O Se Solaaga Faavavega mai le Malaia
“Aua o le faatuatua e fai ai vavega” (Moronae 7:3). 7
Faavae i se tala moni
O se aoauli mugala o le tautotogo, o le vaiaso talu ona uma lo’u aso fanau e atoa ai lo’u valu tausaga—o se aso manaia mo le tietie uila. Na matou o ai ma lo’u uso o Mala, o le ma uo o Lisa, ma agai atu i se auala i uta o se vaega o le fanua o le pa povi a le matou aiga i British Columbia, i Kanata. Na susulu tumutumu o mauga a o suluia e le la o latou tumutumu aisa. Na faatumulia a’u i le fiafia a o vilivili atu lau uila.
Na ou tietie i se uila pau lua mo na o se vaiaso, o le mea lea sa ou tetete laitiititi ai lava. O le vaega muamua o le auala o le palapala laulelei, na faamafola e feoaiga a palau ma taavale lau vaomago. A o faasolo ina tea mai togavao mafiafia o vaomago, na amata ona vili televave a matou uila. Na ou lagonaina le malosi ma le saoloto, i le matou tietiega i le savili malu o mauga.
Ona matou oo mai lea i se vaeluaga o le auala. E mafai ona matou o sao lava i le tausiusiuga o le fanua, pe matou te liliu i le auala e ui atu i le auvai i lalo o le mauga. Na tonu matou te o i le auala e ui i tafā mauga.
Na ma uia ma Mala lea auala i isi taimi muamua ma lo matou aiga, ae o le taimi muamua lea ua ou tietie uila ai i i. Na fai si ou popole ina ua tetete la’u uila i le vaega e taofi ai povi, o se pu na ufiufi i uamea na faataatitia lelei e taofi ai povi mai le o i fafo. Na ou vili malosi ia matou o faatasi ma Mala ma Lisa. Na ati mai sulu o le la i laau paina tetele, ma faia ai se mamanu susulu ma le fiafia i le auala gaoa.
A o faasolo ina ma’ā tele le auala, na faasolo foi ina ou popole tele. Na faigata ona faapaleni la’u uila. Na ou mafaufau pe mata o le a papa pa’u o la’u uila i maa.
“Ou te manatu pei lava e tatau ona tatou toe foi,” o la’u tala lea.
“Aisea?” o le fesili lea a Mala. “Ua e fefe?”
E le mafai ona ou ioe i lo’u uso matua ua ou fefe. “E leai. Ou te le manao e pa la’u pa’u.”
“Ia, e mafai ona e toe foi pe a e manao ai, ae o le a ma o pea,” o lana tala lea.
“Fa,” o la’u valaau lea a o liliu i tua la’u uila.
“Tatou feiloai i le fale,” na fai mai ai Mala. “Masalo e le toe mamao tele foi le ma o.”
Na ou alu loa i le fale, na o a’u. O mamanu i luga o le auala na le foliga fiafia nei. Na faafuasei lava ona ou lagonaina leo eseese mai le togavao pogisa. Ae o le iloa ua lata mai le mafanafana o lo’u aiga, o lea na ou vilivili ai pea. Na toeitiiti lava o’u oo i le vaega e taofi ai povi ae ou lagonaina se tagata i o’u tua. “Ai ua filifili Mala ma Lisa e o mai foi i le fale,” na ou manatu ai ma le toa. “O le a ou le tau alu na o a’u i le fale.” Na lafo ane lo’u vae i le isi itu o le uila, ma ou tu ma liliu e vaai po o fea o i ai i laua. E leai se Mala ma se Lisa, ae o loo savali sao mai lava ia te au se urosa uliuli!
Na ou tu faamalo. Na palasi i lalo la’u uila. O fautuaga uma na ou faalogo i ai e uiga i urosa na taufetuli solo i lo’u mafaufau. Aua le tamoe ina nei ona tuliina oe. E le mafai ona e tamoe ese mai i se urosa. Na amata ona ou savali solomuli lemu.
Pisa pisa e faafefe ese ai le urosa. E’e ma faapa’o faatasi ni maa se lua. Na ou tilotilo faavave i le lalo i talaane o o’u vae—e leai ni maa, na o palapala. Na matuai patipati malosi o’u lima i le mea na ou mafaia. Ae na le mafai ona ou e e. Na malo lou faai. Na savali mai lava le urosa ia te au.
Tatalo. I lo’u olaga atoa na aoao a’u ou te tatalo. Na fesili mai foi lo’u faiaoga o le Aoga Sa ia i matou po o le a le mea e tatau ona matou faia pe a vaaia se urosa, ma na ia faamalosia le tatalo. Na aoaoina a’u e tatalo ma punou lo’u ulu ma moeiini o’u mata, ae na matua faigata lena mea i le taimi nei. Na ou tilotilo pea i le urosa ma tatalo le leoa: “Le Tama Faalelagi e, faamolemole fesoasoani mai ia te au! Faamolemole laveai a’u mai lenei urosa! Faamolemole fesoasoani mai ia ou iloa le mea e fai.”
A o ou tatalo ma patipati, na ou savali solomuli lemu i tua o le vaega e taofi ai povi. Afai e le mafai e se povi ona uia, o le a faigata foi i le urosa. Atonu o le a sulu, ma ou maua ai se avanoa e tamoe ai i le fale! Na ou laa ma le faaeteete i uamea faalalava vatetele.
Na manava leotele le urosa ma faatafe le faua. Na ou vaavaai i le faigofie o lona mulimuli mai ia te au i le vaega e taofi ai povi. Na tu vaelua o ia. Na ou tu ma le gatete a o sau le urosa ia te a’u ma sisii mai ona lima. Na tu maualuga mai i o’u luga ma na mafai ona ou iloa atu ona nifo maamaai ma le susū. Na faafuasei ona aapa mai le urosa i lo’u ulu! Na ou ee a o tavio ona matiuu i lo’u lauulu ma togi a’u i le palapala. Na ou toe puna ae i luga. Na tu nei le urosa i ona vae e fa, ua u le itu i totonu o lo’u suilapalapa ma toso a’u i lalo. Na amata ona ia toso a’u i luga o le auala.
I le taimi lena, na maua mai ai a’u e Mala ma Lisa. Na taumafai Mala e faasese le urosa, ae na leai se aoga. I ni nai sekone, na toso a’u e le urosa i luga o le auala pefu e alu i lalo o le mauga. Na semanu na te tosoina au i le vao mafiafia, ae tei lava i le masae o lo’u ofuvae. Na saelua mai luma e tau i tua, e oo lava i le pau i le manava o le ofuvae. O se vavega, e lei lavea lo’u tino i ona nifo. Na ou puna ae i luga. “Tamoe!” na fai mai ai se leo i lo’u mafaufau.
Na ou tamoe atu ia Mala ma Lisa, ae tuua ai le urosa ma le vae o lo’u ofuvae i lona gutu. Na leai se ofuvae ma toe tasi lo’u seevae, na ou tamoe saoasaoa ai e pei o se siamupini tamoe o le Olimipeka. Na ou pasia Mala ma Lisa, lea foi na tamomoe. Na matou fepuna i pupuvao ma taututuu agai i le vaitafe. Na mafoefoe o’u vae i lala maamaai, ae ou te lei alu lemu ai.
E aunoa ma se malolo po o se tepa i tua, na ou sopoia se pa uaea maamaai ma faapalasi i le vaitafe. Na leiloa le isi o’u seevae ina ua ou mau i lalo o se ogalaau. Toeitiiti oo i le fale, na ou puna i le vai ma tamoe atu i le pa povi susū. Na ou faaofiofi i se pa ma ou masau atu i luga o le fasitepu i le poletito ma faasasao i totonu o le faitotoa pito i luma.
Na saputu mai fesili a o’u matua ina ua vaai mai i le leai o ni o’u seevae po o so’u ofuvae ma ua lilofia i maosiosia.
“O le a le mea ua tupu?” o le ee lea a Tina.
“O fea lou ofuvae?” o le fesili lea a Tama. “Na faapefea ona e maosiosia?”
I lo’u fefe pea, na tau le mafai ai ona ou manava. I le feto’i, tau manava, ma le tagi, na mafai mulimuli ane ai [ona ou tautala], “O … o … le … urosa!”
Na tamomoe mai Mala ma Lisa i luga o le poletito, ma faamatala loa e Mala ia Tina ma Tama le mea na ia vaaia. Na taumafai Tina e faatoafilemu a’u ma fesoasoani e ave a’u i se vaitaele mafanafana.
Mulimuli ane i lena afiafi, ua ou mama ma saogalemu, na matou talanoa ai i le mea matautia na tupu. Na pa’auli o’u alofilima ua uno’oa mai le patipati malosi, ma o o’u vae na soo i maosiosia mai laau, ae na leai so’u manua mai le urosa. Na futi lo’u ulu i ona matiuu, ma na u lo’u vae i ona nifo ae lei manua ai lo’u tino. Ana latalata teisi mai matiuu o le urosa i lo’u ulu pe ana ati ona nifo i lo’u vae, semanu ou te matua lavea tigaina ma lē mafai ai ona ou sola ese.
Ou te iloa na faafofoga le Tama Faalelagi i la’u tatalo i lena aso, ma ou te iloa na ou lagonaina le leo o le Agaga Paia na fai mai ia te au ou te tamoe. Na faamanuiaina a’u e le Tama Faalelagi i se vavega.
“Ona o le tele o vavega i o tatou olaga, e tatau ona faateleina lo tatou lotomaualalo, faateleina lo tatou loto faafetai, ma faateleina lo tatou agalelei ma lo tatou talitonu.”
Peresitene Howard W. Hunter (1907–95), “O Le Atua Fai Vavega,” Liahona, Iulai 1989, 21.