi, na tutasi lo matou fale ma sa siomia i faatoaga tolo ma se fanuatanu. Na leaga le auala i le fale, ma e toaitiiti ni tagata e asiasi mai ia i matou. O faifeautalai o Elder Jackson ma Elder Fuchigami, o le tupulaga lona lua o se Iapani Amerika mai Hawaii. Na fesili mai faifeautalai, “E mafai ona tatou talanoa e uiga i le Atua?” Na i ai popolega o Tina e uiga i aoaoga a lana fanau ma manatu ai atonu o le a matou aoao mai ni mea lelei i faifeautalai, o lea na ia valaaulia ai i laua i le fale ma faapea atu, “Faamolemole aoao la’u fanau e uiga i le Atua.”
Na maua e Tina le filemu a o ia aoao e uiga i le talalelei. Na ootia o ia i le totogi e faifeautalai o a laua lava misiona, ma le faia e Elder Jackson o se misiona, e ui lava na maliliu uma ona matua i se faalavelave tau taavale a o laitiiti, ma sa la tauivi mai faatasi ma lona tuafafine matua. A o faalogologo o ia i faifeautalai, na maligi loimata o Tina mo le taimi muamua lava talu ona maliu lo’u tama. Na ia lagonaina le alofa o le Alii ma le Agaga e ala i lesona. Na ia iloaina o le ekalesia lenei na sailia e lo matou aiga.
Ina ia faia se faataitaiga mo lana fanau tama, na papatiso muamua ai Tina. Na ootia o ia i le savali a faifeautalai ma o la uiga alolofa ma le agalelei. Na amata ona ia mafaufau o le aoaoga sili lava e mafai ona ia tuuina atu i lana fanau, o le aoao lea o i matou i le talalelei ma avea ma ni faifeautalai. O taimi uma lava na fai atu ai Tina i faifeautalai, “E toavalu tama i lo matou aiga. Faamolemole o mai i le matou fale ma aoao atu le talalelei ia i latou. A liliu uma i latou, o le a faaopoopo isi perisitua e toavalu i le lotu. Ma e mafai ona avea i latou ma faifeautalai i le lumanai.”
Auaunaga i Misiona
O le toatele o i matou ma o’u uso na mulimuli i lo’u tina ma auai taitoatasi i le Ekalesia. A o matou auai i le lotu, na suia o matou olaga i le talalelei ma le fesoasoani na tuuina mai e uso ma tuafafine i le lotu. Na avea i matou ma atalii ma uso sili atu ona lelei. Na amata ona faateleina lo matou fesoasoania’i ma iloa ai le manaia o le olaga. E toafa i matou na mulimuli ane talai atu le talalelei o ni faifeautalai i vaega eseese o Iapani. Ina ua vaai le tasi o o’u uso matua, o le na aluese mai Okinaua, i le tulaga lelei o se tasi o ona uso laitiiti o le na auauna i se misiona, na ia faapea mai, “Ou te le talitonu o lo’u uso laitiiti lea sa masani ona ulavale tele.” Ma i lona lava lotomalie, sa ia sailia ai le Ekalesia ma e lei umi ae papatiso ma faamauina.
A o lei papatisoina le isi o’u uso matua i le 27 o ona tausaga, na le iloa e ia pe faapefea ona ola. Na i ai ona faafitauli ma sa inu ava ma alu i pati. Na ia faatupuina le faanoanoa tele i lona aiga ma isi tagata e latalata ia te ia. Ina ua iloa e lenei uso le faamoemoega o le olaga e ala i le talalelei, na papatiso ma faamauina ma mulimuli ane faaipoipo i se tamaitai lelei i le Ekalesia. Na ia maua le olioli i lona olaga ma amata ona lagona se faamoemoega i le ola ai. Na ia faasoa atu le talalelei i uo ma na avea o ia ma uunaiga lelei i le toatele. O o’u uso sa faamisiona na faigata ona talitonu ina ua latou faalogo ua auai le uso lea i le Ekalesia.
I le avea ai ma faifeautalai, sa matou maua ma o’u uso le fesoasoani mai o matou peresitene o misiona ma soa faapea foi ma tagata o le Ekalesia ma le Alii. Na matou galulue malosi, ma faatasi ai ma le fesoasoani a le Agaga, na mafai ona matou papatiso ma faamauina le toatele o tagata. O i latou na liliu mai, e toatasi ua avea nei ma peresitene o le siteki, o nisi ua fautua maualuga, ma nisi o loo epikopo. O na aiga ua faamauina i le malumalu, ma o loo auauna nei a latou fanau o ni faifeautalai. E ala i le auauna atu na mafai ai ona matou foai atu, ua totoina ni fatu i vaega uma o Iapani ma ua amata ona fuga mai. Na taunuu le miti a Tina ina ia avea lana fanau ma ni faifeautalai.
Fausiaina o le Malo
E ala i le auauna ai i valaauga, ua matou tutupu ai faaleagaga ma o’u uso. O uso taitasi o le ua auai i le Ekalesia ua faamauina i le malumalu ma o loo tausia nei se aiga fiafia. Na faamauina Tina i le Malumalu o Laie Hawaii, ia tama ma le matou tuafafine faapea i matou uma lava ua liliu mai. Na mafai ona ia iloa le atoatoaga o le talalelei toefuataiina a Iesu Keriso a o ia mauaina faamanuiaga o le malumalu. Na asiasi mulimuli ane o ia i ona aiga, i le sailia ma le filiga o faamatalaga e fesoasoani ia te ia i lana galuega o talafaasolopito o aiga. Na auauna lo’u tina i polokalama a le Aualofa ma Tamaitai Talavou ma faiaoga i le seminare.
O le aiga o Kina ua faaopoopoina i ai afafine faaletulafono, fanau a fanau, ma fanau a fanau a fanau: o se aofaiga e 66 tagata. Mai ia [aofaiga], e 51 o tagata o le Ekalesia ma e 10 faifeautalai ua maea misiona. O le a faaauau pea ona o atu fanau a fanau ma fanau a fanau a fanau i misiona i taimi e matutua ai i latou. Matou te lagona o le tiute lea a i latou o e ua mauaina faamanuiaga o le talalelei ia faia faapea.
Na auauna tagata o le aiga o Kina pe o loo auauna foi i tofiga nei: toalua i le au peresitene o siteki (po o au peresitene o itu), toatolu o fautua maualuga, toafitu i au epikopo (po o au peresitene o paranesi), toafa o taitai vaega faitaulaga sili, toavalu i au peresitene o korama toeaina, toaono o taitai misiona, ma le toafitu i au peresitene o le Aualofa. Matou te lagona le faamanuiaina i le maua ai o nei avanoa matou te auauna atu ai i isi.
Molimau a Tina
Na maua e Tina se molimau malosi a o vaavaai atu ua suia olaga o lana fanau mo le lelei e ala i le talalelei a Iesu Keriso. Na ia te ia se faanaunauga e faasoa atu le talalelei ia i latou e alofa i ai. Na ia faailoa atu uo ma aiga i faifeautalai ma sa masani ona faia fonotaga faaleaiga i le fale. E ala i lenei mea, na avea ai o ia ma meafaigaluega i le aumaia o le toatele i le Ekalesia, e aofia ai le toa 50 o tagata o lona aiga.
O Tina, lea ua 90 nei [ona tausaga], na ia tuuina mai le molimau lenei i se tasi taimi: “I le avea ai o se tina, ou te fiafia e ositaulagaina a’u lava ina ia mafai ona toe foi atu la’u fanau i lo latou Tama Faalelagi. E mafai faapefea ona tuua e se tasi se tamaitiiti e matua alofa i ai ae alu pea i le Tama Faalelagi? O la’u misiona aupito taua iinei i le lalolagi i le avea ai o se tina, o le toe faafoi atu o fanau na ou maua mai le Tama Faalelagi ia te Ia.”
O i matou o atalii ua oo i tausaga ua i ai a matou fanau ma fanau a fanau ma mafai ona malamalama ma talisapaia le molimau a lo matou tina.
E moni le talalelei, ma o le upu moni e suia ai tagata. E ala i le talalelei ua matou iloa ai le alofa ma le alofa tunoa o le Atua. Ua tele a matou uo i uso ma tuafafine lelei i le Ekalesia ma e faafetai mo suiga ua matou oo i ai e ala ia latou faataitaiga. O le a matou agai i luma o ni tufugaaao o le Atua iinei i Okinaua ma talai le talalelei toefuataiina, fausia falelotu ma malumalu, ma fesoasoani e faatuina Siona.