Na Le Manao o Ia e Pa’i i le Tusi
I le eria mulimuli o la’u misiona i Molo, Iloilo, i Filipaina, na ou tatalo malosi ai ia mafai ona ma papatisoina ma faamauina se aiga a o le’i uma la’u misiona. Na ma tatalo ma la’u soa i se tasi aso ina ia taitaia i maua i se tasi e faamaoni lona loto, se tasi ua saunia e talia le talalelei. Na uunaia i maua e tuitui i se fale faapitoa e i ai se pa ofe. Na sau se tagata i lalo o le faasitepu, tatala le faitotoa mo maua, ma valaaulia i maua e o atu i totonu.
Na ma faauo atu ia te ia ma iloa ai o ia o se loia. Na ia tuuina mai ni fesili se tele lea na i ai taimi na le mafai ona ma taliina, ma a tautala o ia, e tautala ma le atamai lea e mafai ona faalotovaivaia ai soo se faifeautalai. Na avea o ia ma tagata sailiili faigata. Na ma faailoa atu le Tusi a Mamona, ae na ia faapea mai, “Ua lava lava le Tusi Paia.” E le mafai le mafai lava ona ia faitauina pe tago foi i le Tusi a Mamona, e peiseai e ono mu ai lona lima.
I se tasi aso na sau ai se fesoasoani o le peresitene o le misiona e galulue ma Elder Alcos, o la’u soa laitiiti. Na latou feiloai ma le nei alii, ma mulimuli ane na tau sao mai e le fesoasoani ia i maua, “Ou te manatu e lei saunia lea tagata e talia le talalelei.” Na ou mafaufau loloto i ana upu, ae na oo mai ia te au se lagona lelei, filemu, ma faamalosiau a o ou manatuaina la maua talosaga i le Tama Faalelagi e taitai i maua i e ua saunia e talia le talalelei. Na ou iloa na talia la maua tatalo. Na ou lagonaina na i ai se mea na tatau ona ma faasoa atu i lenei alii. Pau le mea ma te lei iloa po o le a, ae faapefea foi ona fai. Ae ma te lei faavaivai ai ia te ia.
Na amata lemu ona suia lona loto, ma na amata ona fiafia o ia i le polokalama o afiafi faaleaiga na ma faailoa atu ia te ia. A o faagasolo pea aso, na ou lagona le lotovaivai o le a ma le papatisoina ma faamauina lenei aiga ae ou te le’i alu ese. Na toe lava o nai aso ona faamaloloina loa lea o au. I se tasi aso na ou tau atu ai ia te ia ma le faanoanoa, “Uso Garcia, ou te manatu ua toilalo la’u misiona.”
Na ia faapea mai, “Leai, Elder Cruz, e te lei toilalo. Ua tatou faia se faigauo.” Na ma fiafia tele i ana upu na sosoo ai: “Aua le popole. O le a tatou o i le tou lotu i le Aso Sa.”
Na o mai o ia ma lona aiga i le lotu, ma na taliaina fiafia i latou e le uarota. Na ou vaaia le maligi o ona loimata a o faalogologo i upu musuia na laugaina i le taimi o le sauniga faamanatuga. Na alu o ia i le fale ma le fiafia ma le faagaeetia i lena aso. Na ou iloa na ootia lona loto.
Ina ua oo i le taimi sao ma ua ma lagona ua saunia o ia, na ma luiina loa o ia e papatiso ma faamauina. Na ia talia le lui. Na ma luiina foi o ia e anapogi ma tatalo ma faitau le Tusi a Mamona. Na ma anapopogi ma la’u soa mo ia ma lona aiga.
O le aso 4 o Me, 1986, o lo’u Aso Sa mulimuli lea i le misiona. O le Aso Sa anapogi ma le lotu molimau, ma na tuuina atu la’u molimau faaiu ma le faamaoni i tagata ua ou alofa i ai. Ina ua maea la’u molimau, na ou vaaia lenei loia, o le na le fia faalogo muamua i le ma savali, ua tulai ma savali atu i le pulelaa, o loo uuina le Tusi a Mamona. Na gatete lona tino atoa, ma na maligi ona loimata a o ia sii ae le Tusi a Mamona ma tagi, “Uso e ma tuafafine, ou te iloa e moni le Tusi a Mamona.” Na ma fiafia tele e faalogo i lenei molimau.
I lena aoauli e toatele tagata o le uarota na auai i le papatisoga o le aiga o Garcia.
Ina ua uma ona faamalolo a’u mai la’u misiona, na ma fesootai pea ma Uso Garcia. Na ia ta’uina mai ma le fiafia le aso na avea ai o ia ma peresitene o le Aoga Sa. Mulimuli ane na tofia o ia o se epikopo. E tele ni itula na malaga mai ai o ia i le vaa e auai i la’u faaipoipoga i le Malumalu o Manila Filipaina. Mulimuli ane na tofia o ia e auauna o se peresitene o le siteki ma se fesoasoani i le au peresitene o le Misiona a Bacolod Filipaina.
Ua avea o ia ma se tufugaaao i le faaliliuina mai o le toatele o tagata i le talalelei toefuataiina. O le alii na foliga mai e mu lona lima pe a pa’i i le Tusi a Mamona, ua avea ma molimau maoae i le paia ma le moni o lena tusi.