Soka po o le Misiona?
E pei foi o isi faifeautalai faamoemoeina, na manaomia le faia e Lohran Saldanha Queiroz o se filifiliga pe auauna i se misiona pe leai. Ae e le gata i le filifili pe tuua le aoga, galuega, aiga, ma uo mo le lua tausaga, na ia Lohran foi se isi filifiliga faigata: o le auauna i se misiona po o le maua o le avanoa e taalo soka faapolofesa ai i Pasila?
O Lohran, o se tasi o le Uarota o Barra da Tijuca, i le Siteki o Rio de Janeiro Brazil Jacarepaguá, e i ai le taalo soka i lona toto. O lona tama, o Milton, ua lauiloa ia Tita i le atunuu o Pasila. Ua taalo soka faapolofesa o ia i atunuu e lima, manumalo i le tele o faailoga, avea ma tagata sikoa silisili i le setete, ma e taalo i le au a le atunuu.
Na matauina e Tita le agavaa o lona atalii a o laitiiti. “Na ou ola ae faatasi ma polo soka i o’u tafatafa i taimi uma,” na manatua ai e Lohran. “E uunai lava a’u e lo’u tama. Na amata ona ma o ma lo’u tama i ana toleniga a o tolu pe fa o’u tausaga, ma ua ou latalata ai i tagata taaalo faapolofesa talu mai lava lena taimi.”
Na amata toleniga aloaia a Lohran i le 6 o ona tausaga i Mekisiko, lea na taalo soka ai lona tama i le taimi lena. I le 12 o ona tausaga na taalo o ia i tauvaga a le au taaalo e talenia faapitoa i Pasila. Ma ina ua 17, na taalo Lohran i le liki laiti—o le auala vave lea e filifilia ai e taalo faapolofesa. Na foliga mai o Lohran ua agai tonu lava mo le avea ma tagata tautaua i le soka. Ae na vave ona oo mai lona aso fanau lona 18, ma na amata ona ia mafaufau loloto i le galuega faafaifeautalai.
Ua faamatala mai e Lohran le faafitauli: “Na ou manao e avea a’u ma tagata taalo soka, ma na ou manao foi e avea a’u ma se faifeautalai. Latou te faamoemoe e alu sa’o lava se tagata taalo mai le au laiti i le liki faapolofesa. O le tuu o le taalo mo le lua tausaga ma le manatu e toe faataalo i le 21 o tausaga e le o se mea e ono mafaufauina.”
I le 17 o ona tausaga na faia ai e Lohran ni filifiliga na faapea ona taitai atu ai i le mea ua ia taua o le amataga o lona liua. Na ia faatuina ni sini e faitau le Tusi a Mamona i aso uma, anapogi, ma tatalo. Na masani ona auai soo atu i Mutuale, faeasaite, ma isi gaoioiga a le Ekalesia. Ma ina ua amata ona latou galulue soo ma faifeautalai, na ia lagona se alofa mo tagata na ia asia ma tatalo mo i latou. Na manao o ia ia latou maua faamanuiaga o le talalelei. O lona manao e faia se misiona na amata ona faatupulaia. Ae o afea se taimi sili mo ia e auauna ai? Ma o le a le mea o le a tupu i lana matata o le soka pe a uma le lua tausaga na taofia ai?
Na saili Lohran ia iloa le finagalo o le Atua e ala i le anapogi ma le tatalo. I lena lava vaiaso, na ia matauina ai le lomiga o le mekasini o le New Era na faatoa tiliva mai i lona fale, ma amata loa ona ia suesueina itulau. Na tosina o ia i le tala “Miti i le Aisa,” e uiga i le tagata siva i luga o le aisa o Chris Obzansky, o le na taofia se matata e ono faamanuiaina o se tagata siva i luga o le aisa ina ia auauna atu i se misiona i le 19 o ona tausaga, ma aveesea ai le avanoa e tauva ai i le Olimipeka o le Taumalulu o le 2006.
E tasi se vaega i le tala na tosina i ai le mafaufau o Lohran: a o i ai Chris i le sauniga faamanatuga o faalogologo atu i le lauga a lana peresitene o Alii Talavou e uiga i lona valaauga o le misiona, na ta’u e le Agaga ia Chris, “E tatau ona e alu i le misiona pe a atoa lou 19 tausaga, a le o lea o le a faigata lou olaga.” Fai mai Chris, “Na matuai manino lelei le savali, o lea na faliu ai o ia i tua pe o i ai se tagata iina. Na toe oo mai lea lagona ma ua faasefuluina lona malosi, ma sa ou iloa e tatau ona ou alu i se misiona.”1
Ua ataata Lohran. “Ina ua ou faitauina le tala lena, na ou lagonaina na tusia mo a’u. O le 19 tausaga o le matua lena ua fautuaina malosi mai e le Alii. Na ou iloa o le tali lena na ou manaomia, ma na pei ua aveeseina atu se avega mamafa mai lo’u tua.” O le taimi mo Lohran e auauna ai i le misiona o le taimi lava lenei. Na talanoa o ia i lona epikopo, faia sauniuniga e tatau ai, ma e lei toe tepa lava i tua. “E lei i ai lava se faigata o le faia o le filifiliga e tuu le soka,” o lana tala lea, “aua na ou iloaina o le taimi tonu lea e fai ai.”
Na auauna Lohran i le laumua o lona atunuu, i le Misiona a Brazil Brasília. Na lauiloa o ia o “Elder Fiafia” ona o le pipisi o lona maelega. “Ou te matua fiafia tele e auauna i tagata, ma faasoa atu ia i latou le mea ua ou iloa e moni,” sa fai mai ai o ia. “O se tulaga faamalieloto le vaaia ua suia olaga o tagata ina ua maea ona latou aoaoina le talalelei.”
Peitai, e pei lava o faifeautalai uma, na oo foi o ia i faigata. “O le mea moni, o le olaga faafaifeautalai e le malie i taimi uma,” na ia fai mai ai. “E i ai faigata, taimi o vaivaiga ma le tuua toatasi, ae o na mea uma e faatauvaa pe a faatusa atu i oa o se misiona. O tausaga ia o le a le galo lava ia te au, o le a i ai pea i lo’u mafaufau ma, e sili atu ona taua, i lo’u loto.”
I ni nai masina talu ai na ia faamaeaina ai se misiona faamanuiaina. O lea la ua i le fale, ua auai o ia i se au soka i Rio de Janiero ma ua talitonu o le a oo mai ni avanoa se tele e faaauau ai lana matata taalo soka. Ma le faatuatua ua ia faapea mai, “Ua ou faatalitali nei mo avanoa e oo mai, avanoa o le a faamanuiaina ai au e lo tatou Tama Faalelagi ia ou fiafia ai.